على خطى قلبي

البارت الثامن

على خطى قلبي..

للكاتبة هند النعيمي..

البارت الثامن

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

لينا...

هالفترة چانت كلش متعبة مجرد أتذكر اللي صار او احچي عنة تتعب نفسيتي فما بالك تعيشة بكل تفاصيلة لحظة لحظة!! ( اللي ما مر بهيچ تجربة يحمد ربة كل يوم.. والله لا يشوفكم مكروه بأحد تحبوه.. ربي يحفظ احبابكم ويحفظكم الهم)

من وصلنا للمستشفى فراس تخربط ونقلوه لغرفة خاصة ضغطة چان عالي مصطفى گال للدكتور:- دكتور صارلة اربع إيام ترة كل يوم يصير وياه شي ويغيب عن الوعي فترة ويصحى.. مرة منهن ضغطة هم معلگ حتى خشمة طگ دم...

الحمدلله عدت سلامات وما صارلة شي بس انطاه ادوية وگال لازم يلتزم بيهن..اما فارس ما خلوا احد يدخل عليه وبابا گال:- ماكو داعي كلنا هنا منا لباچر محد راح يشوفة.. يلاا مصطفى اخذهم للبيت...

رجعنة للبيت وبابا وفراس بقوا بالمستشفى، اول ما فتحنة الباب گالت جدة:- هااا ولكم شو مااجة وياكم؟؟

مصطفى:- جدة راح يبات بالمستشفى شوية تعبان خل يرتاح...

جدة:- ياا جدة ييجي هنا ويرتاح الة هالمستشفى؟! خاف بي شي ومتگلولي...

- لاااا جدةة اسم الله ما بي شي.. هسة يتحسن شوية شوية بس انتي علكيفچ.. محتاجين يسوولة فحوصات وهالسوالف غير نتطمن عليه؟!! خوما يطلع ويظل تعبان...

جدة:- زين چان خليتوني احچي وياه واسمع صوتة، جدةة والله قلبي صاير نار...

ماما:- بس يتأكدون من الفحوصات وتمر على خير يطلع.. گالوا يبقوه أربعة وعشرين ساعة، بلكي باچر يطلع..

جدة:- اذا باچر ماجبتوه تاخذوني للمستشفى.. تسمعوني لو لا؟؟

مصطفى:- ييجي جدة ييجي ان شاء الله...

راحت ماما على حنين چانت تبجي مبينة، حضنتها وگالت وهي تمسح على راسها:- ما بي شي ان شاء الله.. باچر نشوفة ونجيبة للبيت ونشبع منة.. لتبچين يمة ...

شوية وراحت شهد وية ابوها وحنين همين وگالوا باچر ييجون.. بالليل اجة بابا گال:- ميقبلون غير مرافق واحد وياه.. وفراس ميقبل يعوفة...

الحمدلله اول يوم ننام مرتاحين ورة ذيچ الفترة حتى غرفنة ما شايفيها بس على گد نبدل ملابسنا وهاهية.. حتى للدوام ما رحت بهالاسبوع.. وباچر ماكو دوام أصلا فنمت بسرعة من التعب بالوحدة مااحس غير تلفوني يدگ گعدت اباوع هذا فراس فتحت الاتصال گتلة:- هااا فراس شكوو؟!!

اسمع صوت ضعيف گوة يحچي:- هلو.. ليناا...

فزيت:- فارس!!! شلونك؟؟ شوكت صحييييت؟؟ عزةةة خل اگول لجدةةةة...