الفرعونه الصغيره

١٠ _ البحث عن الحقيقه

رواية الفرعونه الصغيره
بقلم إيمي
Emy Boss
الجزء العاشر
فرعونه : دي آخر مره هسألك
هتتجوزني ولا لا
أحمد وهو ينظر بعيون فرعونه : تعرفي يا فرعونه
قبل ما تلاقي اهلك كنت دايما بحسدك
تعرفي ليه؟
هزت فرعونه رأسها بلا
أحمد : لان معاكي اهل مهتمين بيكي
رغم انك مش بنتهم الحقيقه
وفي أمل ولو واحد في الميه انك هتلاقي اهلك الحقيقين
وتشوفيهم في يوم من الايام
لكن غيرك
عايش في وسط أهله لوحده
بيقعد شهور
على ما حد يخبط على بابه يسألوه انت عايش ولا لا
( ونظر بعيون فرعونه ) والأهم
انه من المستحيل ان يشوف ابوه وأمه مره تانيه
اما بالنسبه لردي على سؤالك
انا هتجوزك وهعملك احلى فرح
وهخليكي تجهزي الشقه على ذوقك
وهجيبلك أجمل شبكه
بس كل ده
بعد ما أطلب الزواج من أهلك الحقيقين
( ونظر لسامي ) لأني أخدت الموافقه من عمي سامي وعمي عماد
وهعمل المستحيل حتى يوافقوا اذا رفضوني
فرعونه بغضب : انتوا ليه محدش قادر يفهمني
انا مش عاوزه ارجع الصعيد
ومش عاوزه اغير اسمي
ومش عاوزه أكون غير مسلمه
حمدي : وانا هعملك كل اللي انتي عاوزاه
الكل اتخض من وجود حمدي
عماد نظر لحمدي : ده اللي كنت بحاول افهمهولك
دخل حمدي وعماد
حمدي : تفتكري كل طلباتك دي
هتكون أغلى منك
وضمها وبدأت الدموع تنزل من عيونه
انتي بنتي اللي اتحرمت منها سنين
اتحرمت من النوم والأكل والراحه وأنا بدور عليكي
كان كل امنيه بتمناها انك تكوني ضعتي بس
ميكونش حد موتك
تفتكري طلباتك دي كلها
هتكون أهم من رجعوك لحضني ولحضن أمك
فرعونه : يعني هتنفذ كل طلباتي
حمدي وهو ينظر لعيون فرعونه : بس لازم نخلص الإجراءات علشان نثبت انك ماريان الأول
وأغيرلك اسمك تاني باللي انتي عاوزاه
ولو عاوزه نعيش هنا
أجيب امك وإخواتك وننتقل هنا
بيتنا هو البيت اللي جمب البيت ده
الكل استغرب
عماد : البيت المقفول جمب بيتنا هو بيت اخويا حمدي
فرعونه بابتسامه خفيفه : قد كلمتك
حمدي : قد كلمتي
فرعونه : انا عارفه ان رجالة الصعيد مستحيل يرجعوا في كلمتهم
حمدي : ههههههههههه
انا مش من الصعيد
انا من هنا
وانتقلت للصعيد علشان شغلي
بس ممكن انقل شغلي كله هنا
ومع ذلك
مستحيل ارجع في كلمتي
ونظر لأحمد : لكن من حقي أوافق او أرفض على الراجل اللي هتتجوزيه
أحمد بدأ يتوتر من كلام حمدي
عماد : خلونا نغير الموضوع
في حاجه اهم دلوقتي
أمك وإخواتك هيركبوا اول قطر وجايين علشان يشوفوكي
خلونا نروح بيتهم ننضفه الأول
حمدي : لا محدش يروح
شوفلي بس تلات رجاله يروحوا ينضفوه
دول أطفال
والبيت مقفول من ١٥ سنه
معرفش ايه اللي فيه
عماد : تمام
ام ماريان تشوفلك
الكل انتبه لمريم
رغم ان الجيران والكل بيناديها ام ماريان
لكن
كأنهم أول مره ينتبهوا للإسم
فرعونه راحت عليها
فرعونه : انتي كنتي بتقولي ماريان بنت سلفك
مريم هزت رأسها بنعم
فرعونه : بس عمرك ما قولتي انها تايهه
وليه بينادوكي ام ماريان بالذات
مش ام سالي مثلا
مريم نظرت لحمدي وعماد
حمدي : لأنك عيشتي معاها فتره وانتي صغيره فرعونه : ممكن افهم ليه
عماد حاول يغير الموضوع : انتي عاوزه تضيعي فرحتنا برجوعك
ولا إيه يا فرعونه
فرعونه : لتكونوا مفكرين ان الموضوع انتهى بحضن ودمعتين
انا لازم اعرف ازاي كنت في الصعيد ووصلت القاهره
وازاي اهلي اهملوا فيا
علشان طفله عندها تلات سنين تضيع منهم
الكل بدأ ينظر لبعضه
فرعونه : وبعدين ممكن التحاليل تثبت اني مش بنتهم
حمدي : مستحيل
انتي بنتي وانا متأكد
ومعايا تحليل ال DNA بتاعي
دايما بشيله معايا علشان بدور عليكي
بكره هعملك التحليل
وانتي تتأكدي انك بنتي
سامي : انا معايا تحليل ال DNA بتاعك
لان ناس كانت بتدور على بنتهم
وعملوا التحليل ليكي
نشوف بس دكتور وهو هيعرف يقارن
ويأكد لينا
عبير والدموع بتنزل من عيونها : انا محتفظه بالملابس اللي لقيناكي بيها
وابوكي مسجل عيد ميلادك باليوم اللي لقاكي فيه
وهو اليوم اللي ضعتي فيه من أهلك
فرعونه : ده مش هيغفر انهم اهملوا فيا
سابوني ضعت منهم وانا طفله عندي ٣ سنين
حمدي بصوت مكسور : كان سنك قرب على الاربع سنين
ونظر لعماد ومريم وشاور عليهم
حمدي : هما أكيد السبب
نظرت فرعونه لعماد : انا ليه عشت معاكوا فتره وانا صغيره
عماد بدأ يتوتر
فرعونه : انا سألتك انت بس
علشان احنا بينا اتفاق
منكذبش على بعض مهما حصل
وياريت متخلفش وعدك
عماد بعد تفكير  : تمام
هحكيلك
امك حملت في اختك على طول
وكان اخوكي أكبر منك سنتين يعني صغير بردوا
والحمل كان تاعبها جدا بجانب البيت واخوكي
فمريم طلبت انها تأخذك معانا لحد ما أمك تولد
أمك رفضت في الأول
وبعدين وافقت لما مريم أصرت انها تاخدك
أخدناكي وانتي عندك ٦ شهور
لان الدكتور قال لأمك انها لازم تفطمك من الرضاعه
أخدناكي على ما تنسي الرضاعه
ولما امك ولدت ورجعنا الصعيد
امك كانت مريضه جدا بعد الولاده
لانها اتصابت بفيروس وقت الولاده
فاحنا أخدناكي تاني
لان مكنش في حد هيهتم بيكي
ولما امك شفيت وطلبتك
بقينا نتهرب من نزول الصعيد
لحد ما بقى عمرك قرب على الاربع سنين
طلبتك وقالت لو انتي مرجعتيش الصعيد هتيجي تاخدك وهتقطع علاقتنا معاها
فاضطرينا نرجعك الصعيد
واليوم اللي ضعتي فيه
هو اليوم اللي رجعتي فيه لأهلك
ولما وصلنا القاهره
لقيت ابوكي بيتصل عليا بيقولي انه لما رجع البيت بعد ما وصلنا للقطر
لقاكي مختفيه
رجعنا الصعيد تاني وفضلنا ندور عليكي شهور
لكن انتي اختفيتي
وكانت امك متهمانا اننا اللي خطفناكي
وكترت المشاكل
فرجعنا القاهره تاني
واتقطعت علاقتنا مع بعض
بس انا كنت اعرف ناس من الصعيد
كنت بطمن على حمدي منهم
علشان كده الناس بتنادي مريم بأم ماريان على اسمك
لا تنسوا تدعموني بنجمة حلوه علشان تشجعوني