على خطى قلبي

البارت الخامس عشر

على خطى قلبي..

للكاتبة هند النعيمي..

البارت الخامس عشر

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

لينا...

فاتت للغرفة شوية وطلعت وجهها مخطوف وگالت:- عبد.. مدري شبي...

ركض فارس ووراه فراس من فتنة لگيناه حاط ايدة على بطنة ومغمض عيونة قوي مبين عندة وجع، گال فارس:- شبيك عبد؟؟

ما رد گال فراس وهو يحاول يشوف بطنة:- بطنك؟ شو وخر ايدك خل اشوف...

عبدالرحمن حط ايدة على بطنة قوي وگال بتعب وصوت ضعيف:- ما بية شي...

أميرة:- شنو ما بيك شي؟

فارس:- شنووو ما بيك شيي؟؟ خل اشوف بطنك وخر ايدك...

وخر ايدة فارس وشال التيشيرت من بطنة وگال:- هاي شنووو؟؟؟

منظرة چان صدمة صراحة، بطنة ملفوفة بشاش طبي بس اكو دم هواي كأنه مسوي عملية، وهسة عندة نزيف لازم تتغير الضمادة مالتة..

فراس:- هاي شمسوي بروحك؟؟؟ وين چنت هالفترة؟؟ شصاير بيك؟؟ ابوية ابوية مو يصيح آني أدري بي وين؟؟ صيحوه، صيحوا أبوية...

عبدالرحمن:- ما بية شيييي لتگول لاحد ...

گام يگح قوي وگعدت رهف على صوتة جفلانة أخذتهة حنين قبل متحس على روحهة وتفتهم شديصير وگالتلها:- ماكو شي حبيبتي تعالي يمي...

أخذتها حنين وراحت لغرفتها، هي نايمة يم حنين من قبل تقريب بين يوم ويوم الظهر تبقة يمهة، يعني عادي الوضع مراح تستغرب شي، نزل فراس صاح أبوية، اجة هو وأمي، امي تخبلت وتصيح:- هاي شنوووو؟!!!

وأبوية گال:- شبييك ولك؟؟

عبدالرحمن:- يابة وجع عادي ماكو شي هسة يروح...

بابا:- لااا خل نبدلك الضمادة...

فراس:- شتبدل؟!! يعني ما راح  تشرحولنة شديصير هنااا؟!!!!

بابا:- ابني اصبر شوية، لينا تگدرين تبدليها؟ لو اگعد مصطفى؟

- هسة ابدلهة بس خل اشوفة جرح قديم؟ جديد؟؟ حتى اعرف شلون اعقم المكان...

قربت شفتة وگلت:- ترة هاي طعنة مال سچينة مبينة...

فارس:- يابة شصار احد يحچي عاد...

بابا:- ابني الضابط ورة ما لزم العصابة اللي خطفوك، طلب منة يتعاون وياهم ويلزمون واحد يعرفة همين تجار مال أسلحة، يريد يخلصون على هاي الشبكة.. واخوك الله يسلمة انتحاري.. الة يحط روحة بالنص، قبل يومين وية المداهمة وكشفوه وصار اللي صار...