عندما تنطق الدفوف

البارت-8-

چا يَمتَى يعُوّف الحِزّن دَرّبي
هَلِي عَصرة هِدم مَعصُور گلبّي .
________<<<<<>>>>>________

اتصال واحد بس
غير كل الموازين 
بدل كل ضحكاتنه
غير مجرئ حياتنه كلهه  ...

من اتصلو بعمو وكالوله فرح صاير وياهه حادث بالخط مال جامعه ...

شلون وليش ووين كلشي جان مجهول
بس جان السؤال الوحيد

عايشه بعدهه
خوما متاذايه

محد جان يعرف اي جواب واي كلمه تشفي الكلب وتطفي ناره

كلهم راحو مابقه غيرنه البنات نبجي وندعي وننحب حض هالبنيه المسكينه

ساعه بس ...
وتوقف بعدهه كل شيء
انتهى كل شيء
ميل الساعه توقف
الزمن رفض يكمل عداد الايام 
الهوا انحبس بصدورنه يرفض ينزفر

من اتصلو بينه وكالو

فرح ماتت .....

ياقساوه ذاك الشعور
وصعوبه ذيج اللحضه
والليالي الي تبعتهه وهي تحمل الكم الهائل من الحزن والدمع

____
الكلام عن لسان مرتضى ..

نركض بدون نفس نريد نوصل
ندور على كلمه تبرد وتطمن كلوبنه
وصلنه وطبينه للطابق واتلكونه
عمي وعمتي وعصام

يلطمون ويبجون

وكفت وابويه اتجمد
امي ركضت على مرت عمي وهي تصيح

ولج ماتت بنيتييييي
راحه فرحه راحتت

الاصوات اختفت ماضل غير صوت راحت فرح ..
التفتت على خطوات تركض ورايه التفتت

شفت باهر

وكف متصنم عيونه تحجرت  كأنو يفسر رده فعلهم ويعرف من خلالهه الي راح يسمعه

رحت عليه بسرعه حضنته وبجيت وارتب على ضهره حيل واصيح ياخوويه

ماجان يتحرك واكف وايده نازله بتعب
ماعنده حيل ابد
دفعني وهو يحاول يبعدني
يريد يتقدم خطواته بس يخاف
تسأولات هواي بنضراته
بس يكذب بروحه

نطق بعد تعب وصراع حته تطلع الكلمات من بين شفايفه الي تحول لونهن ابيض بسبب الصدمه الرهبه

-فرح ويين

-جاوبته عمتي ايناس وهي كاعده بالكاع وتلطم
فرح راحتت ولك باهر راحت مريتك وبنيتك
راحت عروستك
الجانت تلهج باسمك راحتتت

ولك باهر فرح بنتي راحت ماتت ماتت ماتت

تحجي وتهز براسهه بعشوائيه وصوتهه تجرح من اثر. صراخهه

اجو وطلعونه من المستشفى بسبب صوت النحيب

هدوئه قلقني
كل شوي واهزه اكله ولك باهر ليش ساكت
ابجي ولك طلعهه طلعهه