أحببت كاذبة

أريد أمى 13

قام حسام بتعليق لوحة آسيا فى مكان مميز فى الصالة ووقفو جميعا يتأملوها بحزن وقرأو الفاتحة وقالت كوثر: تسلم إيدك ياحبيبتى ...

منير: إنتى فرحتى قلبى ياسمر باللوحة دى..

قبل منير حبينها بحنان فقالت: هاعمل كمان واحدة زى اللى فى الأوضة فوق...

حسام: معايا صورة صغيرة لى وأنا معاها ترسميها لى على كبير.

حاضر... هاتو إنتو بس الصور وأنا أرسمها..

كوثر: أقعدو إفطرو بقى...

جلسو لتناول الطعام وقال حسام: إسمعى ياسمر أنا هاخلص شغل وإعملى حسابك هانخرج آخر النهار .

هاتودينى فين؟

هانروح النادى..

أضطربت آسيا لم تكن تريد الخروج أو الظهور معه فى أماكن عامة ربما تلتقى أحد معارفها ويتم كشف شخصيتها فقالت: خلينا فى البيت مع بابا..

بس أنا عايز أخرج معاكى زى زمان .

بعدين.. بعدين نخرج سواء...

زى ماتحبى..

منير : شفت البنت مش عايزة تسيب أبوها وإنت كل شوية عايز تخرج وكمان تآخدها معاك.

ضحك حسام: تقريبا كده بابا بيغير منى يا سمر...

أكيد بأغير, أى أب بيحب بنته لازم يغير عليها...

تأملته آسيا بحنان وتذكرت والدها وهو يقول تقريبا نفس الجملة لأمها فقالت: حبيب البنت الأول دايما بيكون الأب...

والأخ مالوش حتة فى القلب خالص...

أكيد الأخ كمان غالى ومكانته كبيرة

يعنى أنا لى مكان فى قلبك ...

إرتبكت وهى تنظر فى عينيه وخفق قلبها وهمست: طبعا ياحسام ..

ربت حسام على يدها وإبتسم لها وسأل: هاتعملى إيه وإحنا فى الشغل؟

هاروح لماما...

تبادل حسام النظرات مع منير ولم يعلق أى منهم , تغير وجوههم جعل آسيا تفكر وقررت أن تحاول معرفة الحقيقة,يجب أن تفهم ماحدث فى الماضى..

حسام: هاوصلك فى طريقى...

أخذ حسام آسيا لبيت ناريمان وسأل: هاتقعدى كتير ؟

مش عارفة ..

طيب كلمينى ولو هاتقعدى لميعاد خروجى من الشغل أعدى آخدك.

أوكى باى...

نزلت آسيا ووقفت تشيرله وهو يبتعد.

كانت بسنت طوال هذه المدة تحاول الاتصال بحسام ولكنه لايجيب أبدا على هاتفه وسألت أحمد فأخبرها بأنه لم يره منذ عدة أيام وقفت تفكر ماذا تفعل لتصل إليه وتعرف مكانه وقالت: هو غير تليفونه وإلا إيه؟ طيب أنا هاتصرف...