على خطى قلبي

على خطى قلبي أسير، يخفف عني و يرسم لي قدراً أجمل على الرغم من مصاعب الحياة..

ففي هذه الدنيا لنا نصيب من الفرح والحزن، نصيب من الحب والكره، من الثقة والخيبة، من الكبرياء والانكسار، من الأمل والألم ومن الربح والخسارة هذه هي الدنيا وهذا حال الناس هكذا يعيشون نصف الحياة جميل ونصفها سيئ والصبر مفتاح لكل شيئ فقط علينا أن نسعى ونتوكل ولا نبالي فقط نحمد الله على كل شيئ ونعيشها بحلوها ومرها ...
.
.
.

مشاهد و احداث ...
_______________________________

اباوع عليه گام يختنگ بس ميهمني حتى اذا اصير مجرم وافوت للسجن ميهمني.. شوية ووجهة گام يصير ازرگ وآني بكامل اصراري وقويت ايدية حتى اگطع عنة آخر نفس ياخذة وأخلّص امي وخواتي منة ومن شرة، اريد اگطع عنة النفس لان عيشنة سنيييين وهو كاتم علينة نفسنة ومسود عيشتنة عايشين بخوف برعب بذلة، اللي دااسوي هو الصح، هالانساان لازم يموووت، عيشتة اذية عالبشر...

______________________________

فتحنة أغاني و ذبيت لحم لأن آني أخت العرسان اثنينهم وفرحتي ماأنطيها لأحد، ماما جتي بنص الاغاني گالتلي:- ليناا.. تعالي شوية رايدتچ بشغلة...

رحت گتلها:- هاا ماما؟؟

ماما:- ولچ ثگل شوية.. لحد الآن اجوي اثنين خطابة هسة شيگولون بايعتها؟؟

- لاا بالعكس يعني آني مرحة وروحي حلوة ويريدوني چنة.. شلون يگولون بايعتها وجايين يخطبون بلة؟؟.. بعدين گليلهم ماموافقة.. أبوي مينطيني...

ماما:- ياااا وفوگاها ما تستحي...

- ماماااا خليني فرحانة.. قابل يومية يتزوجون؟ مزعجين الا بنفس اليوم.. هسة آني أرگص لمنو منهم؟؟ غير كل واحد بيوم حتى أبدع...

ماما:- عود زوجي أبوچ وأرگصي بعرسة.. امشي من خلقتي...

- الة أگلة...

.
.

سديت الفيديو وفتحت واحد ثاني ذاك خاف امي تشوفة حتى مااترزل هذا الثاني بس للبنات گلتلهن:- شوفوا هذا الفيديو اموتهااا اللي تشوفة لاحد.. شوفوا زين خل اقربلكم، دتشوفون هذا اللي يم صوفي؟ هذا يمنة بالمنطقة اسمة زيد اليوووم بالحنة امة العينتين عجبها رگصي ورادت تخطبني الة.. دتشوفون چان صار زوجي المستقبلي.. بس يلاا اشوفلي واحد احلى ما متوازية هسةة.

______________________________

علي بانفعال:- لتكولين علييي كرهت اسمي من ورااچ كرهتچ كرهت حتى روحي، گمت أتمنى ييجي  اليوم اللي اموت بي واخلص، ليش ما كلتيلي من البداية ما چان ورطت بنت الناس وياي، چان ما تزوجت وبليتها بمصايبي، ششافت مني؟ من اخذتني ششافت مني؟ ما حصلت غير المغثة والمشاكل وما ارتاحت بيوم ، ياريتني متت ولا اجيت على هالحياة، ياريت متت ولا...

امة:- اسم الله يمةة، يومي گبل يومك ان شاء الله...

دفعها وگال:- وخرييي عني، لتلزميني، ولتگليلي يمةةة...

______________________________

لتحرميني منچ ومن صوتچ، يولي بيوم اللي مااسمع صوتچ بي احس چن الهوى ما فايت لريتي....
سديت الخط بوجهة وهو يحچي، مستحيييل مديسكتتتت شصارلة هذااا!! من شوكت يحچي هيچ؟!!! ارتبكت وقلبي يدگ سريع واحس الدنيااا حارةةةة ووجهي صار احمر، فتت للحمام غسلت وجهي وميفيد، باوعت لروحي بالمراية بس، كأنه دااشوف ابتسامة على وجهي!! استغربت وضربت على خدودي وگلت: عزة بعينچ وفوگاهة تبتسمييين!! ولچ اصحي على روحچ..

______________________________

مر وقت طويل وهو نايم، فجأة فز على برودة المي اللي صفعت وجهة.. اخذوه لمكان ثاني ربطوا ايديه ورجليه بسلاسل وهو واگف و من هاللحظة بدة مشوار التعذيب بالبداية حس بشعور غريب گدر يتحمل گدر يصمد بس فترة و صار يصرخ من الوجع ويحس ظهرة گام ينزف شاطت روحة و من شدة الألم حتى صوت ما ظل عندة حتى يصرخ بي.. ورة نص ساعة بدة يتعب ويغيب عن الوعي شوية شوية..

______________________________
مو من قلبچ، دااگلچ لخاطري، امي راحت ماتت بعد مترجع، حتى لو چانت مو زينة بس قبل لتموت طلبت مني تشوفچ حتى تسامحيها، منظرها يدگ بقلبي لهسة چانت بس تريد تشوفچ، آخر طلب طلبتة مني قبل لتموت...

نزلت دمعتة وگال:- احبهااا والله مو بيدي هاي امي من وعيت عالدنيا وهي امي ادري طلبي ثگيل عليچ ورة كلشي صار بس لخاطري...

لزمت ايديه حيل ووراها مسحت دموعي وگتلة:- والله مسامحتها، الله يرحمها ويغفرلها...

______________________________

((( قد ينسى الانسان أيامه الصعبة لكنه لا ينسى من هونها عليه.. علموا ابناءكم.. ان العم اب.. وان الخال عز.. وان العمة قلب حاني والخالة أم.. علموهم ان الجد والجدة قطعة من القلب.. وان الأخ سند والاخت ضلع.. اخبروهم انه لا حب يعادل حب العائلة ولا تغرسوا الحقد والكره وقطيعة الرحم.. التربية امانة ستسألون عنها يوم القيامة )))

.
.
.

على خطى قلبي رواية بأحداث حقيقية ممزوجة بخيال كاتب...
وقت النشر رايح يكون عند انتهائي من كتابة كل بارت...
بقلمي: هند النعيمي