بين فنايا الظلمات

البارت الحادي عشر

  بسم الله الرحمن الرحيم

قبل البدء طيبوا افواهئكم بالصلاه على محمد وعلى آله الطيبين الطاهرين وعجل لوليه الفرج

سبحان الله
الله اكبر
استغفر الله
الحمد الله
لاالله الا الله

ــــــــــــــــــــــــــــــــــــــــ ــــــــــــــــــــــــــــــــــــــــ
وناسينَيِ والله وكَت
جنت من أفَز الصبِح
مو علَ منبه أبَد
لاجان مرسالة

،،،،،،،،،،،، ــــــــــــــــــــــــــــــــــ،،،،،،،،،،،

ام حسين طارت بيه ثاني يوم الصبح گعدت تنظف وتطبخ وماتخليني اشيل عوده شويه وخذتي للصالون تحفني ورتبني وتريد تحجز تصبغ شعري بعد يومين.

ماادري ليش استثگلت هذا الزواج مو مثل البنات كلهن بعرسهن يگيفن وفرحانات واني چني وحده يجهزونها يزفونها للگبر مو يزفوها لرچلها

الصلاه كلش ماگطعتها نص وقتي واني اصلي بس اريد الله يرشدني للطريق الصحيح وخايفه من الخطأ والقادم

مخنوگه حيل والدنيا ضايكه بيه وبس باقيه اتحسر واتوسف على دنياي وقله حيلتي

باليل جاي اقره قرءان دخلت ام حسين وبيدها التلفون وتضحك

ام حسين: هذا رجلج يريد يحجي وياج
هلال: بس احنا بعدنا ما تزوجنا حتى تگولين رجلج

عضتلي شفه لان هوه على الخط شالت التلفون لاذنها _يلا يمه هاك هاي مرتك خطيه تستحي خجوله فدوه لعينها

اخذت التلفون وهيه طلعت بالگوه لازمته وايدي ترجف
خليته. على اذني

حسين: مرحبا
هلال: السلام عليكم
حسين: وعليكم السلام عيوني
شلونج؟

هلال:الحمد الله
حسين: الحمد الله. شنو تجهزتي لو بعدج؟

هلال: باقي وقت هواي الحك اجهز على راحتي
حسين: فدوه العينج يا وگت يومين وجاي اخذج انتي وامي ثاني يوم ووراها نعقد
هلال:  شبيك مستعجل زوجتك توفت انتظر شويه حرام

حسين: المات راح نموت وراه؟؟؟
هلال:يله مع السلامه
حسين: باي حبــــ

بعده ما كمل سديت الخط عصرت راسي بين اديه احس الجاي اسويه غلط بس ماعندي غير خيار شسوي اضيع بالشوارع مره جايه حيل ضجت وانقهرت عمري 18 سنه وهوه عمره46 سنه اكبر مني بـ28 سنه هوه شيب صار شايب واني توني طالعه من الطفوله بعندي باول الشباب شلون نتفق ونتوالم هذا اكبر من بابا !!!؟؟؟؟

شلون هانت عنده زوجته عشرت عمر 25 سنه بعدها ما مخلصه فاتحتها وخطب اذا اخذته وطحت بأي شده راح يذبني ولا يهتم ابد ولا يرفله جفن واضح كلش.

بقت فكره الرفض ببالي افكر بيها وافكر شنو راح يصير لو رفضت؟؟؟

من التعب والتفكير نمت واني ماحاسه على نفسي بالحلم شفت بيبي عصبيه وضايجه وتنتر بيه رافضه الزواج وماتريدني اتزوج وتنتر بيه وتگلي بالحلم عوفيها هاي القسمه جايه احسن منها بعيده حيل بس تستاهل الصبر والانتظار