صراع عائلة الطوجي ( مكتمله )

التاسع والعشرون

مر اسبوعين من آخر الاحداث.........

لم يتغير الكثير...فلقد كانت الحياة بين فهد ومروة بين البرود من فهد والغضب والعصبية من مروة وبعض العند ايضا...مما جعل صبر فهد بدأ بالنفاذ ولكن حبه لها يمنعه من فعل اي شيء يعلم جيدا انه سيندم عليه..........

كانت مروة جالسة على الارجوحة التي في حديقة المنزل...حتى اتت لها الخادمة.......

الخادمة: انا حضرت الغدا ياهانم والبيه على وصول.
مروة ببرود: وانا مالي يوصل ولا لا انا كده كده هاكل في اوضتي كالعادة!!
الخادمة بخوف: لا ماهو حضرتك فهد باشا امر بتغيير الوضع.
مروة نظرت لها بترقب: قصدك ايه؟!
الخادمة بلعت ريقها وقالت: امر ان حضرتك تنزلي تتغدي معاه على السفرة من النهاردة.
مروة وقفت بغضب: نعم ياختي!!
الخادمة بتراجع: انا ماليش دعوة دي أوامر البيه ياهانم!!
مروة محاولة الهدوء: انا هاكل في اوضتي ولما يجي هبقا اكلمه مالكيش دعوة انتي.
الخادمة برجاء: بالله عليكي ياهانم انا مش عايزة مشاكل..انزلي كلي مع الباشا النهاردة بس وابقي كلميه حضرتك براحتك!!
مروة بغضب: انتي وهو في يوم واحد ياشيخة انتي مابتفهميش!!..قلتلك انا هقوله انتي برا الحوار ده..ويلا روحي شوفي بتعملي ايه مش ناقصة وجع دماغ.

ثم صعدت للاعلى وهي تشتمه بكل مايخطر على بالها من غضبها ومقتها منه..........!!!

بعد ساعة عاد فهد للمنزل وراى الطعام جاهز على مائدة الطعام ولكن لم يرى مروة كما امر...فنادى على الخادمة بصوت عالي وهو يتوعد لها اذا لم تكن نفذت ما امر به.......

الخادمة بخوف: ايوا ياباشا!!
فهد ببرود: انا امرتك بايه الصبح؟!
الخادمة بلعت ريقها بصعوبة: اني اخلي الهانم تنزل تاكل مع حضرتك.
فهد: جميل وهي فين بقا؟!
الخادمة بخوف: مانزلتش!!
فهد بغضب: نعم؟!
الخادمة برعب: والله ياباشا قلتلها بس هي صممت على رأيها وقالت هتاكل فوق كالعادة!!
نظر فهد للطابق الثاني وخاصة غرفته بغضب وهو يتوعد بالاسوء...فلقد تمادت في عنادها هذا من وجهة نظره!!!.........

في الأعلى كانت مروة تقرأ كتاب ما حتى دخل عليها فهد كالاعصار ووجهه لا يبشر باي خير مطلقا ولكن تشجعت مروة لمواجهته مهما كان..........

مروة بغضب: ايه الهمجية دي مش فيه حاجة اسمها باب تخبط عليه زي البني ادمين!!
فهد محاولا الهدوء: انتي مانزلتيش ليه؟!
مروة ببرود: لاني مش عايزة بسيطة!!
فهد بغضب: هو ايه اللي بسيطة!!..انا اوامري تتنفذ من غير عناد او نقاش.
مروة بغضب: لا معلش انت مش متجوز عبدة..انا ليا الحق في الاعتراض على اي حاجة مش عجباني..مش معنى انك اتجوزتني غصب يبقا كل تصرفاتي هعملها بالغصب منك!!
فهد: لا معلش الكلام ده مايمشيش هنا..هنا فيه نظام تحترميه..عيلة الطوجي وقت الغدا لازم تكون متجمعه على السفرة..مش واحد تحت والتاني فوق!!..دي مش أصول يابنت العمري ده لو تعرفي في الأصول!!
مروة بسخرية: ليه وانت لو كنت تعرفه كنت اتجوزت ببنات الناس بالطريقة دي؟!
فهد بغضب: ليه وهو انتي بنت ناس!!