على خطى قلبي

البارت الثاني عشر

على خطى قلبي..

للكاتبة هند النعيمي..

البارت الثاني عشر

حبايبي أتمنى التفاعل يكون اكثر و علقوا بين الفقرات، بتعليقاتكم البارت يكون احلى.. و لتنسون التصويت  🤍

(( عاملها بلطف، فهي اضعف من ان تتحمل، ودللها كوالدها فأكبر أحلامها ان تجد مثله، وكن حنوناً عليها كأمها فلا يُطمئن القلوب إلا أحضان الأمهات))

شهد...

ورة فترة الظهر چنت بالمطبخ وية البنات نلم بالاكل ونغسل المواعين دگ تلفوني چان فراس ( اليوم مااجة عالغدة رايح هو وفارس وعمو يكملون اوراق تخص المحل لان المالك مال المكان تغير وصايرة هوسة تخص الايجار مال المحلات) ، فتحت الخط گال:- شهد اسمعي اكو ورقة مال عقد الايجار القديم هسة تدوروهة عبالنة بالمحل بس ماكو.. احنة جايين دوروا زين باوراقي باوراق فارس باوراق ابوية اگلبوا الغرف بس كون تطلعوهااا حتى بغرفة عبدالرحمن...

- زين هسة...

سدة واني مستغربة گالت عمة:- ها يمة شكو؟؟

- يگول اكو ورقة مال عقد الايجار مال المحل قديمة.. يريدوها وصاير أعصاب...

عمة:- يمة بالمحل قابل هنا؟!!

- ماادري خل ندور خاف بالغلط جاية، گال دوروا بين غراضي وغراض فارس وابوية وعبدالرحمن.. خل ندور بلكي نلگاها لان همة واحدهم أعصاب وميتحاچة...

عمة:- هسة تطلع بالمحل ومن العصبية ميشوفون زين...

حنين:- خل ندور ميخالف.. عمة انتي وين تحطين الأوراق المهمة؟ آني چنت غراض بابا احطهن بعلبة حتى ميضيع شي...

عمة:- يمة ما عندي ولا اعرف بورقة همة ييجون ويحطون غراضهم كلمن وحدة، شمعرفني بالاوراق حتى عمچ اوراقة بيدة يحطهن بالغرفة لا ينطيني ولا شي...

حنين:- ميخالف خل ندور.. بسيطة ان شاء الله تنلگي بس خل ندور بغرفتچ عمة وية غراض عمي بلكي موجودة...

رحنة لغرفة عمتي ولگينة أوراق هواية شي مهم وشي لا اخذت قسم وحنين قسم واميرة قسم.. لينا راحت تدور بالمجرات اللي يم الچرباية بقينة ندور بس ما لگينة شي منحس الة فاتوا علينة گال عمي:- هااا لگيتوا شي؟؟

عمة:- يا رجال من شوكت تخلي هنا هيچ أوراق؟ مو الأشياء مال المحل بالمحل؟

عمو:- مااا لگيت شي ما لگيت...

فراس:- اذا ماكو هنا شوفوا فوگ...

عمو:- ابني شيوديهن فوگ؟؟

فراس:- يعني يابة هي ورقة وصارلهاا مدري چم سنة لخاطر ربك هسة وين نلگاها؟؟

فارس:- كلة من وراك لو ما جاي احسن.. شنو تتعارك وياه؟ طبعا يگوم ينبش ورانة...

فراس:- ساعة تحچون وياه بالسياسة وميفيد.. و من تعاركت وياه ما حچيتوا بس من طلب الورقة صار الحق علية...