على خطى قلبي

البارت العاشر

على خطى قلبي..

للكاتبة هند النعيمي..

البارت العاشر

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

لينا...

مرت فترة وأخيييييراً راح يصير عرس بالبيت ومو أي عرس.. عرس التوأم.. أغلى شي على قلبي..من قبل اسبوعين آني وية شهد وحنين نحاول نختار أشياء حلوة وزينة، فارس وفراس شغلتهم يودون ويجيبون ويشيلون غراض، ( همة كل واحد عندة غرفة من زمان بس ميحبون ينامون كلمن وحدة علمود هيچ چانوا ينامون سوة) بس هسة رتبنة غرفهم وجهزناها للعرس.. اكو عرس يصير بدون حنة؟؟ اكيد لا، اليوم الحنة و يوم خميس وعندي عطلة.. گعدت الصبح رحت وياهن للصالون بحدود العشرة صح چان عدنة حجز بس گالت اذا تأخرنا وعدها زبونة  تشتغل عليها بين منجي، واحنا منريد نتأخر لان يادوب تخلص شهد وحنين واني وسمر ومهجة وياهن يعني نحتاج وكت...

بلشوا يشتغلون على شهد وحنين اول واحنا گاعدين بس تونسنة وية سمر فاتحة أغاني وخلتنة نرگص طول الوكت.. بالعادة احنة منحني العروس حتى بالحنة مال عبدالرحمن حنيناه ورگصنة وصارت هوسة بس ما رحنة وحنينة العروس.. بس شهد وحنين سونها زعلة وشلووون؟!! وميصييير.. والحمدلله تغيرت المخططات وراح نروح...

اتفقنة انه حنين تروح يم شهد لان شهد بيتهم چبير وحديقتهم چبيرة تاخذ الزلم برة والنسوان جوة بالبيت.. صار العصر ورحنة لبيتهم الاغلب لابس قفطان مغربي، كلش مناسب للحنة.. قبل ميفوتون الولد فتحنة أغاني وآني ذبيت لحم آني أخت العرسان اثنينهم وفرحتي ماأنطيها لأحد، ماما جتي بنص الاغنية گالتلي:- ليناا.. تعالي شوية رايدتچ بشغلة...

رحت گتلها:- هاا ماما؟؟

ماما:- ولچ ثگل شوية.. لحد الآن اجوي اثنين خطابة هسة شيگولون بايعتها؟؟

- لاا بالعكس يعني آني مرحة وروحي حلوة ويريدوني چنة.. شلون يگولون بايعتها وجايين يخطبون بلة؟؟.. بعدين گليلهم ماموافقة.. أبوي مينطيني...

ماما:- ياااا وفوگاها ما تستحي...

- ماماااا خليني فرحانة.. قابل يومية يتزوجون؟ مزعجين الا بنفس اليوم.. هسة آني أرگص لمنو منهم؟؟ غير كل واحد بيوم حتى أبدع...

ماما:- عود زوجي أبوچ وأرگصي بعرسة.. امشي من خلقتي...

- الة أگلة...

ضحكت وعفتها ورحت كملت ومااهتميت لأحد ...

رتبنة صينية الحنة ( حنة وشموع وياس وورد....) هواي تفاصيل رتبناها بسرعة لان اغلبها جاهزة من قبل مجهزتهن سمر.. فترة و فاتوا اخواني اروحلهم فدوة، حسيت بشعور حلوو وغريب من شفتهم فايتين من صدگ من احلى أيام حياتي چان.. جدة حنتهم الكل چان رايد هالشي، حنت شهد وحنين بايديهم وفراس وفارس بس باصبعهم، هذي التقاليد.. اخواني ثواني ومسحوها لعبت نفسهم متت ضحك چنت اصور بيهم وفراس گال:- اييي جدة تعيشييين وعمرچ طويييل وتزوجين ولدنا ان شاء الله...