وصل سعيد وولدو احمد علي البيت وأستقبلتهم حاجه أمنه بشاشه
سعيد : السلام عليكم
حاجه امنه : وعليكم السلام
حمد لله علي السلامه يا ولدي كيفك هسي وشفت بتك واتطمنت عليها ؟
سعيد : اي الحمدلله الدكتور مراعيها وما قصر معانا وقال لي بعد اسبوع بقدر اجيبا معاي البيت
حاجه امنه : كتر خيرو وفي ميزان حسناتو ان شاءالله
سعيد : ان شاءالله اردها ليهو في الافراح
يا أمي انا بستأذنك بعد ده ارجع علي بيتي كفايه كده تقلنا عليكم
حاجه امنه : ده كلام شنو يا ولدي ده ما ياهو بيتك وانتو مليتوهو لينا ما تقلتو علينا انت عارف انا وابوك قاعدين برانا
سعيد : معليش يا امي انا هناك بلقي راحتي كفايه نفس ساره موجود فيهو
وفي لحظتها وصل حاج محمد من شغلو ودخل عليهم
حاجه امنه : تعال يا محمد اسمع ولدك بقول في شنو 😢
حاج محمد : اول السلام عليكم خير ان شاءالله مالكم؟؟
حاجه امنه : ولدك قال عايز يرجع بيتو ويقعد براهو طيب البهتم بيهم منو وبتو بقدر يربيها براهو
حاج محمد : يا ولدي امك كلامها صاح خليك قاعد معانا البيت كبير وبشيلنا كلنا ومنها تاخد بحسنا
انت عارف م لينا غيركم
سعيد : معليش يا ابوي ما بقدر والله انا عايز اقعد في بيتي خلوني علي راحتي واذا اضطر الامر انتو تعالو اقعدو معاي وبتي عندها رب اسمو #الكريم وان شاءالله بتهون
حاج محمد : طيب يا ولدي م دام انت مصر امشي وسوق امك معاك فتره مؤقته لحدي ما ترتب امورك وانا بجي عليكم من فتره للتانيه
أستسلمت حاجه امنه لرغبه سعيد وهي متفهمه لرغبتو وحاسه بالجواهو وقالت ليهو
حاجه : خلاص دقايق يا ولدي نجهز حالنا ونمشي طوالي
.. وصل التلاته علي بيت سعيد واول م دخل رجعت ليهو كل ذكرياتو مع ساره واتذكر يوم وفاتا وكيف شافهل بتضيع من ايديهو وهو عاجز وما قادر يعمل شي
غالب دموعو بصعوبه كبيره وردد في صمت الحمد لله الحمدلله
أحمد : يا ابوي انا مبسوط عشان جينا انا اشتقت لبيتنا شديد 😍
سعيد : وانا كمان مبسوط
يا امي انا ماشي اشوف شغلي الحاصل عليهو شنو طولت منو شديد
حاجه امنه : طيب يا ولدي ربنا ييسر طريقك
(سعيد شغال في مجال التجاره عندو عده محلات بنشاطات مختلفه يعني وضعو المادي مستقر وبكفي حاجتو وحاجه اولادو وفي الفتره الفاتت الأمين اخوهو هو الكان ماسك ليهو الشغل )
