عندما تنطق الدفوف

البارت-12-

جنت اكلهم نار بيه
نار بيه وجذبوني
ومن بقيت رماد
كـالو ليش ماكلت احترك
______<<<<>>>>________

وكبرت الكلمه ..

هي كلمه وكلتهه بس انقلبت حياتي رأسا على عقب
نطقته وماعرف ليش نطقته
وشنو الخلاني انطقهه

ردت اخلص من الصوت الي براسي
وفعلا مجرد ماانطقت موافقه عمو عالزواج اختفه الصوت من راسي

فرح عمي وعمتي تبوس بيه
بيبي صاحتني يمهه وتحمد وتكلي عين العقل
اختاريتي زينت الزلم
باهر ومن كال باهر

محد يعرف اكو اتفاق اكو غصه
اكو جرح

عرف باهر اني انطيت موافقتي وجانت المواجهه بيني وبينه
يوم الي كال لنور خل تنزل بالكراج

جانت دنيا ليل ونزلت لفيت الجاكيت الصوف مال بيبي على جسمي وطلعت

جان ديشرب جكاره ومنطيني ضهره

وكفت وراه من حس بيه التفت وذب جكارته وسحكهه برجليه

-كالت نيران طالب تشوفني خيرر

-سمعت وافقتي عالزواج

-يي وافقت

-ادخلج بالمفيد
خلينه نكون على بينه من هسه
نتزوج ولا اطالبج ولا تطالبيني انتي بصوب واني بصوب
لا تنتضرين مني شيء ولا اطلب منج شيء بيوم لحد ما نشوف حل ونفك هالاتفاق

-تمام وهو المطلوب

-خوش لعد هاهيه ماعرفتي شكال ابويه

-كال الجمعه نسوي العقد

-التفت وطلع بدون ميجاوب
مبين رايح يشرب

رجعت صعدت سالني البنات شنو راد منج

-ديسأل اني موافقه بكامل ارادتي

-وووي ديتأكد خطيه

-بعد ماكلج شيء مسولفلج مثلا عنده مشاعر شيء فرحان لو لا

-مادري لا ماسأل ابد

-حمااس ياربي حمااس
احسكم راح تشكلون ثنائي يونس كلش

-ليش بلا نونس

-لان انتو جنتو متتوالمون وهواي بينكم مناكر راح تضلون تتناكرون واحنه نضحك عليكم

-اكلج نور نجبي عفيه ترا مالي خلكج

-ليش شنو متوتره لو مستحيه

-متقندره

-شنوو

-ماكو شيء ولج ولي من الفراش اريد اتغطه وانام

لفلفت روحي واني افكر واكول شراح يصير بعدين وشلون راح اكدر اكمل بهل مهزله

مرت الايام وصار يوم العقد