(((((((مفيش رحمه ٢)))))))
#لولو_محمد
الحلقه التاسعه
عبير / خليها تنفعه
زينب / متقولى حاجه يا هاله
هاله / غلبت معاها والله اعمل ايه بس
عبير / الحاله الوحيده اللى هقبل فيها انى ارجع ان حمايا يجى يراضينى و لا هو شاطر بس يزعقلى
زينب / يا هبله يا عبيطه مين ده اللى هيجى يراضيكى الغربال الجديد له شده يا خايبه
عبير / و شدته طيرتك
زينب / لا و انتى الصادقه انا اللى هطيرهم كلهم و لا هى و لا بناتها و لا اللى خلفوهم يقدروا عليا و بكره ان مجاش عمك يبوس رجلى عشان ارجع و انا اللى مرضاش مبقاش انا زينب
……………………
عبير / دى حاجه تخصكوا انا تعبت من مشاكلكوا و قولت اللى عندى
زينب / انتى كدا بتخربى بيتك بايدك
هاله / طب بصى يا ست زينب اديها بس يومين تاخد و تدى مع نفسها و الامور فى البيت كمان عندكوا تهدى و نشوف
زينب / يا هاله افهمى كل لحظه عبير بتبعد فيها امل بتبت رجلها
عبير / هو انا اخلص من منه تطلعلى امل هو انا هفضل فى الغلب ده طول عمرى
زينب / قدرك يا حبيبتى محدش غصبك عليه مالاول مانتى كنتى فرحانه انه ساب بنات الدنيا كلها و اختارك حافظى عليه بقى ياختى
عبير / اعتبريها تجربه و بتعلم منها
زينب / لا دى اتجننت خلاص انا ماشيه يا هاله عقلى بنتك
هاله / طب استنى بس يا زينب
زينب تمشى و ترزع الباب وراها
هاله / حد يعمل كدا
عبير / انتى هتجننينى يا ماما ارجع فين هو بالساهل كدا عشان بعد كدا يدونى بالجزم
هاله / خلاص اعملى اللى انتى عوزاه بس مترجعيش تعيطيلى
عبير / كلمى خالو و قوليله اننا عاوزين نيجى كام يوم المحله
هاله / مبلاش تدخلى خالك فى الكلام ده هيقلبها نكد
عبير / ممكن تخلينى انا اتصرف انا عارفه انا بعمل ايه كويس
هاله / صبرنى يارب
...........................
فى شقه طارق
طارق يدخل اوضته يلاقى مراته نايمه عالسرير و بتعيط يدخل يجرى جنبها و يحضنها من ضهرها
طارق / فى حاجه بتوجعك خدتى دواكى
مراته تمسح دموعها و تهز راسها اه
طارق / مالك يا ايناس فيكى حاجه بتعيطى ليه
ايناس / لا يا حبيبى متشغلش بالك انا كويسه الحمد لله
طارق / امال بتعيطى ليه بس
ايناس/ مفيش متشغلش بالك مش جعان اعملك حاجه تشربها اى حاجه
طارق / لا يا حبيبتى ارتاحى انتى انا مش ناقصنى حاجه
ايناس / يارب دايما
طارق / انتى زعلانه عشان رجعتى للكيماوى تانى
ايناس / لا يا حبيبى عادى بجمله
طارق / بكره هتبقى احسن ان شاء الله انا عندى امل كبير فى ربنا على فكره
ايناس / و نعم بالله يا حبيبى ملناش غيره ملناش غيره
طارق / انا بحبك اوى يا نوسه عشان خاطرى متعيطيش تانى
ايناس / حقك عليا يا حبيبى حقك عليا
.......................
بعد فتره فى بيت محمد
محمد نايم عالسرير على ضهره و اميره نايمه فى حضنه و هو سرحان
اميره / بتفكر فيها
محمد / مين زينب اكيد لا طبعا
اميره / مش هزعل على فكره دى مهما كانت ام عيالك و عشره عمر
محمد / اه كنت بفكر فيها يا ترى اللى عملته معاها صح و لا غلط يا ترى انا ظلمتها و لا هى اللى ظلمتنى مش عارف انا معدتش عارف حاجه
اميره / مفيش حد مبيغلطش و هى يعنى مهما عملت هتفضل ام اولادك و اكيد شوفت معاها مواقف حلوه تشفعلها
محمد / دى كانت السبب فى موت امى تشفعلها ايه بس ياريتنى كنت طلقتها من زمان يمكن امى ساعتها كان زمانها عايشه
اميره / لا يا محمد كانت هتموت برده فنفس الوقت و فنفس اللحظه و يمكن ساعتها كانت تموت و هى بتتخانق معاك انت دى كلها اقدار
محمد / معاكى حق بس هى حولت حياتنا جحيم انتى اصلك مشوفتيش هى كانت بتعمل ايه
اميره / شالتك و شالت عيالك سنين صانت بيتك و عرضك قضت شبابها و صحتها جنبك بيتهيالى مش هتبقى دى اخره المتمه
محمد / انتى ليه بتعملى كدا انتى بجد عوزانى اروح اراضيها و اردها انتى بتحاولى تقنعينى انها كويسه ازاى
اميره / انا شوفت اللى محدش شافه عشت حياتى دنيا تشلنى و دنيا تحطنى بنام عالمخده و انا مش عارفه انا هصحى على ايه و بكره لما تعاشرنى اكتر هتعرف عيوبى و تشوف الوحش اللى فيا و يعالم هتستحملنى و لا هترمينى و انا معدتش حمل راميه تالته يا محمد لا انا و لا البنات كفايه اللى هما فيه
محمد / انتى عارفه الفرق بينك و بينها انك عاوزه تعيشى انك بتراعى ربنا فيا و بتقدرى تعبى بلاقى جنبك الهدوء و الراحه اللى ملقتهمش جنبها سنين
اميره / الغربال الجديد له شده بس هى كمان كانت بتسمع منك اجمل كلام العشق فى الاول صح
محمد / منكرش انى حبتها و منكرش انى لسه بحبها بس فى جوايا شرخ كبير اوى من ناحيتها شرخ مش عارف اداريه حتى
اميره / و فاكر انى انا اللى هملا الشرخ ده اتلم المتعوس على خايب الرجا
محمد / هههههههههههههههه
اميره / روح يا محمد راضيها عشان خاطرى على الاقل عشان خاطر عيالك
محمد / هو انتى ممكن تعمليلى عزومه
اميره / ههههههههههههههه ايه العسل ده
محمد / ايه
اميره / فى العادى بيتقالى انا عازم ناس بس طريقتك و انت بتقولها تخلينى لو هموت مالتعب اقوم و اعملك الف عزومه
محمد / هههههههههههه كتر خيرك يا ستى بس هى عزومه واحده كبيره شويه عاوز اللم عيلتى حوليا
اميره / من عينى شوف امتى و انا انزل السوق اظبطلك كل حاجه
محمد / تعيشى يا غاليا هى امل بطلت تروح الحضانه
اميره / اه قعدتها فى البيت
محمد / هى عامله ايه دلوقت
اميره / على حطه ايدك قافله على روحها الباب و مبتنطقش بتاكل بالمحايله
محمد / خدى بالك منها يا اميره مش ناقصين مش كل مره تسلم الجره
اميره / هى بس لو تتكلم لو تقولى بتعمل فى نفسها كدا ليه طب انا زمان كان غصب عنى فى كل جوازه ليا كان بيبقى غصب عنى هى بتعمل كدا ليه
محمد / بتدور على الحب يا اميره هى لا فارق معاها لا اكل و لا شرب و لا لبس هى عاوزه تحس ان فى حد بيحبها
اميره / و مين فينا مش محتاج يحس ان فى حد بيحبه
محمد / على رايك
..........................
فى شقه عبير
عماد / متستهدى بالله يا عبير بقى حرام عليكى انا هفضل رايح جاى لحد امتى
عبير / متجيش يا عماد هو انا ضربتك على ايدك تيجى
عماد يتنهد / انا مش هقدر اقول لابويا يجى يعتزر و يا ستى اعتبريه ابوكى و زعقلك
عبير / الله يرحمه عمره مرفع حسه عليا
عماد / الله يرحمه انتى شايفه الظروف متبقيش انتى و الزمن عليا
عبير / انت جاى ليه يا عماد
عماد / جاى اراضيكى عاوزك ترجعى معايا
عبير / انا و لا محمود
عماد / انتى بتقولى ايه يا عبير
عبير / عاوزنى انا و لا محمود
عماد / هو انا ينفع اختار بينكوا يا عبير متستهدى بالله بقى و اغزى الشيطان
عبير / اسمع يا عماد انا مش هخلص من منه تطلعلى امل
عماد / و لا منه و لا امل و لا غيرها انا عايش عشانك انتى و ابنى و بس شيلى بقى الهبل ده من دماغك و بعدين منه مخطوبه و كلها كام شهر و تتجوز و امل دى ظروفها مختلفه
عبير / اوعى تكون فاكرنى مش عارفه امل دى كانت بالنسبالك ايه
عماد / كانت ايه يا عبير قوليلى كانت ايه
عبير / مكنتش بتحبها زمان
عماد / لا محصلش محبتهاش للحظه عاوزه تعرفى امل كانت بالنسبالى ايه ماشى هقولك هحكيلك ذكرى فى حياتى مش فخور بيها نهائى امل دى كانت عيله جميله بشوفها مره فى السنه فى المصيف بس اول معربيتنا بتركن و انزل منها برفع راسى الاقيها بصالى مالبلكونه و دحكتها معبيه وشها و اول مطلع مالاسانسير الاقى بابهم مفتوح و هى مبتسمه و كانها طايره مالفرح سنه التانيه التالته كانت كبرت و احلوت قولت وماله كلمتها هما اسبوعين المصيف لا قولتلها بحبك و لا حتى وعدتها بالجواز ارتاحتى
عبير / يا سلام
عماد / قسما برب العزه و غلاوه محمود عندى اللى مفى فى الدنيا اغلى منه عندى مقولت كلمه بحبك دى لحد قبلك و بعدين لو هتتقمصى عشان كل واحده عرفتها قبلك فانتى هتتقمصى كتير اوى لانى عرفت كتير و اللى حصل بينى و بين امل حصل الالعن منه مع الف غيرها
عبير / مش مصدقاك
عماد / طب احلفلك بايه يابنتى والله كانت طيارى خالص اخرنا نتمشى سوا او نتكلم فى التليفون دا حتى مسك ايدين ممسكتش الشهاده لله مسمحتليش اللمس شعره حتى و لما رجعنا السنه اللى بعدها مردتش عليها حتى السلام و طول مانا فى مصر لا كنت بكلمها و لا برد على تليفوناتها لانها خلاص كانت اتنست اساسا و جه غيرها و غيرها كمان
عبير / بس انا اتهانت
عماد / حقك عليا شوفى انا جبتلك ايه والله حطيت فيه كل الفلوس اللى كانت معايا
عماد يطلع من جيبه خاتم حلو اوى و شكله غالى
عماد / انا جاى اراضيكى اهو اعمل ايه تانى طيب عشان ترجعى معايا
عبير تاخد الخاتم و تلبسه
عماد / هاه هتعملى ايه
عبير / طب بص سبنى بس يومين كمان اهدى و انا هرجع لوحدى
عماد / اللى يريحك هو محمود لسه نايم
عبير / اه نايم استحمى و نام قبل متيجى
عماد/ طب ممكن ادخل ابص عليه من بعيد بس مش هصحيه والله
عبير / معلش يا عماد انت عارف الجو حر و ماما نايمه جنبه وواخده راحتها لما اروح ابقى شوفه و اللعب معاه براحتك
عماد / ماشى يا عبير اللى يريحك عن اذنك
عبير/ سلام
.................
فى شقه رحيم
رحمه طالعه ترمى كيس الزباله فى الباسكت عالسلم امينه طالعه عالسلم
رحمه / ازيك يا امينه
امينه / نعم
رحمه / بقولك ازيك
امينه / الحمد لله خير
رحمه / انتى زعلانه منى و لا ايه
امينه / بصى يا رحمه انا مش هبله زى امى و اختى لا و لا حتى بنص طيبتهم يعنى مبنساش الوحش زى مانا مبنساش الحلو
رحمه / والله كان غصب عنى
امينه / و ايه اللى جد ان شاء الله
رحمه / عرفت انى غلطانه و براضيكى اهو
امينه / والله غلطانه على ايه ان شاء الله انى اقف على بابك و اخبط و متفتحليش و لا غلطانه على الكلام اللى قولتيه فى حق امى و سمعتها
رحمه / انا مقولتش اكتر ماللى اتقالى و سمعته
امينه / طب ياريت يا ست رحمه قبل متقولى كلام عالناس تبقى تتاكدى عشان متجرحيش ناس كانوا فاكرينك اختهم عن اذنك
امينه تطلع و رحمه واقفه تبص عليها
......................
فى الكليه
رحمه / انتى بتعملى كدا ليه يا عبير
عبير / بعمل ايه يا رحمه انا اتهزقت
رحمه / انتى بتكلمينى انا عن التهزيق انا انضربت قدامك و مسبتش بيتى للحظه
عبير / عشان جوزك مكنش موجود و كمان كنتى عارفه انه لما هيرجع هيجيبلك حقك لكن انا عماد كان واقف
رحمه / عماد هيتجنن عالواد و عليكى طبعا حرام عليكى يا بنتى
عبير / حرام عليا انا و بعدين انا ممنعتوش يشوف الواد مهو عارف مكانه
رحمه / يا شيخه
عبير / بصى يا رحمه انا عارفه انكوا كلكوا زعلانين منى واضحه اوى رحيم مبيكلمنيش حتى و لا بيرضى يرد السلام
رحمه / رحيم زعلان عشان انتى مانعه محمود عن عماد مش اكتر
عبير / انتوا ليه متخيلين انى منعاهم عن بعض والله هى بس الظروف بتيجى كدا هعمل ايه يعنى و بعدين انا قولت لعماد اخر مره انى هرجع بس ههدى بس عشان اعرف اكمل
رحمه / خلاص اللى تشوفيه طب والله لولا اننا معزومين عند طنط اميره بكره كنت جيتلك انا و عماد و اشوف بقى التلاكيك بتاعتك حقيقه و لا بتقولى كدا و خلاص
عبير / تنوروا فى اى وقت يا حبيبتى
.......................
يوم العزومه
امل و امينه و اميره بيرصوا السفره جرس الباب يضرب امل تروح تفتح تلاقى عماد
عماد / ازيك
امل تسيب الباب مفتوح و تدخل جوه و متردش عماد يدخل يقفل الباب
اميره / ازيك يا حبيبى تعال
عماد / هو انا جيت بدرى و لا ايه
محمد يطلع من جوه
محمد / لا انت الوحيد اللى جيت فى معادك بالشعره
جرس الباب يضرب امل تروح تفتح عماد يسبقها يطلع رحيم و رحمه و بشرى و ادم عماد يشيل من رحمه ادم
رحمه / ازيك يا عموا انا هدخل اساعدهم جوه
محمد / خشى
رحيم / ايه انتوا مش قولتوا ان ماما معزومه
محمد / و حتى عمك ابراهيم وولاده معزومين
عماد / دى ليله بقى
..................
فى المطبخ
رحمه / انا اسفه يا امينه
امينه / شايفه الست اللى هناك دى روحى اعتزريلها انا مقولتلهاش انتى قولتى عنها ايه روحى و قوليلها انا قولت عليكى كذا و لو سامحتك يا رحمه هسامحك
رحمه تبصلها ثوانى امينه تلف و تكمل غرف تبص الناحيه التانيه تلاقى امل من بعيد بتبص عليها تروح لاميره و تخبط على كتفها اميره تلف
رحمه / انا اسفه انى اتكلمت عليكى من ورا ضهرك انا قولت انك كنتى بترمى نفسك على بابا الله يرحمه عشان ماما مكنتش بتخلف و كنتى بتستخدمى امل عشان يعنى انا اسفه
اميره تبتسم / الله يرحمها قالتلى كدا يوم مجيت عندكوا مصر يلا الله يرحمها ستك مكنتش تعرف ان زينب عزمانى
رحمه تبصلها
اميره / انا عمرى مرميت نفسى على ابوكى انا كنت عيله سبعتاشر سنه و هو مكنش عنده عيال فكنت بتعامل معاه كانه اب ليا و كنت فعلا بخليه يلاعب امل كتير بس عشان هو مكنش عنده عيال فكنت فاكره انى بكده بسعده مش اكتر و لانى كنت وحيده فمصدقت ان حد عزمنى فجيت جرى بس جدتك الله يرحمها قالتلى انهم مش مرحبين بيا وسطيهم فرجعت فيوميها و مكررتهاش تانى
رحمه / انا اسفه
اميره / ولا يهمك خدى طبق الفراخ ده حطيه عالسفره بره و ابتسمى كلنا بنعيش مره متضيعيش وقتك فمين قال و مين عاد محدش هيبطل كلام
رحمه تاخد الطبق و تروح تقف جنب امينه امينه تبصلها و تهز راسها و تبتسم رحمه تروح تحط الطبق على السفره الباب يخبط رحمه تروح تفتح تلاقى ابراهيم و منه و مصطفى و زينب محمد يقوم جرى يسلم على ابراهيم و منه تحضن رحمه و رحيم و عماد يقوموا يسلموا على مصطفى
محمد / امال سمير فين
منه / كان مرتب مع صحابه على خروجه و احرج يعتزر عشان هيزعلوا
محمد / مليش فيه لازم يعوضهالى
منه / باذن الله
منه تبص لعماد
منه / ايه هى عبير لسه زعلانه
عماد يتنهد و يهز راسه
منه / طب و محمود
عماد / مشوفتوش من يوم مغضبت و كل مروح تقولى مستحمى و نايم و ماما نايمه جنبه وواخده راحتها ماما خدته و خرجت مع ماما فى المحله المهم انى مشوفوش و خلاص
منه / ربنا يهديها
عماد / اخبار سمير ايه سمعت انكوا هتكتبوا الكتاب قريب
منه / هو مستعجل اوى مش عارفه على ايه
عماد / ليه حق
منه تبص الناحيه التانيه تلاقى امل واقفه تبص عليهم امل تدخل تجرى على جوه
منه / عن اذنك هدخل اساعدهم
عماد / اتفضلى
على السفره محمد قاعد على راس السفره و على يمينه ابراهيم و جنبه مصطفى و عماد عالراس الناحيه التانيه جنبه زينب و رحيم و اميره واقفه هى و امل بيوزعوا المنابات و بيشرفوا عالاكل
ابراهيم / يدوم العز يا محمد تسلم ايدك يا ام امل
اميره / الف هنا
زينب / بس ايه سر الرشه الجريئه دى
محمد / احنا المفروض كل اللى ليهم راى او كلمه فى العيله دى على سفره واحده دا لو اعتبرنا ان البنات ملهمش كلمه يعنى
ابراهيم / مالاخر كدا يا زينب انتى اختى الصغيره و محمد اخويا الصغير و اللى حصل بينكوا كان شيطان و عاوزين نرجع الميه لمجاريها
زينب / ميه ايه و مجارى ايه يا ابراهيم احنا بناكل متسدش نفسى عن الاكل بقى
عماد بيحاول يصلح / هههههههههههههه عسل يا ماما عسل هو يعنى يقصد نصلحكوا على بعض يعنى و يردك
زينب / انت بتقول ايه يا عماد دانا كنت بقول هانت على العده على متخلص و بعدين انتوا عازمينى عالاكل تحرقوا دمى باللقمه
ابراهيم / ليه بس الكلام ده يا ست الكل دانتى ست عاقله و كومل
زينب/ بص يا ابرهيم يا خويا انت مش غريب و انت عارف ان لولا انت طلبت منى اطلع مكنت عتبت بيت الاغراب ده و لا خاطبتهم و حتى اللقمه اللى باكلها وسطيكوا باكلها جبر خواطر لكن انا معدليش عيش معاه خلصت اصل معلش اللى كان عاوز يصالح كان صالح من زمان و لا هو نسى عنوانى
محمد / فى بيتها يا زينب
زينب / لا يابو ولادى لا مش فبيتها انت عارف طريقى لو رايد صلح انت عارف مكانى كويس تعال و نشوف
ابراهيم / بس النيه موجوده للصلح
زينب / والله يا ابراهيم انت عارفنى مش قليله الاصل انا بس مبحبش قله التقدير
رحيم / حلو اوى الاكل يا طنط تسلم ايدك
اميره / الف هنا يا حبيبى الف هنا
..................
فى اوضه البنات
منه / بس يا ستى تجيله يمين تجيله شمال عاوز يكتب الكتاب
رحمه / انا نفسى افهم انتى بتماطلى ليه مكل حاجه بقت جاهزه
منه / انا مش جاهزه يا بنتى و الظروف حوالينا ملخبطه ازاى
رحمه / متتكلميش عن الظروف انتى بتحبيه و لا لا
منه / مش عارفه
امينه / طب بتحسى بايه يعنى و انتى معاه
منه / بصى هو عنده قدره غريبه اوى انه يخلينى بدحك مهما كان اللى بيقولو بيدحكنى و ساعات بحس انى مدايقه لمجرد انه مكلمنيش و ساعات ببقى هموت و اكلمه
رحمه / يا سيدى
امينه / و عاوزه ايه اكتر من كدا
منه / خايفه مش عارفه يعنى اصله جواز صالونات يعنى مش زى رحمه كدا حب و حركات
امينه / اسمعى منى انا الصالونات ده احسن نوع جواز امان عندك امل اختى لو حكيتلك هتدوبى من النحنحه اللى كانت بتشوفها و مقولكيش بقى على اللى شافته فى الجواز معاه بلا هم و بعدين مدام دخل البيت من بابه خلاص امشى وراه و انتى مطمنه
رحمه / صحيح هو ايه اللى حصل مع امل
امل تدخل
امل / انا هحكيلكوا تسمعوها منى انا احسن
امينه / اه على يدى
امل / اقعدى ساكته انتى انا و هشام كنا زمايل فى الكليه كل بنات الدفعه هتموت عليه بس هو مكنش بيكلم بنات غيرى كان بيجى قبلى و يحجزلى و حتى لو معندوش حاجه يستنى اما اخلص و يروحنى كان بيعرف انى مدايقه منغير محكى كان بيهتم باقل التفاصيل بيسمعنى و انا بحكى اى كلام كان بيعرف ازاى يدحكنى
امينه / و عرف برده ازاى يعيطك
امل / انتى متعرفيش عنه حاجه ماشى
امينه / اه معرفش محدش يعرف غيرك انتى بس اللى احنا شوفناه لما جينا نزورك كان بيقول قد ايه بيحبك
امل / جيتوا فجاه فوقت غلط
امينه / انتى هتنقطينى يا بت دا كان راقعك علقه موت و كان نايم مع واحده زباله مالشارع على سريرك و انتى قاعده تعيطى مع نفسك احمدى ربنا اننا جينا و شوفنا المنظر ده
لحظه صمت
منه / انتى لسه بتحبيه
امينه / بتقولى ايه يا منه
منه / الحب هو الحاجه الوحيده اللى تخلى الست تلاقى مبرر لواحد زباله زى ده
امل / انتوا متعرفوش عنه حاجه محدش يحكم عليه
رحمه / طب متحكيلنا عنه يا امل
امل / محدش هيفهم
رحمه / جربى
امينه / انتوا بتقنعوها بايه بدل متعقلوها
امل / انا مش مجنونه يا امينه هشام كان شخصيه محترمه اوى انا و هو كنا مجرد زمايل كنت يوم مغيب الاقيه واقف تحت البيت خايف يتصل لحسن يعملى مشاكل هو كان بيفضل واقف مستنى بس انى اطلع و يشوفنى و بيمشى انا مكنتش بطلع كنت بقف ابص عليه من ورا الشيش اشوفه و هو رايح جاى كان بيبقى صعبان عليا وقفته بس مش عوزاه يمشى
………………….
أنت تقرأ
مفيش رحمه ٢ بقلم / لولو_محمد (كامله)
Storie d'amoreمشاكل بيت العيله و الماضى و السلايف و الضراير
