على خطى قلبي

البارت السابع عشر

على خطى قلبي..

للكاتبة هند النعيمي..

البارت السابع عشر

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

شهد...

ورة فترة ست اشهر.. چنت حامل بشهر الثامن وكلش تعبانة، صدگ احس تعبت جسديا ونفسيا، دائما احس روحي ثگيلة، صار فترة انام هواية بشكل مو طبيعي، اليوم چان جمعة وماعدهم دوامات بس فارس بالشغل، ورة الغدة صعدت انام اجة فراس گال:- هااا، هم راح تنامين؟؟

- نعساانةةة...

فراس:- اروح فدوة للباندا مالتي اللي گايمة كلساع تنام...

- فراااس، هاي شبيييك؟! ترة كلة من وراك انت وابنك، والا من شوكت آني انام هيچ!!!

ضحك وگال:- هسة ابني بلة صدگ مأثر عالوضع زين آني شكو تطبكيني وياه؟!!

- وخر عني خل انام، هي ساعة واگعد لاحگني عليهةة؟!!!

باس راسي وگال:- اتشاقة وياچ حبيبي نامي، آني راح اطلع...

- وين رايح؟!!

فراس:- فارس يريد اروح بدالة للشغل، مدري يمكن حنين عدهة مراجعة يم الدكتورة ويريد ياخذهة...

- اييي صح، گالتلي البارحة ونسيييت...

فراس:- هم گولي ابنك وكلة من وراه، بلة النوم افتهمنة، التعب افتهمنة، بس مو عاد تگوم تفقدين بالذاكرة همين...

ضحكت وگلتلة:- فراااس، رووح عاااد والله نعساانة...

فراس:- رايح يابة رايح، دتشوف امك مو؟؟ تطرد بية، ديربالك من تجي تگول ماما گبل بابا...

- يگول وغصباً عليييييه، فوگ ما شايلتة ببطني تسع اشهر ويومية مموتني ولاعب بية طوبةةةةة، تاليهة يگلك بابا اول!!! ليش؟!!!

فراس:- غير آني ابوه!!! معليك بابا امك تغااار...

- فرااااس روح عااد ما بية اتعارك....

فراس:- صارت عركة يا ستااار، عمي رايح، مو صوچچ...

- ايي طبعا مو صوچييييي...

طلع وآني ضحكت، دائما يحب يتناگر، مموتني بهالسالفة لان دائما وية مااريد انام وييجي بمزاجة يداهرني ويخرب نومتي..  من راح نمت وما حسيت بروحي غير من سمعت اميرة تگعدني گالت:- شو نايمة لهسة؟! خوما بيچ بي؟

- بيش الساعة؟

اميرة:- بالستة.. شعليچ بالساعة؟ گليلي بيچ بي؟ تعبانة؟

- لاا والله صرت احسن، بس چنت نعسانةة كلش...

اميرة:- ميخالف گومي شينومچ بالليل اذا نايمة لهسة...