عندما تنطق الدفوف

البارت-7-

: مو گتلك اني أنسان
مو حايط أبيت
هم تدري چم بسمار
بضلوعي دكيت

__________<<<<>>>>________

وهيج مشت الايام
بس داخلي مارجع مثل قبل
نفسيتي حيل متحطمه والمشكله مضطره اجامل وابين طبيعيه ومابيه شيء
لان راح يقلقون عليه ويضلون يسالون واني ماكدر احجي ماعندي شرح لحالتي
صراع بين كبريائي وتقبلي وضعي الحالي

نيران حزينه دائما ومكتئبه بسبب وضعهه
يعز عليه اشوفهه هيج متأذايه

لا تكدر تتقبل فكره تنفصل عنه
ولا عدهه حل تغير خطيبهه بيه

دوم جنت اكول الحب يذل الانسان

نور طالبه وحياتهه بس دراسه محاضرات
مرتضى نهاره كله يفتر بسيارته

باهر قليل نشوفه بالبيت او اني تحديدا
ماحب احتك وياه من اشوفه اعود ادراجي وانسحب
ماتقبل شوفته بعد اخر موقف صح اعتذر
بس اعتذاره جان لاجل ارضاء حب حياته
مو صحوه ضمير ...

كاعده والعب بتلفوني وكدامي بيبي كاعده وتدردم

رفعت راسي عليهه

-شبيج بيبي ضايجه

-اكلج ما تعينيني اكوم للخضار البره اغتاضيت هنا بين الحياطين

-ياخضار بيبي الجو بارد عليج

-الهوا عذيبي طيب كومي مشيني

كمت عليهه امشي بيهه لفيتهه بلفاف على كتفهه وكعدته على الكرسي وهي تباع عالشجر وتسبح وتستغفر

-صفنت اني بالفراغ وفزيت على صوتهه

-شبيج يايمه شارده وعقلج مو وياي

-بيبي مابيه شيء حجيتهه بتنهيده

-بيج يايمه بيج هواي

-التفتت عليه بابتسامه مرسومه على طرف شفتي

-شنو اخذتيلي خيره

-لا شفت بعيونج الحيره وكسره
بس ليش يابعد حيلي

خلت ايدهه على راسي وتمسد بحنيه

-بيبي افكر بالدنيا شلون افترت بيه هيج وشلون عاقبتني بس بيا ذنب مادري ..

-احمدي ربج الجزع حرام يمه

-مو جزع بس يابيبي الضربات الي تلقيتهه توجع
من وفاه ابويه لحد سالفه باهر
شكد كفخت بيه الدنيا وشكد تقوت عليه
وتكوليلي لا تجزعين

-احمدي ربج يمه متعرفين يجوز هاي المشاكل الي تحجين عليهه وضايجه يجي يوم وتكولين جانت هينه واني ستصعبتهه
وياريت لو ضليت عليهه

-هه شاشوف اكثر من هيج يابيبي

-مانعرف شمضموم ولا نعلم الغيب العلم عند الله يايمه
رفعت ايده على جبينهه المجعد من اثار الزمن وكالت
المكتوب هنا لابد ينشاف يايمه وماندري شنو بس نكول الله كريم وهو يرحم بالعباد