أحببت كاذبة

رجل ضعيف 2

خرجت آسيا من بيت خالها وهى تشعر بالحزن الشديد بسبب ماحدث,لقد سمح لزوجته بأن تقول ماتريد ولم يستطيع مواجهتها , كانت تعلم بأن خالها شخص ضعيف أمام زوجته وللأسف ولكنها ظنت بأنه يهتم لأمر أخته الوحيدة على الأقل وربما إعتقدت بأنه سينتفض ليساعدها ولكنها كانت واهمة . لن يساعدها, سالت دموعها وسمعته ينادى عليها وهو يقترب بسرعة التفتت له فقال: معلش يابنتى, فوزية صعبة إنت عارفاها.

عارفاها بس كنت فاكرة إن الظروف اللى أنا فيها تخليها تتغير..

مع الأسف يابنتى مش هاتتغير أبدا... أنا هاروح أشوف والدتك و....

مفيش زيارة دلوقتى بكرة بقى, أنا هاروح...

طيب أوصلك بالعربية.

تأملت آسيا خالها بنظرة مليئة باللوم والعتاب وقالت: لأ شكرا , لتكون طنط بتبص علينا من الشباك وتعمل لك مشكلة...

أحنى على رأسه وهو يشعر بالخجل الشديد من إبنة أخته ,أحرجته بكلامها ,كانت متعمدة طبعا لأنه لم يكن رجلا أمام زوجته وتصرفاتها, تابعها وهى تبتعد عنه وأغلق قبضة يده بقوة ,لماذا دائما يكون ضعيفا أمام زوجته؟ لماذا لايستطيع أن يواجهها, دائما كانت قوية وتعنفه أمام أولاده وأمام أى شخص بلا خجل ؟ تنهد على بحسرة وعاد للبيت وعندما دخل سألته منة: مرحتش المستشفى ليه يابابا؟

آسيا بتقول مفيش زيارة دلوقتى.

فوزية: تلاقيها كدابة وأمها قاعدة فى البيت بتستناها تدخل عليها بالفلوس.

ياشيخة حرام عليكى البت شكلها يقطع القلب .

إنتو برضه بيخيل عليكم التمثيل ده .. ده كهن بنات ياحبيبى, متشغلوش بالكم بيها..

إبتعدت فوزية وتبادل على النظرات مع منة التى قالت: إزاى تسيبها من غير ماتساعدها يابابا؟

هاعمل إيه يابنتى مانت شايفة أمك؟؟

كانت منة تحزن من ضعف أبيها أمام أمها ولكنها لم تتكلم ودخلت حجرتها وطلبت آسيا على الهاتف: ألو أيوه يا آسيا .... أنا عارفة إنك زعلانة معلش .. إنت طبعا عارفة الظروف.

عارفة ياحبيبتى .

أنا عايزة أقابلك بكرة أجيلك فين؟

بكرة هابقى فى الشغل الصبح أطلبينى وأنا أقولك على الميعاد بتاع الراحة.

طيب خلاص...

أغلقت منة الهاتف وفتحت درج مكتبها وأخرجت علبة بها بعض المال وقالت: أنا لازم أساعدها باللى أقدر عليه....الله يسامحك ياماما...

جلس حسام مع والده على السفرة وإقتربت منهم مديرة البيت مدام كوثر وقالت: أخبار العشاء إيه النهاردة؟