على خطى قلبي..
للكاتبة هند النعيمي..
البارت الرابع و العشرون
حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت 🤍
لينا...
خفت حيل گلتلها:- يعني آني شعلية؟ هو داز امة...
ماما:- اذا مو الچ ايد بيها ميدز امة، بسيطةة ييجون ابوچ واخوتچ ويصير خير..
متت من الخوووف والله آني غبيةةة، اذا مو گدهة ليش وافقت وگلتلة ييجيييي!!! امي بقت عصبية وكلما احچي وياها تصيح علية سمر اخذتني للمطبخ وگالت:- ليش تگولين اني شعلية وهو اللي داز امة؟؟ مو لازم توگفين وياه اذا صدگ تحبي لو تريدي؟!! ترة تهربچ هذا مراح يوصلكم غير لنتيجة الرفض راح يگولولة ما موافقين وبنتنة هم ما موافقة وخلص، لتصيرين جبانة، اسكتي احسن ما تگولين هيچ ترة دتخلي يحارب وحدة وبالاخير يطلع هو الخاسر الوحيد، ديسوي كلشي علمودچ وانتي بالمقابل دتسوين روحچ متريدي گدام اهلچ، اذا تريدين تعوفي بنص الطريق هيچ ليش گلتيلة ييجي؟ ليش خليتي يخطي هالخطوة؟ ديربالچ تعيدين هالكلمة گدام ابوچ لو اخوتچ هسة عبالهم مو خوش ولد وهو اللي لازگلچ وانتي بس تريد تخلصين منة...
- هاي شعليهة؟
سمر:- الطريقة اللي حچيتي بيها وية امچ هذا تفسيرهة الوحيد...
فاتت شهد وگالت:- شنو القصة لينا، ليش ما گلتيلي عليه من قبل؟ منو هذا؟ مضوجچ بالكلية؟
- لااا...
سمر:- الافندية متفقة هية وياه، يريدهة وتريدة...
شهد:- عزةة بعينچ، مو گلتي اني شعلية؟ هو داز امة؟!!!
- اييي عاد انتوا لتخوفوني بالزايد...
شهد:- لينااا، مستوعبة شدتسوييين؟!! منا الولد تدزي على اهلچ و منا تگليلهم شعلية؟!!
فاتت امي وسكتنة كلمن راحت تسوي شغلة بس صدگ خوفوني، حچيتها بلة وعي، ما فكرت من هيچ ناحية.. بقيت على اعصابي رحت لغرفتي فتحت تلفوني لگيتة دازلي رسايل هواي اخر وحدة ( من تصيرلچ فرصة طمنيني، على اعصابي ترة)، استغفر الله هسة شحچي وياه؟!! خفت مسحت كل الرسايل والاتصالات وحتى رقمة، كتبتة على صفحة بورقة ومسحتة خاف بابا ياخذ تلفوني، ياربي هو وياي بالجامعة يعني عادي يكون عندي رقمة ليش هالگد خايفة؟! ورقمة موجود بالجروب مال الدفعة ليش كتبتة!! مدااعرف شدااسوي حرفيااا، استغفر الله ياربي.. آني غبية والله، صوچي وافقت...
ورة العشاء البنات كلهن بالمطبخ بس آني و امي واخوتي گاعدين گالت ماما:- اليوم جتي مرة علية...
بابا:- منية؟
ماما:- وحدة مااعرفهة، جاية تريد تخطب الست لينا، وتريد ارجعلها خبر...
أنت تقرأ
على خطى قلبي
Short Storyرواية باللهجة العراقية ذات طابع عائلي.. على خطى قلبي أسير، يخفف عني و يرسم لي قدراً أجمل على الرغم من مصاعب الحياة.. ففي هذه الدنيا لنا نصيب من الفرح والحزن، نصيب من الحب والكره، من الثقة والخيبة، من الكبرياء والانكسار، من الأمل والألم ومن الربح و...
