على خطى قلبي

البارت العشرون

على خطى قلبي..

للكاتبة هند النعيمي..

البارت العشرون

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

علي...

صارلي اسبوع تعرفت على ولد محامي استغربت لان يعرف وضعي كلة بس گال سامع عني بالمنطقة وحاب يساعدني انطاني اقتراح اخذ بصمات جبار لو توقيعة وننقل كلشي لاسمي  بصراحة الموضوع سهل لان هو دائما مو بوعية بس مداگدر اسويهة مدااگدر، ورة هالاسبوع خلص اتخذت قرار نهائي ولازم اخطي هالخطوة وشيصير خل يصير، شما يكون احسن من هاي عيشتي، گلت لامي:- يمة باچر راح نرجع للبيت لان ما عندي فلوس الايجار...

امي:- لعد مو خبلتني وتگلي لو اطلع اجدي بالشارع ماارجع لذاك البيت!!!

- مجبور، شسوي؟

امي:- مو ليل ونهار تشتغل لعد وين راحت فلوسك؟

- ترة دااروح للجامعة واصرف، هواي دااحتاج غراض، قابل گاعد بالبيت؟!

امي:- من الأول گتلك منطلع من البيت، متگدر ياابني، بس انت متتعاند...

- يمة طلعت غلطان، المهم جهزي روحچ...

امي:- خاف ميقبل نرجع!!

- أي مو بكيفة؟! بيت ابوية ترة...

امي:- راح نرجع للمشاكل والعركات؟!!

- يمة انتي ليش دائما تحسسيني آني مو ابنچ؟! شبيچ وياي؟!!

امي:- يمةة مااحب المشاكل ولااا اريدهةة...

- هسة منو گلچ راح اسوي مشاكل؟

امي:- والله يمة سالفتك مو خالية...

ثاني يوم من رجعت من الشغل الظهر رحنة وچان بس سيف بالبيت فتح الباب وگال:- شكو راجعين؟!

امي:- يمة وليدي غير نرجع؟ لعد شلون؟ يمة مشتاقتلك...

وگامت تبوس بي وهو عافهة وفات، دخلنة وسديت الباب، فتت لغرفتي بس شوية متوتر، اعرف اللي اريد اسوي غلط بس ما عندي غير حل، بقيت انتظرة يرجع فات بالوحدة بالليل كالعادة شارب ويصيح:- هااا اشوفكم راجعيين؟!! مو گلتلكم ترجعوون ومثل الچلاب تتوسلووون بيةة؟؟

امي:- طبعا نرجع وبكيفنة، هذا بيتنة...

جبار:- لااا مو بيتكم، تگول بيتنة...

راح عليهة جرهة من شعرهة وگال:- بيتچ اي، لچ لعد ذاك اليوم من اگلچ ارجعي للبيييت تبيعين ثگل براسييي موو ؟ و لسااانچ لسااانچ، طالعة عينچ ودااسمع صوتچ هواي بهالايام...

ضربهة ورجع جر شعرهة وگال:- ترجعين مو بكيفچ لاااا، ترجعيين بشرووطي آنييي..

هنا دمي گام يفور گمت اغلي رحت عليه جريتة منهة  وضربتة خلصت عليه، هو أصلا مو بوعية مددتة بالگاع وبقيت اضرب بي على وجهة دميتةةة، باوع لامي بنضرة وگال:- لو توخري لو تعرفين شيصير...