ضحايا اشباه الرجال

البارت السادس والعشرون

رديت من عشرتك وصوابي من كل كتر
مثل النقاط بالزار
وانت بوداعك صلف تعاينلي نضرة ربح
بدوي ورجعله الثار
___________الشاعر كرار سعيد

يا وجه الصبح وبكل نسمة هوة اشتمك
يالتشبه نهايات الروج
ابيض صافي كلش من ارسمك
يالجنك ضوة من الظلمة اطلع بيك
يا هوة كليبي الماكو منك ..بقلمي(نور الخفاجي)

__________________
ريام : طلعت من الحمام مصلخة والشامبو بشعري وجسمي كله صابون مثل المخبلة اركض واصيح عليهم

لكيت ليان ومحمد بالغرفة يبدلون اصيح على ميثاق ميجاوب رحت للغرفة الثانية لكيته خانس مدري شيسوي من شافني فز

ميثاق : شبيج فززتيني

ريام: وليش فزيت شجنت تسوي

ميثاق : ما اسوي شي جاي ادور بالاقلام اشوف ياهو الميكتب حتى اذبه

ريام : شضام وتدورة

ميثاق : كلشي ماضام شبيج ريام

ريام : يباوع علية خايف ومرتبك ويلوب يمثل عود ماعندة شي ومسيطر بس اعرفه حافظته حفظ ،

تعال اوكف يمي بباب الحمام خل اكمل سبح

ميثاق :شنو جاهل اني

ريام : ميثاق لا عبالك ساكتة يعني ثولة ديربالك اسمع كلامي وامشي يمي ترة هسه اخابر بابا تعال اوكفلي واسكت

ميثاق : اي روحي واجي وراج

ريام : لا هسه وياية امشي ،

جبرته يوكف يمي عفت الباب مفتوح وسبحت اخاف اغمض عيوني ويروح عالسريع اسبح انشدهت وبكلبي اكول الى متى اني اراقب ياربي فرجك كملت سبح وطلعت لملمت البيت وتعشينا ونمنا اني كوة اغفه وافز ثاني يوم كعدنا الصبح وهو يلوب مامرتاح يفتر بالبيت للعصر كال ضايج اريد اطلع

ريام : وين تريد تروح

ميثاق : ضوجة اريد اروح اشوف امي واخذ الجهال وياية حتى ليبجون وانتي خلصي شغلج علما نجي

ريام : كتله روح بس كلبي يفور عالجهال وما اكدر احجي كالولنا لازم ننطي الثقة والامان هو طلع واني لزمت كلبي بيدي ما ارتاحيت الا اتصلت علية وضليت وياه لحد ما وصل لأهله سديته منه وخابرت امه

ام هاشم : ها ريام ذولة يمي الجهال وميثاق

ريام : عمه عينج عليه لتخلي يطلع فدوة

ام هاشم : شنو قابل جاهل

ريام : انكس من الجاهل بس يطلع يروح ياخذ جرعة خلي يمج كبال عينج فدوة

ام هاشم : اهو افتهمنا يالله روحي

ريام: ما اعرف ليش ميهتمون ولا يصدكون بكلامي ضليت انضف بالبيت وسويت عشه بينما يجون داعزل ملاعيب الجهال وشفت جنطة مالت ميثاق قديمة جان يضمها جوة راسة قبل وميخليني الزمها عبالي بيها اوراق مال محل وحسابات عفتها انوب كلبي نغزني اروح وارجع عليها حسيت بيها شي فتحتها لكيت شيشة كبيرة كزاز مدورة مثل الدورق مال تحليلات متروسة مادة واقلام وتيب وكلوبات راح حيلي واني اباوع كل تعبي ما بي فايدة خابرت امه