و ما زال قلبي ينبض بالامل

6

أستسلم سعيد قدام غضب امو وفضل يسكت لانو لا الوقت ولا المكان مناسب عشان يتناقشو في حاجه ذي دي ..

سعيد : خليني اطمن علي بتي اول يا أمي 😊

اترسمت علامات الرضا في وش حاجه امنه بعد ما لقت بدايه قبول ظاهر علي سعيد

حاجه امنه : حاضر يا ولدي انا ما قصدي اضايقك او اضغط عليك بس انت عارف انا عايزه مصلحتك ومصلحه اولادك

سعيد : عارف يا امي الله يديك العافيه ويطول لينا في عمرك 😊

الأمين : يا امي نحن اتطمنا خلاص علي ساره ووجودكم هنا مافي ليهو داعي سوقي اسماء واحمد وامشو علي البيت وانا بستني هنا مع سعيد

حاجه امنه : لكن يا ولدي ..

سعيد : ما لكن يا امي الامين كلامو صاح واحمد ذاتو عندو مدرسه الصباح امشي وبينا التلفون ..

رضخت حاجه امنه لرغبه اولادها وغادرت المستشفي برفقه احمد واسماء زوجه الأمين متجهين لمنزل سعيد ..

سعيد : الأمين يا اخوي حقو انت ذاتك تمشي تلحقهم عشان م يقعدو براهم والدنيا ليل و هي مسأله كم ساعه بس وبنحصلكم ان شاءالله

الأمين : اطمن يا اخوي انا ضربت لابوي خليتو يمشي ليهم ما تخاف ..

عدت ساعات الليل ببط شديد علي سعيد ؛ جواهو مليان قلق وخوف علي بتو ؛ وملازمو احساس الذنب وتأنيب الضمير وقال في نفسو ( سامحيني يا ساره انا اهملت في امانتك ذي ما اهملت فيك انا وصلت بتنا للموت ) وفضل سعيد بين وجعو وتأنيب ضميرو لحدي ما قاطعو صوت دكتور مرتضي ..

دكتور مرتضي : صباح الخير يا سعيد وشك مرهق شكلك ما نمت كويس

سعيد : صباح النور يا مرتضي

والله ما حسيت بنفسي ولا قايل الصباح جا بالله عليك ادخل سريع وطمني علي بتي 💔

دكتور مرتضي : حاضر يا سعيد استناني دقايق اراجع الدكتور وبجيك ..

.. في منزل سعيد صحت حاجه امنه من الفجر ذي ما متعوده كل يوم .. صلاه الصبح عندها اهم من باقي اليوم

حاجه امنه : احمد يا ولدي قوم الصلاه

أحمد : انا صاحي يا حبوبه واتوضيت وماشي الجامع

حاجه امنه : ما شاءالله الله يكملك بعقلك ويخليك لابوك ..

احمد : اللهم آمين ويخليك لينا يا حبوبه

اتجه أحمد علي الجامع واتجهت حاجه امنه علي تأديت صلاتها ووردها اليومي ..

أسماء : صباح الخير يا خالتي

حاجه امنه : صباح النور يا بتي صحيتك للصلاه وم صحيتي شوفي الشمس خلاص طلعت وكده ما صاح 😡

أسماء : معليش يا خالتي والله محمد ولدي معذبني عذاب شديد الليل كلو صاحيه معاهو

حاجه امنه : ده م عزر ليك اهتمي بالصلاه دي اكتر من كده

اسماء : حاضر يا امي انا اسفه ما بتتكرر ان شاءالله

حاجه امنه : يلا امشي جهزي لأحمد حاجات المدرسه انا ماشه اعمل الشاي ..

.. جهز أحمد وشرب شاييهو ومشي علي مدرستو ؛ خلي اسماء تنضف في البيت وحاجه امنه قاعده وبالها مشغول

اسماء : مالك يا خالتي سرحانه في شنو

حاجه امنه : سرحانه في موضوع عرس سعيد ولدي بفكر منو الحتكون مناسبه ليهو

اسماء : انتي يا خالتي ما تخليهو يختار براهو

حاجه امنه : 😂 يا بتي انتي سعيد ما عارفاهو هو بالغصب خلي يرضي خلي يختار براهو

اسماء : والله يا خالتي سعيد مسكين بس الجاهو ما هين الله يصلح حالو ان شاءالله

وانتي بتفكري في منو ؟

حاجه امنه : انا بفكر في سميه بت اختي هي عينا علي سعيد من زمان تتذكري كانت ما بتريد ساره عشان سعيد

اسماء : لكن يا خالتي دي متزوجه ومطل ...

حاجه امنه : مالو مطلقه يعني شنو ما هدا سعيد باولادو

اسماء : انا ما قصدي كده بس سبب طلاقها انها مره نقناقه ونكديه كرهت راجلها عيشتو وفضل يستحمل فيها لحدي م فاض بيهو وطلقا سعيد ما اظن بتنفع معاهو

حاجه امنه : يا بتي انا اكبر منك وعارفه الواحده لما تكون عايزه الواحد بتعمل اي شي عشانو طباعا ذاتو بتغيرا غايتو البنات ديل والحب ده بعمل عجائب في البني آدمين

اسماء : 😂 والله يا خالتي عليك جنس امور ؛ غايتو دي رايي لكن في النهايه البتشوفيهو والبشوفو سعيد ..

حاجه امنه : كدي خليهو يجي وان شاءالله يكون موافق بجد ما مشاني ساي ..

... في المستشفي أتأخر دكتور مرتضي علي سعيد وده خلاهو يتوتر شديد وقرر انو يمشي يطمن علي حال مجتبي بدل الانتظار

سعيد : السلام عليكم صباح الخير

مجتبي : وعليكم السلام حبابك يا سعيد صباح النور

سعيد : طمني كيف بقيت هسي

مجبتي : والله الحمد لله كوويس شويه الم بس خفيف وكيف ساره هسي

سعيد : الحمدلله .. ساره لسه والله الدكتور ما طمني عليها لكن ان شاءالله خير ..

وفي اثناء حديثهم دق الباب ودخل دكتور مجاهد

دكتور مجاهد : سلام عليكم كيفك الليله

مجبتي :الحمدلله والله يا دكتور كويس

دكتور مجاهد : انا كنت كايس ليك يا سعيد ومرتضي برضوو

اطمن ساره كوويسه ومع عمها بره هسي في ادويه كتبتها ليها تاخدا لمده اسبوع بانتظام ..

اخيرآ اتررسمت علامات الراحه في وش سعيد وردد الحمدلله الحمدلله شكرا ليك يا دكتور ..

.. حمل سعيد بتو بين ايديهو وحضنها شديد وقال ليها

سامحيني يا بتي قصرت في حقك ربت الامين ع كفتو وقال ليهو

الامين : انت ما قصرت بس ده قدر والمكتوب علي الجبين لازم تشوفو العين . . ارضي وقول الحمدلله جات سليمه

ويلا نمشي علي البيت امي بتكون منتظرانا وقلقانه علي ساره

سعيد : ....

#يتبع

#بقلمي : ولاء الحاج See less