أحببت كاذبة

المجرمة 26

لم تكن آسيا أفضل حالا من حسام, إنها تحبه جدا وتتألم لأنها ستتركه ولكن لايوجد حل آخر,قرارها بالابتعاد مؤلم ولكن لابد منه لحماية منير وحسام, إذا إختفت هى فلن يكون هناك داعى لوجود ناريمان فى البيت وسترحل مجبرة . طلبت مفتاح المكتب من كوثر وأخذت النقود ودخلت لمنير فى مكتبه وضعت الظرف أمامه وقالت: إتفضل ..

إيه ده؟

دى الفلوس اللى حضرتك حطيتها فى حسابى أنا سحبتها وقفلت الحساب..

ليه عملتى كده يابنتى؟

لأنى مش عايزة حاجة .. أنا مش محتاجة أى حاجة ,,

وقف منير ووضع يديه على كتفها وقال: خايفة ناريمان تآخدهم منك؟؟

هى كانت عايزاهم فعلا أرجوك خدهم منى .. من فضلك...

لو ده هايريحك خلاص...قزلى لى يابنتى , إنت ليه متضايقة منها قوى كده؟

لأنها كدبت على فى حاجات كتير وإستغلتنى علشان تآخد منك فلوس ..... كل هدفها من وجودى الفلوس , طمعانة فيك يعنى..

وأنا عارف إنها طمعانة ..لكن إنت لأ .. من يوم ماجيتى ماطلبتيش منى أى حاجة ولاطمعتى فى أى حاجة وده خلاكى تكبرى فى نظرى قوى يابنتى ......

ربت عليها منير بحنان ثم إبتسم قائلا: المهم مش هانخرج مع بعض بقى وإلا إنتى إكتفيتى بحسام وضحكتى على.

لأ طبعا نخرج , تحب حضرتك نخرج إمتى؟

دلوقتى ... روحى غيرى هدومك بسرعة..

بدلت آسيا ملابسها بسرعة ونزلت وكان منير فى إنتظارها وسألتهم ناريمان: على فين؟

هاخرج مع بنتى ... نقضى وقت مع بعض..

حسام: وأنا..

إنت خلاص أخدت يوم بحاله سيبهالى النهاردة بقى وبلاش طمع..

تظاهر حسام بالحزن وربت منير على خده قائلا: سمر هاتفضل معانا على طول خلاص .. إبقى أخرج معاها وقت تانى...

خرج منير مع آسيا ودخلت ناريمان لحجرتها وهى تقول: جبتها علشان تخلى منير يرجع لى إتعلق بيها هى ورافضنى والبت عايشة الدور وفاكرة نفسها بنته بصحيح .. هى فاكرة إنها ممكن تغلبنى أو تستولى على فلوس منير, كان غيرها أشطر .... ... أنا لازم أتصرف بسرعة ... لازم....
أمسكت هاتفها.

شعرت آسيا بالسعادة لأنها تخرج مع منير, إستعادت أيامها عندما كانت تخرج مع والدها وهى صغيرة,يشترى لها الكثير من الشيكولاتة والآيس كريم ,سألها منير فى السيارة: نفسك تعملى إيه مع بابا ؟

نروح نآكل آيس كريم..

ماشى نآكل آيس كريم...

أخذها لمحل شهير ودخلو وطلب لها كوب كبير ضحكت وهى تقول: كتير قوى يابابا..