Lihim Na Liham

03 : Tula

Consolacion, Cebu
Ika-4 ng Setyembre, 1964

Para sa ginoo na
nagbigay sa 'kin ng tula,

‎‎ ‎ ‎ ‎ ‎ ‎‎ ‎ ‎ ‎ ‎Isinusulat ko ang liham na ito dakong takip-silim sa aming hardin kung saan nakatanim ang rosas na iyong ibinigay sa akin. Nais kong makarating ka sa iyong tahanan nang nasa mabuting kalagayan datapwat tayo ay magkatagpo lamang kanina. Nasa maayos na lagay ang iyong rosas na ibinigay. Kadidilig ko lamang din sa kaibigan kong ito nitong umaga. Tungkol pala sa tula na binasa at inabot mo sa akin kanina, hindi ko maipahayag kung gaano kalaki ang aking pasasalamat para roon. Ang puso ko ay inakit nito sa paraang noon ko lang naramdaman. Ang iyong tinig na nagpaantig sa aking damdamin ay lubos kong hinahanggaan.

‎‎ ‎ ‎ ‎ ‎ ‎‎ ‎ ‎ ‎ ‎Habang binabasa ko ang iyong tula sa harapan ng aking rosas, pakiramdam ko ay alam na alam mo kung paano mo makukuha ang loob ko. Animo'y ilang taon mo na akong kilala dahil alam na alam mo rin kung ano ang mga hilig at gusto ko. Kahanga-hangang tunay ang iyong galing. Bawat salita sa mga linya ng mga saknong ay sinusungkit ang aking puso. Parang maliit na bituin na hindi nakasasawang tingnan nang paulit-ulit. Ang nilalaman niyon ay isang napaka-gandang obra, at ito ay nagpadama sa akin na naiintindihan ako ng mundo.

‎‎ ‎ ‎ ‎ ‎ ‎‎ ‎ ‎ ‎ ‎Noon pa man ay naniniwala na ako sa mahikang taglay ng mga tula. Ang iyong mga salita ay parang hininga ng sariwang hangin na nagpabalik sa akin sa kasalukuyang sandali at nagpapaalala sa akin ng kagandahan ng ating wika. Hindi ko maisip kung gaano karaming oras ang ginugol mo para ibigay sa akin ang pyesang ito at kung gaano kahirap ang pagsisikap na ginawa mo sa nakamamanghang piraso ng sining na ito.

‎‎ ‎ ‎ ‎ ‎ ‎‎ ‎ ‎ ‎ ‎Ang iyong paggamit ng mga imahe, metapora, at simbolismo ay dalubhasa at nagbigay-daan ito sa akin na maranasan ang mundo sa pamamagitan ng iyong mga mata at iyong mga salita. Lahat ng emosyon ay naramdam ko sandaling mabasa ko ang iyong tula. Tila dinala ako nito sa isang mundong hindi ko aakalaing aking mararating. Lubos kong ikinararangal na maging paksa ng iyong tula. Ang iyong mga salita ay nagbigay inspirasyon sa akin upang patuloy na yakapin ang aking sariling pagkamalikhain at pagpapahayag ng sarili at magpakailanman kong pahalagahan ang tula na ipinagkaloob mo sa akin.

‎‎ ‎ ‎ ‎ ‎ ‎‎ ‎ ‎ ‎ ‎Ako ay lubos na nagpapasalamat sa mga bagay na ibinigay mo sa akin. Para bang ito ang iyong parte ng pusong iniaalay mo para sa akin. Alam kong ang tulang iyong ibinigay ay mag-iiwan ng hindi maaalis na marka sa aking isipan. Dadalhin ko iyon hanggang sa ating pagtanda.

Lubos na nagpapasalamat,
Iyong paksa