سميه كانت مبسوطه جدآآ بزواجها من سعيد ؛ آخيرآ حلمها اتحقق وبقت مكان ساره ؛
دخلت بيت سعيد وهي خاته في بالها انو بسهوله ممكن تسيطر عليهو وتنسيهو حتي اولادو
حاجه امنه : خشي برجلك اليمين ي بتي ان شاءالله بدايه خير عليكم
سميه : آميييين يا خالتي ووينو سعيد ؟
حاجه امنه : بكون جوه في غرفتو دقيقه اناديهو ليك
سميه : لالا خليك يا خالتي انا حامشي ليهو
حاجه امنه : غايتو بنات الزمن ديل ؛ طيب امشي انا ماشه علي بيتي اشوفكم بخير ..
غادرت حاجه امنه منزل سعيد وجواها مليان بالراحه حاسه انها اخدت القرار الصاح لولدها ؛؛ وبزواجو من سميه ساعدتو يبدأ حياتو من جديد بس هل يا تري دي الحقيقه !!
.. سميه : ممكن ادخل
سعيد : استني عندك انا جاييك بره
اول حاجه حتفهميها في البيت ده انو الغرفه دي ممنوع تدخليها نهائيآ دي غرفتنا انا وساره وبعديها مافي مره بتخشها و ..
سميه حست انو احلامها انهارت من اول دقيقه ليها في بيتها الجديد بس هل ي تري حتستسلم !
قاطعتو بنبره حاده
سميه : ده كلام شنو يا سعيد انا حاقعد وين يعني
سعيد : البيت ده فيهو اربعه غرف ما عدا غرفه أحمد تقدري تقعدي في الغرفه البتريحك ويلا عن اذنك انا تعبان وعندي شغل الصباح عايز انوم
سميه : بس يا سعيد ..
سعيد : تصبحي علي خير
استاءت سميه جدا من موقف سعيد بالرغم من انها مدركه انو ده كان شرطو بس كان عندها امل تغيرو ( مره زيها ما بتعمل معاها كده ؛ سميه جميله جدا وعاجباها روحا شديد وكانت فاكره انو سعيد ممكن يكون زي زوجها السابق بتناسي كل شي عشان جمالها )
غادرت غرفه سعيد وجواها بركاان غضب زاد كميه الشر الناويه عليهو وقالت في نفسها ( انا بتعمل معاي كده يا سعيد طيييب استني علي وبتشوف)
..احمد : صباح الخير يا ابوي
سعيد : صباح النور يا ولدي كنت جايي اصحيك يلا نمشي نصلي الصبح
سميه : صباح الخير عليكم
سعيد : صباح النور انتي صاحيه !
سميه : اكييد اهم حاجه صلاه الصبح
سعيد : ربنا يتقبل منك ان شاءالله نحن ماشين الجامع
سميه : طيب
انا ح اصلي وحاجهز الشاي واللبن لساره ..
غادر سعيد البيت وجواهو بقول (شكلي استعجلت في الحكم علي سميه يمكن هي ما بالسوء ده بس لا يا سعيد يمكن هي بتعمل كده مخصوص عشان تكسبك اصبر وخلي بالك )
