أتجهت سميه نحو الباب بسرعه شديده خافت صوت الباب يصحي سعيد من النوم وتبقي مصيبه ح تهد كل البنتو في الايام الفاتت ..
سميه : أحمد 😡 كنت وين لهسي ؟؟
أحمد : معليش يا خالتي انا ..
سميه : اسكت ووطي صوتك ابوك ما يسمعك
ادخل سريع غير ملابسك وارتاح شويه حسابي معاك بعدين
.. أحمد في الايام الفاتت اتعرف علي كم واحد معاهو في المدرسه وبقو اصحابو وطول الوقت معاهم ومنهم واحد اكبر منو بي 6 سنوات ودي ما المشكله ( المشكله انو الولد ده اخلاقو ما كويسه وبتصرف تصرفات اكبر من سنو بكتير ؛ وسميه عارفه كده تماما بس ما منعت احمد يصاحبو لانو حيسهل عليها مهمتا ) وبي كده تكون نجحت في اول خطوه تدمر بيها احمد وتحقق اتنقاما من ساره ..
.. سميه : سعيد قوم العصر اذن قبيل والساعه بقت 5
سعيد : 5 عديل كده ليه ما صحيتيني يا سميه
سميه : شفتك تعبان قلت اخليك تاخد راحتك ويلا قوم هسي صلي العصر مسافه اخت الغدا
سعيد : طيب احمد وساره وين ؟
سميه : أحمد بذاكر في غرفتو وساره بتلعب بره
..ادي سعيد صلاتو واتجمعت الاسره كلها للغداء
وبعد ما خلص سعيد أكلو واطمن علي اولادو قال لسميه انا طالع عندي مشوار وان شاءالله ما بطول .. خلي بالك من نفسك ومن الاولاد
سلام عليكم
.. سميه : تعال هنا يا زفت
اتجه أحمد بخطي متثاقله ناحيه سميه لاول مره من لحظه جات بيتهم بتتكلم معاهو بالطريقه دي وبتكورك فيهو
أحمد : نعم يا خالتو
سميه : ليه اتأخرت كده الليله كنت وين ؟؟
أحمد : كنت بلعب مع اصحابي .. مش انتي قلتي لي لازم يبقي عندي اصحاب العب معاهم !!
سميه : أي قلت ليك بس الكلام ده لما يكون ابوك مافي انت عايز تعمل لي مشاكل معاهو
الحصل ده ما يتكرر تاني مفهوم ؟ تعمل كل الانت عايزو بس في الزمن البحددو ليك انا
أحمد : حاضر
انا اسف يا امي
سميه : امي !! اوعي تقول لي امي دي تاني فاهم انا ما ساره
احمد : 😭 انا اسف يا خالتي بس اتذكرت امي لانها كانت بتشاكلني لما اعمل حاجه غلط ذي ما عملتي انتي هسي
سميه حست انها اتسرعت وبالغت في رد فعلها ؛ اي نعم هي كانت بتكره ساره وعايزه تأذي اولادها بس عصبيتها دي ممكن تعرقل خطتا
سميه : انا اسفه يا حبيبي عشان كوركت فيك ما قصدي بس انت اول مره تقول لي كده واتفاجات وغير كده انت عارف اني عايزه مصلحتك بس وما عايزه ابوك يشاكلك
بالرغم من انو كلام سميه ما مقنع بس عرفت تمامآ كيف تسيطر علي أحمد وتمشيهو ذي ما هي عايزه
أحمد : ما مشكله يا خالتي
امي ساره كانت بتقول لي انو الكبار لما يشاكلو الصغار ده ما معناهو ما بحبوهم بس عايزنهم يتعلمو من اخطائهم وما يعيدوها😊
كلمات أحمد زادت الحقد داخل قلب سميه وقالت في نفسها ( تاني ساره !! انا اعمل شنو عشان اتخلص من الاسم ده بس لا يا سميه اضبطي اعصابك لازم الجواك ده يفضل جواك بس ومافي زول يعرفو)
سميه : طيب يا حبيبي قول لي صاحبك منو الكنت معاهو
أحمد : عمار يا خالتي هو بقرا في سنه ثامن بس صاحبني وانا بحب العب معاهو لكن اتشكلنا هسي😔 وتاني ما حامشي معاهو لانو واحد ما كويس والرسول صل الله عليه وسلم قال (المرء علي دين خليله فلينظر أحدكم من يخالل) وانا خايف ابقي زيو وامي وابوي يزعلو مني ..
سميه : ماشاءالله عليك يا ولدي ابوك عرف يربيك صاح ؛ بس كمان في حاجه انت ما انتبهت ليها ليه تتفرض انو حيخلك زيو مش ممكن تخليهو هو يبقي ذيك !!
أحمد : بس يا خالتي ..
سميه : ما بس انت فكر قبل ما تبعد منو تنصحو وتهديهو واذا ما نفع اقطع علاقتك بيهو
.. حاولت سميه تتلاعب بعقل احمد وبينت ليهو انها عايزاهو يبقي مثل وقدوه لغيرو بس الحقيقه كانت غير ..
..في بيت مني قاعده سوزان في المطبخ وكالعاده سرحااانه 😕
مني : يا بت انتي جنيتي قاعده جنب البوتجاز وبعد ده خليتي اللبن كلو اتدفق !! قومي تقوم قيامتك سرحانه في شنو انتي ليل ونهار
سوزان : انا اسفه يا امي ما انتبهت والله
النتيجه قربت وشايله همها
مني : همها ده ما بتعرفي تشيلي الا وقت تسخني اللبن عندك اليوم كلو شيلي هم براحتك !! قومي من وشي سديتي نفسي ولاده السجم والرماد
سوزان زعلت شديد من كلام امها ووجعتها كواريكها فيها البقت علي طول من يوم زواج سميه ودموعا نزلت غصبا عنها 😭 وقالت ليها انا اسفه يا امي واتجهت نحو غرفتا بسرعه ..
هيثم : في شنو يا امي مالك جايطه كده في سوزان ؟ ومن متين انتي بتتعاملي معانا كده ؟
مني : امشي من وشي يا ولد انا ما ناقصاك انت كمان
هيثم : كدي اقعدي يا أمي واستغفري واستهدي بالله
مني : استغفر الله العظيم
هيثم : 😳 امي مالك بتبكي ؟، كدي روقي واحكي لي مالك ؟ الموتر اعصابك شنو ؟؟
مني : موترني اخواتك ديل يا ولدي
هيثم : كيف يا امي ما فهمتك الحاصل شنو احكي لي ؟
مني : اختك سميه رغم انها اتزوجت بس لسه ما مستقره ما مرتاحه في زواجها
سعيد لحدي اللحظه دي بعاملها كانها مربيه لاولادو بس 💔 وهي كل الشاغل بالها تنتقم من ساره الماتت وشبعت موت !! وحتي ما حصل اذتها اختك الحقد مالي قلبها وما قادره تفهم انو ما ذنب ساره بس سعيد ما كان من نصيبا الزمن داك
انا خايفه يا ولدي خايفه تدمر نفسها وتدمر حياه سعيد البي صعوبه كبيره قدر يبنيها من جديد خايفه تأذي اولاد سعيد او تأذي نفسها والرجعه تبقي صعبه خايفه يا ولدي خايفه 😭
هيثم : ....
#يتبع
