ماس

البارت السابع عشر

مـاس ل شـفاء آل سـالم

حتى في المرات التي رغبت
فيها بالفِرار
‏من كُلِّ شيءٍ حولي
‏كنتِ أنتِ بالنسبة لي،
فكرةَ منزلٍ آمن

يمكن لعبة القدر او سخرية منه او حتى قانون الجذب اشتغل لاول مره بحياتي بكد ما جنت استهزء واضحك على اصدقائي من يحجون بالحب احبها ما اكدر انساها ما اعيش بدونها جنت استغرب شون انه الانسان ممكن يموت بسبب شخص او انه حياته توگف على شخص ، جابها القدر وخلاها بطريقي بحيث مكدرت اتجاوز وجودها او مرورها بحياتي تركت الاثر الاكبر وخلتني اتعلق بيها من اول لقاء

مجانت سهله ابد بس لاني احب الصعب واحب الي يتعبني حبيتها يعجبني طعم الفوز بعد التعب ماكو شي بحلاوته وهم يمي قناعه انه الي يجي بسهوله يروح بسهوله

شفت تأثيرها عليه بغيابها قبل حضورها ودائماً جنت احاول استفزها لان احب ردات فعلها والطريقه الي تحجي بيها لمن تكون معصبه بحيث شكو شي بگلبها تطلعه لو صار قبل شهر ، جنت اسميها المعقده يمكن مجانت بهالتعقيد بس احس هالكلمه كلش تشبهها جانت عباره عن خليط بين اناقه وجمال وثقافه ونزاكه وعقل وهدوء بيها كل الصفات الي يتمناها الشخص يلاگيها ب شريك حياته چانت فرصه ذهبيه بالنسبه الي شلون افوتها من ايدي .....

بقيت اني الي ابادر واراسل والح عليها حتى تقبل بيه وتتقبلني واغلب المرات جنت اتحجج بالشغل بس حتى افتح مواضيع واحجي وياها

بس فترة السعاده چانت قصيره ، دخلت بعدها بمتاهه بين القسمه وبين حبها
جنت احبها واخاف عليها من كلشي حتى من نفسي اخاف يجي اليوم الي اأذيها بسب حبي الها بدون لا اقصد وانتبه

كبر حبي الها وهالشي بين على عيوني ونظراتي الها وتصرفاتي وياها وحرصي وخوفي عليها كلشي جان واضح للكل ف شلون تعبر هالتفصيله زهراء

- هااا حب شلونك

- خير ،بعدين ترا احنه بالشغل اقارب وبس حب وسوالفچ التعبانه متمشي هنا

- ليش تخاف لا تعرف حبيبة الگلب بالي بينه

- عفواً شتقصدين

- هاي ليش انصدمت عبالك اني ثوله وما انتبه لو شنو يحلو

- بطلي خرابيطج واكفيني شرج يمي شغل ترا

- تمام حب بس ديربالك على عيونك لتضل زايغه مو زين عليك

- ما اعتقد عيوني براسچ ولا مسببات الچ اذيه ف يلا منا

راحت وبقيت محتار ومنصدم من تلميحات زهراء بس اني حتى حجي مجنت احجي وي ماس كدامها حتى لتعرف يجوز احد گللها او معقولة لهاي الدرجه مبين عليه الحب...

هي من نوع الي يبين كلشي بوجهها لمن تكون زعلانه لمن تكون فرحانه متكدر تضم هالشي يبين عليها وان حاولت متبين بس متكدر ملامحها وعيونها وحتى ونبرة صوتها تفضحها