الحصل لسميه خلاها مافي وعيها ؛ بقت مغيبه وما حاسه بالحواليها .. لافه من شارع لشارع بدون مقصد ؛ شارده من واقعها الخلتو بايدها ابشع ما يكون
واثناء ما هي ماشه صادفها ابوها حاج علي
علي : سميه !!
ده شنو يا بتي ؟ ليه طلعتي من بيتك بالمنظر ده وده شنو الدم المالي ملابسك ده ؟!
سميه اول ما شافت ابوها اترعبت وخافت شديد ؛ خافت من اجابات الاسئله السألها ليها وبدون ما تفكر جرت باقصي ما عندها ؛ واثناء ما هي بتحاول تبعد منو حصل ليها حادث مريع وصدمتها عربيه ..
.. في بيت سعيد أحمد بعد المنظر الشافو ما قدر يتمالك اعصابو وفضل يصرخ باعلي صوت عندو لحدي ما اتلمو الجيران ونقلو سوزان علي المستشفي ..
مني : سجم خشمي علي ده مالو ضارب لي 10 مرات !! الحصل شنو يا ربي
حاجه امنه : بكون مشي البيت وما لقي زول عشان كده اتصل يشوفك وين
مني : لالا يا امنه انا قلبي ده من قبيييل مقبوض وما مطمن اكيد في مصيبه
حاجه امنه : غايتو يا مني يا اختي من يومك بتكبري المواضيع 😒 ارجعي ليهو طيب وشوفي الحاصل شنو بدل توتري اعصابك كده
مني : ان شاءالله يكون خير استتتر يااا رب
.. في عياده دكتور عماد آخيرا وبعد انتظار طوييل طلعت نتيجه جزء من الفحوصات
سعيد : طمني يا دكتور ان شاءالله مافي عوجه
دكتور عماد : الحمدلله لحدي الان مافي حاجه
انا بس خايف علي الدماغ لانو استعمال الحبوب المنومه كتير في العمر ده بأثر تأثير سلبي علي الدماغ وحتي علي النمو وبأخر القدره علي الكلام بس انت اطمن وان شاءالله خير ..
عدت دقايق وسعيد متوتر وما عارف يعمل شنو وفكر احسن حاجه يمشي يقعد مع مرتضي .
دكتور مرتضي : طمني يا سعيد عماد ...
صوت جرس التلفون قاطع كلام دكتور مرتضي وطلع الاتصال من المستشفي
الوووووو
المتصل : عايزنك تجي حالا يا دكتور في حاله مستعجله ومحتاجين مساعدتك دكتور مجاهد في غرفه العمليات ودكتور انور ماخد اجازه
مرتضي : خير ان شاءالله وضعها كيف
المتصل : مطعونه في بطنها طعنتين باله حاده وخسرت دم كتير
مرتضي : لا حول ولا قوه الا بالله
اعملو ليها الاسعافات الاوليه وشوفو فصيله الدم وحاولو توفرو وانا جاي حالآ
سعيد : خير يا مرتضي في شنو ؟؟
مرتضي : في حاله حرجه في المستشفي وخسرت دم كتير ومافي دكاتره متوفرين حاليا انا لازم امشي اشوف الحاصل
