أحببت كاذبة

موافقة حسام 15

بعد أن أغلقت ناريمان الهاتف تحركت بثورة وبدأت تلقى بالأشياء وهى تصرخ بغضب وقالت: الولد ده ورايا ورايا ... طيب أنا هاوريك ياحسام... سمر لازم تسيبهم وتيجى هنا وهامنعهم يشوفوها لحد ماييجو يبوسو إيدى علشان أرجعها وأروح معاهم.... والولد ده حسابه عندى كبير قوى... بس أما أدخل البيت...

تجمد حسام فى مكانه ونظر لآسيا قائلا: تسيبى البيت يعنى إيه؟

بصراحة غضبت لما عرفت إنك مش موافق إنها تيجى وقالت لى ألم هدومى وأرجع يا إما هاتيجى هى تآخدنى, أعمل إيه؟

إنت عايزة ترجعى لها.

أجابت آسيا بسرعة : لأ .... أنا عايزة أفضلك معاك.. معاكم...

أحنى حسام رأسه وزفر بقوة , كان أمام إختيارين مؤلمين إما أن تذهب سمر من البيت أو يوافق على حضور ناريمان , وضعت آسيا يدها أسفل ذقنه ورفعت رأسه ونظرت فى عينيه وهمست: أنا مش عايزاك تعمل حاجة غصب عنك ولا علشانى..

بس أنا مش عايزك تمشى ياسمر..

تبادلا النظرات الحائرة ثم قالت:لو رحت لها هاتمنعنى عنكم.. أنا متأكدة .

تعملها ... ماهى خبتك عننا 10 سنين...

هو بابا مخدنيش منها ليه؟

بابا رفع قضية علشان يآخد حضانتك لكن المحامى بتاعها تلاعب وجاب ناس تشهد بإنه بيسئ معاملتك والقاضى للأسف حكم لصالحها بالرغم من إنك كدبتى كلام المحامى وقلتى إنك عايزة تعيشى معانا , إزاى نسيتى؟

وبعدها إختفت مش كده؟

أيوه وبابا كان بيبعت لها النفقة على المحكمة .

يعنى خدت سمر غصب عنها!! بس هى قالت لى غير كده...

يعنى إيه؟

فهمتنى إنكم كرهتو سم.. كرهتونى ومحدش إتمسك بى...

إيه الكلام ده؟ كدب.. بابا حاول معاها كتير وبعد ماختفت طلب يشوفك أكتر من مرة وبلغ المحامى وهى كانت بترفض...

وكمان قالت لى إنه منير بيه مكانش بيصرف عليها..

كدب, كل ده كدب...

بدأت الأمور تتضح أمام آسيا , لقد كذبت ناريمان فى كل شئ ,خدعتها والدليل حب منير وحسام لسمر ولهفتهم عليها والسؤال هنا لماذا؟ لماذا فعلت هذا؟

ماما مش لازم تيجى هنا ياحسام... تعالى نقول لبابا يرفض..

وإنتى !! هاتمشى..

مش عارفة هاحاول أتصرف معاها .. تعالى بسرعة.

بحثو عن منير, كان يجلس فى حجرة ملك , دخلو وقالت آسيا: بابا.. حسام عنده حق.. ماما مش لازم تيجى هنا...