صراع عائلة الطوجي ( مكتمله )

السادس والثلاثون

في اليوم التالي.......

كانت مروة جالسة في حديقة المنزل شاردة تفكر في ابيها الذي لم يتصل بها حتى الان!!...نعم كان مشغولا في عمله عندما كانت في المشفى ولكن هل هذا يعطيه الحق في أن لا يسأل عنها بعد خروجها ايضا!!......

افاقت من شرودها على اتصال من أخيها ففتحت المكالمة وكانت كالتالي......

محمد: صباح الخير على احلى مروة في الدنيا.
مروة بضحك: انت اتغيرت اوي بعد ما انا اتجوزت..ياترى ايه السبب!!
محمد بمزاح: يكفي انك سيبتيلي اوضتك بس.
مروة بتحذير: عارف لو جيت مرة ولاقيت فرش السرير مش مظبوط بس..هخلي وشك مش مظبوط هو كمان.
محمد بغيظ: ايه الرخامة دي!!..انتي مش اتجوزتي وارتحنا منك عايزة ايه من الشقة!!
مروة بسخرية: ماشاء الله انت مش عايزني ادخل اوضتي بس لا وكمان الشقة من اصله؟!
محمد بفخر: ده المفروض..اي حد بيتجوز بينسى شقة عيلته اصلا.
مروة: اشطا يبقا لما تتجوز انت كمان وربنا ماهخليك تشم عتبة بابه حتى.
محمد: ياختي بس اتجوز الاول وتبقي تاخدي العمارة كلها مش هعترض.
مروة: انت لسة بتحب رؤى يامحمد صح؟!
محمد بتنهيدة: اه يامروة ومش عارف اقنع بابا ازاي بس!!
مروة بتفكير: طب ما اخلي فهد يقنعه!!
محمد بسخرية: انتي عارفة انهم مش طايقين بعض الفترة اللي فاتت دي..فأنتي كده عايزة تقنعي فهد الاول انه يقنع بابا..فاهمة حاجة!!
مروة ببرود: ايه الرخامة دي!!..ماهو لو اقتنع بابا وفهد كده هنبقا عايزين نقنع عيلة الست هانم كمان انت ناسي ان ليهم عداوة مع فهد اكتر من ابويا نفسه!!
محمد: وهو انتي بتفكريني ولا بتفكري نفسك!!..مش بقولك الموضوع صعب وانتي بس فالحة تطمنيني وخلاص!!
مروة: الحق عليا اني عايزاك ماتفكرش بيأس!!
محمد: وهو بعد الكلام اللي قلتيه ده عايزاني افكر اصلا!!
مروة: بص من الاخر كده موضوعك ده عايز قعدة عرب.
محمد باستغراب: نعم ياختي!!..ده اللي هو ازاي معلش؟!
مروة بتنهيدة: يعني يافالح انا وبابا وانت وفهد نقعد كده ونتفق ونحل اي خلاف عشان نبقى خلصنا من خلافنا كعيلة ونشوف بقا مشكلة عيلة رؤى.
محمد بسخرية: ياختي بطة!!
مروة بغيظ: ايه فيه ايه؟!
محمد: هو ايه اللي فيه ايه..بقى عايزة فهد وابويا يقعدوا على ترابيزة واحدة!!..عشان تتكسر على نفوخنا من أول قعدة اصلا!!
مروة بتعجب: ليه يعني..ثم الاولى نخاف من عيلة فهد مش بابا!!
محمد: يعني انتي عارفة ان هتحصل مجزرة لو قعدة العرب دي تمت مش كده؟!
مروة بتنهيدة: عايزة اعرف انت خايف من ايه..مش صابر ده مات اصلا يعني اللي كان هيعقد الأمور اتكل على الله خلاص!!
محمد: ده خالها يامروة مش ابوها ماله هو ومال اللي بنقوله..ثم انتي ناسية باقي العيلة!!
مروة بتعجب: ايه هيحشروا نفسهم في اللي مالهمش فيه ليه؟!..انا كنت اقصد ان صابر هو اللي كان السوسة اللي فيهم واهو اتكل على الله.
محمد: مع انك عاشرتيهم بس لسة مافهمتيش الأمور بتمشي عندهم ازاي..عموما تبقي تقترحي على فهد اللي انتي قولتيه ده ولو وافق تمام.
مروة: الأصول ان انت اللي تقوله الاول..لان لما انت تفتح معاه الموضوع من نفسك هيحترمك جدا وهيبقى متأكد انك مش عايز تتجوزها عشان الفلوس ولا حاجة!!
محمد بتفكير: معاكي حق..اول مرة تقولي كلام صح.
مروة بغيظ: طب غور بقا من هنا.
محمد بضحك: ماشي لما اشوفك بس..بس اسمعي.
مروة بتنهد: ايه خير!!
محمد: اوعي تقولي لفهد حاجة ولا حتى لبابا لغاية ما اشوف هعمل ايه وبعدين افاتح بابا الاول فاهمة!!مروة: طيب ياخويا ماتقلقش مش هقول لحد.
محمد بشك: مروة!!
مروة بملل: ياعم قلنا ماتقلقش بقا!!
محمد: ربنا يستر..يلا سلام.
مروة: سلام ياخويا.