ලන්දේ උකුල උඩ | Sinhala BL

දහය: දුවන තරගෙ

"මධ්‍යම පළාත් පාසල් මලල ක්‍රීඩා තරගාවලිය"

මං හිතුවට වඩා ලොකුයි... මං කිව්වෙ තරගෙ! මීට කලින් මං බෝගම්බර ආවෙ දිස්ත්‍රික් තරගවලට විතරයි. ඒත් පළාත් තරග හරි ලොකුවට පැවැත්වුණා...

"වාහ්!" මට එහා පැත්තෙන් හිටපු අපෙ මල්ලි කටත් ඇරගෙන බලන් ඉන්නවා... තනියට කියලා එක්කන් ආවෙ මල්ලිව විතරයි... තව ඉතින් භාසුරු සර් ආවා... අපෙ ඉස්කෝලෙන් වෙන කවුරුත් ආවෙත් නෑනෙ...

උදේම ආපු හින්දද මන්දා තාම සෙනඟ අඩුයි... බෝගම්බර ග්‍රවුන්ඩ් එකම මහ විසාල තැනක්... තනිකර කොළපාටයි... එක එක ඉස්කෝ⁣ලවල එක එක විදිහෙ ටයි දාගත්ත, බැජ් ගහපු, බකල් දාපු ළමයි ගෑනු පිරිමි බේද නෑ එහෙට දුවනවා, මෙහෙට දුවනවා වැඩ ගොඩයි... ගෑනු ළමයි වගයක් ඉස්සරහා ⁣ඇතුල්වෙන ගේට්ටුව හදන්න ඕන විදිහ පහළ ඉඳන් කියද්දි තව පිරිමි ළමයි ටිකක් ඉණිමං උඩ නැගලා ඒ කියන විදිහට උඩ කම්බි බටේක බැලුම් එල්ලනවයි, මල් ගහනවයි...

තව අර බෑන්ඩ් එකක කොල්ලො වගයක් ලස්සන යුනිෆෝම් එකක් ඇඳන් දිලිසෙන ඉන්සටෘමන්ට්ස් එහෙමත් අරන් මාර්ච් පාස්ට් එකට ග්‍රවුන්ඩ් එක මැද එහෙට යනවා මෙහෙට යනවා... තව පැත්තක මං දැක්කා ඊස්ටර්න් බෑන්ඩ් එකක ඔසරි පටලවගත්ත ගෑනු ළමයි ටිකකුත් කියව කියව ඉන්නවා...

නුවර ලොකු ඉස්කෝලවල ළමයි වෙන්නැති!

ලොකු නිලමෙ වගේ එක එක පාට කෝට් දාගත්ත ළමයිත් එහෙ මෙහෙ යනවා... මෙහෙ ඔක්කොම වැඩ ටික ළමයි වෙන්නැති හරිගස්සනවා ඇත්තෙ... අපිටත් ගිහින් උදවු කරන්න තිබ්බනම් කියලා හිතුණා මට...

ඒ අතරෙ මං වගේ ටීෂර්ට් බොටම් ගහගත්තු සමහරු ඉඳගන්න හදලා තියෙන පඩිපෙල්වල ඉඳගෙන වතුර බොනවයි, දාඩිය පිහිනවයි, ග්ලූකෝස් එහෙමත් කනවා... සමහරු එක එක තැන්වල එක එක විදිහෙ එක්සසයිසස් කරනවා... ගොඩක් දුරට තරගවලට ආපු අය වෙන්නැති...

තව පැත්තකින් බිත්තරයක් වගේ බෝලයක් අරන් උඩ දාන අලි පැටවු වගේ කොල්ලො ටිකක් පොර කනවා...

"අයියෙ, මේ, අර බලනවකො, රගර් හලෝ... මටත් ආසයි දවසක සෙල්ලම් කරන්න... මරුනේ? අපේ යාළුවෝ හරියට ඉස්කෝලෙදි කතා වෙනවා ඕක ගැන... දවසක් මං පත්තරේක එහෙමත් තියෙනවා දැක්කා" මල්ලි කියද්දි මං කටත් ඇරන් අහන් හිටියා... මෙයා දන්න තරම්!