(((((مفيش رحمه ٢)))))
#لولو_محمد
الحلقه ١٨
الباب يخبط جامد
رحمه و البنات يسحبوا امل و هى بتعيط لجوه و اميره تفتح الباب عماد و محمد و رحيم يدخلوا
عماد / هو فى ايه
عبير / بيت زباله شويه رمم
عماد / عيب يا عبير انزلى تحت
امينه تلبس عبايتها و تطلعلها
امينه / انتى مين سمحلك اصلا غلطنا لما عزمناكى ياوش الغم يا شلق
.........................
عبير / انا اللى شلق يا بتوع كلو ماشى قولى لاختك البايره انه بعيد عن شنبها و تخلى عندها شويه كرامه بقى اما رميه صحيح
رحمه / يا عبير انتى بتعملى كدا ليه
عبير / انتى بتدافعى عنها فوقى يا رحمه انتى مش شايفه اللى بيحصل
رحمه / كنت بكتبلها عروسه و باظت فسبت عين بس والله مش اكتر
عبير / بطلى هبل لو البتاعه دى مكنتش عرفت توقع مصطفى اغنى من رحيم كان زمانك لقيتى ره على ضهرها بدل مصطفى
امينه / انتى زودتيها اوى
امينه تضرب عبير عماد يشد مراته و ينزلها تحت
زينب / انا بقول الحمد لله انها جت على قد كدا
عماد يطلع تانى
عماد / انا اسف اوى على اللى حصل و انا هيبقى ليا كلام تانى مع مراتى
زينب / لا يا حبيبى مراتك معاها حق مهو لما تلاقى كل واحده كاتبه على ضهرها اسم جوزها او خطيبها و ست امل هانم كاتبه عين كبيره بطول ضهرها يبقى ليها حق تقوم خصوصا يعنى انت فاهم
عماد / لا الحقيقه مش فاهم
زينب / يلا ان الله حليم ستار بقى عن اذنكوا انا نازله مبروك يا امينه
زينب تنزل و محمد يتهبد على اقرب كرسى و اميره تروح تطبطب عليه
رحمه / انا كنت بكتبلها عروسه لما انت رزعت عالباب باظت منى حاولت اظبطها فسبتها ع بس و احنا فاهمين
منه / ايوه انا كنت حاضره و ده اللى حصل
عماد / انا اسف جدا كملوا حفلتكوا اسف بجد يا امينه حقك عليا انا
اميره / متعتزرش يابنى انا لو منها كنت عملت اكتر من كدا عبير بتحبك و بتغير عليك
عماد / لا عبير غلطت عن اذنكوا
رحيم / انا تحت يا رحمه
رحمه / هطمن بس على امل
رحيم يهز راسه و ينزل و ياخد بشرى معاه
محمد / انا مش مكتوبلى اعيش فرحه فى العيله دى لازم حاجه بنت كلب تطلع و تنكد علينا
اميره / معلش احنا كنا فين الحمد لله على كل حال
محمد / الحمد لله
....................
فى اوضه امل
امل قاعده عالسرير مفلوقه عياط رحمه تطبطب عليها
امينه / انا مش فاهمه عبير دى ايه دى زباله اوى
منه / حصل خير هى فهمت غلط متزعليش يا امل
امل تهز راسها
رحمه / انسى و قومى نرقص احنا احسن انها مشيت هى اصلا واخده جنب لوحدها بعيد عننا قومى نفرح احنا دا فرح اختك
امل تمسح دموعها و متردش امينه تحضنها
امل / هو انا المفروض اعمل ايه عشان الناس ترتاح يعنى
رحمه / متعمليش بصى اصل كل واحد و له دماغه روحى يا امينه شغلى الاغانى و عليها عالاخر
امينه / معاكى حق خليها تتحرق تحت فاكره نفسها بوظت ليلتى دا بعينها
امينه تطلع بره
منه / قومى يا امل هى عبير كدا متعرفيش كانت بتعمل فى رحمه ايه
امل / مخلاص رحمه دلوقت بقت حبيبتها و احنا التتار جايين نخطف رجالتكوا شوفتى لما قالت لامينه لو مكنش مصطفى اغنى
رحمه / ربنا يهدى
امل / قال يعنى امينه هى اللى جريت ورا مصطفى و لا حتى كلمته
منه / عارفين يا امل والله خلاص كلام فى ساعه شيطان و اتنسى بقى متحطيش فى دماغك
صوت اغنيه كايده العزال تشتغل بره
منه / دى امينه نوياهالها النهرده
رحمه / والله انا خايفه تطلع تجيبنا كلنا من شعرنا
امل / طب تطلع والله المرادى مسكتلها
امينه تدخل و هى بترقص و تشاور على نفسها و تقوم اختها تحضنها
..................
فى شقه عماد
عبير / انت ازاى تطلع تعتزر المفروض تكرشها مالبيت
عماد / ليه عملت ايه
عبير / انت هتجننى هو انا هخلص من منه تطلعلى امل هو انا ربنا مش هيتوب عليا مالهم ده
عماد / فوقى يا عبير انا مش عيل و لا برياله
عبير / زى مجابت ابوك بكره تجيبك يا سيد الرجاله
عماد / و انتى هتروحى فين
عبير / انت مشوفتش دى كاتبه ع بطول ضهرها دى كان فاضل تكتبها صريحه عماد عماد
عماد / مقالولك ع عروسه زى بشرى
عبير / و انت صدقت ليه داقه عصافير
عماد / اعملك ايه يعنى الكل غلطك كلهم شهدوا منه و رحمه كلهم و بعدين ايه اللى قولتيه لامينه ده و قدام منه امينه لو مكنتش وقعت مصطفى كانت وقعت رحيم ايه الخيال الواسع ده
عبير / امال تفسر بايه انها كانت مبلطه عندها طول الوقت
عماد / صبرنى يارب عادى فيها ايه
الاغانى تشتغل
عبير / شايف قال كايده العزال قال
عماد يعوج راسه و يبصلها
عبير / انا داخله اتفرج عالتليفزيون انا الغلطانه اصلا انى بدخل شقه ناس زى دول انتوا كمان حاجه غريبه اوى ان كنت انت و لا اخوك و كانكوا فرحتوا اوى ان ابوك اتجوز
عماد / قصدك ايه
عبير/ يعنى المفروض تاخدوا موقف منه دى امكوا برضه
عماد / و هو ابونا و دى حياته احنا مش واصيين عليه و بعدين حق امنا محفوظ و بيتهيالى انتى شوفتى كويس ماما بتتعامل ازاى
عبير / شوفتها و هى بتطلق بسبب الست دى
عماد / لا هى اطلقت لسبب تانى و انتى عرفاها
عبير / انا مالى براحتك انا الغلطانه اصلا مالاول
عماد / طب متكرريش الغلط تانى بقى لو سمحتى
عبير تبصله و تجز على سنانها و تدخل و عماد يفتح الباب و ينزل لرحيم
...........................
فى الفرح تانى يوم
عبير قاعده جنب زينب و امينه بترقص مع مصطفى و الكل حواليها فرحانين اميره تروح لزينب
اميره / منورين
اميره تقعد
زينب / تعيشى انما ايه الجمال ده الكوافير عامل شغل
اميره / و لا شوفته دى امل ربنا يباركلها هى اللى زوقتنى
زينب / انا بتكلم عن امينه طالعه حلوه
اميره/ و ماله مهى طالعه لامها انا هقوم بقى الفرح فرحكوا انبسطوا لولولولولولولولولى
عبير / انتى هتفضلى سكتالها كدا كتير
زينب / مكفايه اللى عملتيه انتى
عبير / والله لو عليا كنت عملت اكتر بس هما اللى حاشونى شوفى رحمه مبسوطه ازاى تقوليش فرحها طب منه ماشى فرح اخوها ولا رحيم و لا كانها بنت مرات ابوه
زينب / امال عماد فين
عبير / عماد على باب القاعه بيستقبل الناس تقوليش فرح بنته
زينب / اهدى الناس هتاخد بالها و بعدين متخافيش لو كان فيها الخير مكان رماها الطير
عبير/ اكفى القدره على فمها تطلع البت لامها و امها عرفت توقع الراجل البت مش هتعرف توقع ابنه
زينب / لا ولا هى و لا امها سبيها بس يومين و هى هتطير لوحدها
عبير / اهو هدوئك ده اللى منرفزنى زياده
زينب / اولعى انا نقصاكى
عبير تبصلها و تلف الناحيه التانيه
.....................
على باب القاعه
عماد واقف مع محمد رحيم يقف معاهم
عماد/ والله الواحد حاسس ان البت صعبانه عليه
رحيم / هههههههههههههه يا عم هو مصطفى وحش اوى كدا
عماد / هههههههههههههههه انا مكنتش متخيل انى هعيش للحظه دى
رحيم / هههههههههههههه
امل تدخل
امل / رحيم ممكن ثانيه
رحيم / اه طبعا اوى
رحيم يروح معاها و عماد واقف يبص عليهم و يبص لابوه
عماد / عن اذنك
.....................
قدام القاعه
امل و رحيم يطلعوا هشام يقابلهم
هشام / و دا البودى جارد مثلا
امل / دا اخويا لو عاوز تقول اى حاجه قولهاله دا طليقى يا رحيم
هشام / امل انا مش جاى اللعب
رحيم / قالتلك تكلمنى
هشام / هو مش انت برده اخو عماد مش ده اخو عماد
عماد يدخل
عماد / انت ايه اللى جابك
هشام / انا جاى اتكلم مع مراتى انت متدخلش ماشى
رحيم يضربه بالدماغ
رحيم / لما تكلم الاكبر منك تتكلم بادب اطلعى يا امل لو سمحتى
هشام يقوم
هشام / قدامك حل من تلاته يا امل يا تنادى مامتك اكلمها اطلب ايدك يا توفرى علينا وقت و تيجى معايا ياما همشى و عمرى مهرجع تانى
رحيم / بسم الله الرحمن الرحيم الاجابه تلاته يلا يا ابن الكلب من هنا بدل مفلقك
عماد يبص لامل و هشام يبصلها
امل/ اخويا رد عليك امشى و مترجعش تانى
هشام / ماشى همشى بس افتكريها
هشام يمشى و عماد مبتسم امل تبصله و تروح تزقه و تطلع
عماد / انا مالى انا
رحيم واقف يدحك
رحيم / جوايا احساس قوى اوى ان البت دى لسه بتحبك
عماد / تبقى هبله
رحيم / انا بقول كدا برضه انا طالع بالاذن
رحيم يطلع و عماد يفضل واقف تحت
............................
فى القاعه امل قاعده على ترابيزه فاضيه عماد يروح يقعد جنبها و يديها ورقه
امل / ايه دى
عماد / شوفى بنفسك
امل تبص فيها
امل / عارفه
عماد / كنتى عارفه انه بياخد من اخوكى فلوس على حسك
امل / اه كنت عارفه و فى حاجات كتر متعرفهاش عاوز ايه يعنى
عماد / و ايه اللى جبرك
امل / مكنش عندى مكان تانى اروحه
عماد / افندم
امل / انت عارف انا اتجوزت ليه انت مش قادر تربط الاحداث صح عن اذنك
امل تيجى تقوم يشدها يقعدها
عماد / لا بجد عاوز افهم
امل / باختصار وقتها انت جيت مع عبير عالبيت فى اسكندريه فى شهر العسل قولت زى مانت اتجوزت انا هتجوز و هربت و مقدرتش ارجع
عماد / يخربيت سنينك انتى بتتكلم جد انتى اتجوزتى عند فيا انتى اتهبلتى
امل / اللى حصل
عماد / و لما طلع ابن كلب مخليتهوش يطلقك ليه
امل / و اروح فين لما اطلق ارجع البيت عند امى طب بانهى وش و لا بلاش ارجعلها و اشوفك انت و عبير كل شويه جايين تتفسحوا قدامى
عماد حاطت ايده على بقه و مش مستوعب
امل / انا اللى عزمته عالفرح
عماد / صبرنى يارب بتتكلمى جد
امل / كلمته امبارح و قولتله يجى ياخدنى مكنتش طايقه البيت و لا عاوزه اقعد فيه ثانيه بعد اللى حصل بس لما جه و شوفته من بعيد قولت انا مش هكرر نفس الغلط تانى مش هعاقب نفسى عشان ابعد عن ناس متستاهلش
عماد / جدعه
امل / اه جدعه غاصب عنك
عماد يبتسم و امل تبصله عبير تيجى تقعد جنب عماد
عبير / يارب مكونش قاطعت كلام مهم
عماد / لا يا حبيبتى اقعدى
عبير / مش يلا نتصور مع العروسه بقى و لا ايه
عماد / يلا
التلاته يقوموا يروحوا للكوشه امينه و مصطفى قاعدين و اميره قاعده جنبهم و محمد واقف وراها و ابراهيم ورا مصطفى و جنبه رحمه جنبها رحيم جنبه حسام و بعدين منه و الناحيه التانيه زينب واقفه جنب محمد و عبير جنبها عماد يروح يقف جنبها و امل تروح تقف جنب منه المصور يطلب منها تروح تقف جنب عماد و المصور ياخد الصوره و عبير بتبص لامل على يمين عماد
.......................
تانى يوم فى شقه رحيم
رحيم / دانت طلعت جامد على كدا
عماد / و النبى تنقطنى بسكاتك انا منمتش من امبارح
رحيم / هههههههههه ايه اللى مسهرك ندمان عالموهبه اللى اندفنت و لا بتعد فى عدد الضحايا اللى ممكن تكون دمرتهم
عماد / على فكره امل اوفر اوى ايه يعنى متلتربع اللى كنت اعرفهم اتجوزوا و معاهم عيال مراحوش رموا نفسهم لاول واحد متخلف قابلهم
رحيم / بس انا لسه عند كلمتى هى لسه بتحبك
عماد / فوق يا اهبل دى لا بتحبنى و لا عمرها حبتنى هى تعرفنى منين يعنى ايه هو سلق بيض حبتنى فى اسبوعين شافت منى ايه هى عشان تحبنى كام فسحه كام دحكه و كام بصه بتسبيله هى رسمتلى صوره فى خيالها العيالى و صدقتها مش اكتر و بكره لما هتعرفنى اكتر
رحيم / هتحبك اكتر
عماد / انا غلطان انى بكلمك انا طالع
رحيم / اقعد انا بتكلم جد انت بتعاملها حلو جدا و الكل واخد باله
عماد / انت عارف ظروفها و مش هبقى انا و الدنيا عليها
رحيم / صدقنى طول مانت بتعاملها بحنيه اوى كدا و هزار و دلع و مديها وش هتديها امل فيك على فكره
عماد / تفتكر طب اعمل ايه بس منغير مجرحها
رحيم / حسسها ان عبير دى محصلتش و اتغزل فيها بهبل قدامها خليها فهمها بالزوق كدا انك بتموت فى مراتك و انك فى منتهى السعاده معاها بس سهله
عماد / فكره كويسه
..........................
فى المعرض تانى يوم
عماد قاعد فى المكتب و معاه ناس يسلموا عليه و يمشوا امل تدخل عماد يقوم يطلع بره و مقفوله هى تقعد عالكومبيوتر و شويه و يدخل تانى ياخد دفتر الحسابات و يكتب فيه
امل / ايه رايك فى الصور مش كدا احلى
عماد منغير ميرفع راسه / حلوه
امل / انت عارف ان عبير اللى علمتنى اعمل الصور كدا
عماد يرفع راسه و يبص / عبير فنانه فى الحاجات دى انتى مشوفتيش شغلها
امل / اكيد الا صحيح لو ليا حق يعنى هو انت مش هتحكيلى ايه اللى خلاك تقرر تتوب و تتجوز
عماد / هههههههههههههههههه انتى مش شايفه عبير و لا ايه دى
امل / بغض النظر انها حلوه بس اكيد انت قابلت بنات كتير حلوين فى حياتك يعنى اشمعن عبير
عماد / عشان جدعه رحمه حصلت معاها حادثه فى مشروع فى الكليه و كان لازم تعيده كله و سهرت عندنا يومين بتساعدها بدون اى مقابل بس قولت اكيد مش هلاقى واحده جدعه كدا روحت اتقدمتلها قبل متطير منى
امل / لا فى دى انا اشهد دى مبتتاخرش ابدا عن الطلبه بتوعها
عماد/ بجد و انتى مين اللى قالك
امل / محدش فاكر لما كنت نسيت المفاتح و فضلت عندكوا لحد مانت جيت
عماد / اه
امل / يوميها كان بيجيلها مكالمات كتير و لما سالتها مين ده قالتلى دا طالب
عماد / هى بتهتم بشغلها اوى
امل / واضح ربنا يوفقها
عماد / السنه اللى فاتت كان فى بنت اسمها ساره دى بقت معيده السنادى عبير بتحبها مووووت مقولكيش بيرغوا مع بعض عالفيس تقوليش اتنين صحاب
امل / كانت مسجلاها عالموبايل برده دكتوره ساره
عماد / معرفش اشمعن
امل / اصل السنادى اكيد الاول طارق مهو اللى اتصل بيها كانت مسجلاه دكتور طارق
عماد / تانى كدا
امل / فى ايه
عماد / كانت مسجلاه ايه
امل / د طارق دكتور طارق مش د يعنى دكتور و لا دى اختصار اسم حد مهو لو مكانتش قالت طالب كنت قولت اختصار دلال مثلا بس معرفش ولاد بحرف ال د
عماد يسيبها ويقوم
امل / انت رايح فين استنى
................
فى شقه عماد
الباب يفتح و عماد يدخل يدور يمين و شمال يلاقى عبير فى المطبخ
عبير / انت جيت بدرى ليه مفيش شغل ولا ايه نصايه و احضر الغدى
عماد / فين موبايلك
عبير / ليه خير
عماد / فين موبايلك يا عبير
عبير / فى الشاحن جنب السرير
عماد يسيبها و يجرى ياخد الموبايل و يفتحه يقلب فى الاسماء يلاقى د طارق يتصل و عبير واقفه قدامه
طارق / الو ايوه يا عبير ازيك اخيرا افتكرتينى انا بس مش عارف ايه اللى خلاكى تقطعى معايا فجاه كدا و تطلبى انى مكلمكيش تانى
عماد يبصلها
طارق / الو ايوه يا عبير محمود جراله حاجه الو الو
عماد يقفل السكه التليفون يرن فى ايده د طارق عماد يحدف الموبايل على اخر دراعه و هو بيصرخ
عبير / فى ايه يا عماد مالك انت كنت بتكلم مين
عماد يصرخ فيها / انتى بتقرطسينى انتى تقرطسينى انا
عبير تجرى من وشه و تدخل اوضه محمود و تقفل الباب بالفتاح و عماد وراها بيزعق
عماد / لا و انا الاهبل سايبك كل شويه رايحاله بالواد
عماد يكسر الباب عليها يلاقيها حاضنه محمود و هو بيصرخ
عماد / انتى تعملى معايا انا كدا
عبير / انت فاهم غلط انا معملتش حاجه غلط
الباب يخبط بره جامد عبير تصرخ و محمود بيصرخ
رحيم / افتح يا عماد
عماد / خليك فى حالك انت واحد و مراته محدش يدخل
عماد يشد عبير من ايدها يدخلها اوضته و هى بتصرخ و يقفل الباب عليهم و يقعدها عالسرير
عبير / والله يا عماد انت فاهم غلط انا معملتش حاجه
عماد يروح يجيب الموبايل و يفتح السجل و يدور فيه
عماد / انا هخلى ده معايا بس والله العظيم يا عبير لو طلع اللى فدماغى صح والله لخليكى تتمنى انى اقتلك او حتى اضربك عن اللى هتشوفيه على ايدى
عماد ياخد الموبايل و يقفل عليها الباب بالمفتاح و ياخد محمود يديه لرحمه
رحمه / فى ايه
عماد / انا رايح مشوار صغير و جاى لو ايه باللذى حصل محدش يفتحلها ماشى
رحيم/ هو ايه بس اللى حصل لكل ده انت يابنى استنى
عماد ينزل يجرى و رحيم بيجرى وراه
رحمه / هو ايه اللى حصل يا امل
امل / معرفش احنا كنا بنتكلم عن عبير و انها جدعه و اللى بتعمله مع الطلبه و فجاه قام هاج كدا و زى مشوفتى لما لقيته بيزعق خبطت عليكوا
رحمه /تعالى
امينه تنزل من فوق تدخل وراهم جوه عبير بتخبط عالباب جوه
عبير /افتحولى حد يفتحلى حد يطلب ماما ارجوكوا حد يفتحى
امينه / هو فى ايه
امل تروح تجيب مفتاح من باب تانى
امل / عندنا كل البيبان بيفتحوا بنفس المفتاح
امينه / طب هاتى اما افتحلها
امل / لا عماد قال محدش يفتح
عبير / امينه ابوس ايدك افتحيلى عماد اتجن و هيقتلنى انا معملتش حاجه
امل / عماد فعلا شكله اتجن احنا لازم نخرجها من هنا
امينه / انا هفتحلها
امل / لا انا هنادى لطنط زينب تفتح عماد عمره مهيهب فامه و بعدين انا و انتى مينفعش نفتحلها احنا محدش هيقفلنا قدام عماد لو اتنرفز علينا انا هنزل لطنط
.........................
