أحببت كاذبة

عمل إنسانى 8

بعد قضاء أجازة معا فى الساحل عاد حسام مع والده وكوثر وقالت: يومين حلوين قوى عايزين نبقى نروح تانى

إن شاء الله ياماما...

هادخل بقى اعمل لكم حاجة تآكلوها.

منير: لأ مفيش لزوم تتعبى نفسك إحنا نطلب من برة أحسن.

برة!! ودى تيجى والله مايحصل وأنا موجودة على ماتآخدو دش وترتاحو شوية هاكون عملت لكم الغداء..

ضحك منير وقال حسام: ربنا مايحرمنا منك.

توجه كل منهم لحجرته ودخلت كوثر للمطبخ وهى تقول: قال من برة قال. بلا قرف هو فيه أحلى من اكل البيت, ده أنا بطنى وجعتنى من اللى أكلناه فى الساحل...

***********

كانت نظرات آسيا لنيرمين تحمل الكثير من الغضب وأشارت للباب بغضب وقالت: إتفضلى من بيتى.

إنتى فهمتى إيه؟

شغل مريح ويجيب فلوس كتير هايكون إيه يعنى؟

ضحكت ناريمان برقة : فكرك راح لبعيد قوى.. الشغل اللى بأقول لك عليه مفيش فيه أى حاجة غلط ,لا مخلة بالشرف ولا حرام ولا مخالف للقانون ,شغل مفيش فيه أى شبهه.

نظرت لها آسيا بتردد فقالت: أقعدى وإسمعينى وإنت هاتعرفى كل حاجة..

أغلقت آسيا الباب مرة أخرى وجلست فبدأت ناريمان تتكلم وقالت بصوت ناعم:

أنا كنت متجوزة من إنسان حبيته قوى خلفت بنت جميلة بعد أول سنة جواز , كان أبوها بيعشقها وعشت معاه 4 سنين فى سعادة وحب ... هو كان متجوز ومراته ماتت وسابت له ولد عمره 10 سنين.... أبوه بعته مدرسة داخلى لأنه ولد شقى جدا ومشاغب وكان بيعمل لنا مشاكل كتير...ولما وصل 15 سنة للأسف أبوه رجعه البيت وفضل يعمل مشاكل ويوقع بينى وبين أبوه لحد ما إنفصلنا وطردنى من البيت أنا وبنتى ,كان عمرها وقتها 15 سنة ..والولد وصل 25

تألمت آسيا من أجل البنت وسألت: يعنى ساب البنت تمشى معاكى؟

هو الحقيقة إتمسك بيها بس هى رفضت تقعد معاه وعيطت فسابها تمشى معايا..

حرام عليكم حيرتو البنت بينكم...

اللى حصل , كله بسبب الولد المجرم إبنه... هو اللى عمل كده.... المهم .. أخدتها وعشنا فى شقة صغيرة وكان بيبعت لنا النفقة بإستمرار بس ..

بس إيه؟؟؟

الولد جالى البيت وهددنى إنى لازم اختفى أنا وبنتى من حياة أبوه.

وليه يعمل كده؟

عمره ماتقبل إنى أكون مرات أبوه وكان بيكرهنى وبيكره أخته....

للدرجة كان وحش؟؟

وأكتر... رمالى شيك بمبلغ وخفت على بنتى منه وإختفيت فعلا...