أحببت كاذبة

ذكاء منير 16

فور دخول ناريمان ووقفتها الاستعراضية وقف منير إحتراما و إبتسم لها مادا يده ليصافحها: أهلا ناريمان..

منير.. حبيبى وحشتنى قوى...

إيه الجمال ده؟

صحيح ولا بتجاملنى؟

لأ طبعا صحيح ولا كأن السنين مرت عليكى...

ميرسى..

جلست واضعة ساق على ساق ونظرت لكوثر بتعالى قائلة: إزيك...

أهلا ياست ناريمان ..

كانت ناريمان دائما تغتاظ من كلمة ست وتصر على أن تناديها كوثر بكلمة هانم, بلعت إمتعاضها ورسمت إبتسامة وسألت: فين حسام واحشنى قوى ...

قالت كوثر : وحش لما يآكلك .

لم يسمع منير ماقالت كوثر ولكنه رآها تتكلم على جانب فأشار لها يحذرها وقال: ياللا ياكوثر قدمى حاجة لأم سمر.

حاولت ناريمان أن تتحكم فى نفسها وقالت: أم سمر .. ...أول مرة تقولها يعنى يامنير.

لأنك بالنسبة لى أم سمر ...

بس!!

عايزة إيه أكتر من كده؟

نظرت له نظرة مغرية وقالت بنعومة: عايزاك إنت يامنير ... ماتخلينا نتكلم لوحدنا شوية...

زمجرت كوثر ودخلت المطبخ, صدر صوت حسام من خلف ناريمان قائلا: أهلا مرات أبويا...

إشتعلت عيناها من الغضب ولكنها إلتفتت له و أخرجت صوتها عاديا هادئا : إيه مرات أبويا دى قولى طنط...

إندهشت آسيا من قوة أعصاب ناريمان وبراعتها فى كتم غضبها وهى تصافح حسام ببرود منير: أقعدوا يا أولاد.

لمست ناريمان يد منير وهمست: نتكلم لوحدنا الأول...

مفيش مانع.. نتكلم ...

أمسك حسام يد آسيا ودخلو لكوثر المطبخ, كانت تكلم نفسها وتخبط فى كل شئ: ربنا يريحنا منها ياساتر, ماكنا مبسوطين, حد يصدق إن واحدة زيها تخلف بنت زى سمر, أنا مش طايقاها و...

توقفت عندما رأت آسيا وحسام وسألت بإرتباك: إنتو دخلتو إمتى؟

من شوية...

شوفى ياسمر أنا ست صريحة واللى فى قلبى على لسانى وأمك دى أنا مش بأحبها ولاعايزة أشوفها أبدا ... دى ياما عملت فينا أنا وحسام...

حسام: مش وقته ياماما كوثر..

آسيا،: لأ ياحسام أنا عايزة أعرف... إحكو لى...

حسام: متشغليش بالك إنتى خلينا بس نشوف بابا هايعمل إيه معاها..

كوثر: شفت بتلمس إيده إزاى ,شكلها عايزاه يرجعها وتجوزها تانى ...