على خطى قلبي

البارت الثامن عشر

على خطى قلبي..

للكاتبة هند النعيمي..

البارت الثامن عشر

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

شهد...

طلع عمو بس حيل قلقنة جتي أميرة گالت:- شكو شبيكم؟!!

عمة:- يمة أبو حنين لا رايح للشغل، ولا يجاوب على تلفون من يخابرون عليه، قلقوا وراح عمچ للبيت يشوفة خاف بي شي...

أميرة:- ياااا خطيةة، لاا ما بي شي ان شاء الله، بلكي ماخذتة نومة وما حس عالتلفون...

- ان شاء الله...

ورة شوية نزلت حنين گالت عمة:- هاا يمة گعدتي؟!

حنين:- اي هسة يلة گعدت، البارحة تأخرت بالنومة...

-    مو مشكلة اهم شي شوية تحسن وضعچ...

حنين:- اييي عفية ذاك الأسبوع لا اگدر اشم ريحة شي ولا حتى اگدر آكل، بس هسة الحمدلله احسن بهواي...

أميرة:- أي يمعودة الحمدلله، كلش الوضع مزعج...

حنين:- راح اروح آكل شي، جوعاانة...

أميرة:- تعاي آني هم خل آكل وياچ ما تريگت زين...

اخذتهة أميرة وراحن للمطبخ چانت جدة هناك دتنظف بالخضرة، گالت عمة:- يمةة خابري عمچ هسة اكيد وصل، ظل بالي...

خابرت ميجاوب گلتلهة:- يدگ بس ميجاوب...

عمة:- اسم الله، سترك ربيييي، ما عايزنة هبطات، يمة بنيتي سودة علية، زين خابري فارس...

خابرت هم ميجاوب، صدگ خفت گلتلهة:- اخابر فراس؟

عمة:- لااا يمةة خلي بالشغل هسة يظل عقلة يجيب ويودي، خصوصا اذا ميجاوبون عليه...

بقينة على اعصابنة، شوية ورحنة للمطبخ كملنة الغدة وأميرة نظفت البيت وساعدتهة حنين، من صارت الساعة بالدعش واحنة گاعدين بالمطبخ فاتوا فارس وفراس ووجوههم متتفسر عمة گالت:- هاا يمة؟!!

ما رد احد عليهة، فارس باوع لحنين چانت واگفة يم الطباخ گال وهو يمدلهة ايدة:- تعاي...

اباوع عليهة استغربت ابتسمت وراحت عليه، لف ايدة على چتفهة واخذهة للهول عمة لزمت فراس من ايدة وگالت بصوت ناصي:- گلي شبي ابوهة؟؟!!

فراس:- يمة، ابوية فايت عليه يگول عبالي نايم، يگعدة ميگعد، طلع ميت...

جدة:- يمة اسم الله الرحمن، شلووون ولك!!..

نزلت دموعي وعمة گامت تبچي وگالت:- الله يرحمة ويجعل مثواه الجنة ويصبرنة، يمةة ابوك وين؟

فراس:- ابوية منهار، ميقبل يعوفة، جينة ناخذهة تشوفة خطية قبل مندفنة...

رحنة للهول لگيناهة گاعدة عالتخم وفارس گاعد گدامهة بالگاع ولازم ايديهة باثنين ايديه ويمسح عليهن وهي تسمعلة بس مستغربة:- فارس دتخوفني، صارلك ساعة ليش هيچ دتحچي؟ شهالمقدمااات؟؟ صاير شي؟؟