طق طق طق.... ادخل..... استاذ أواب عندك اجتماع بعد عشرة دقايق وبعد الإجتماع ح تقابل المستثمر الجديد حجزت ليكم في مطعم الفندق طاولة رقم ..... تمام عليا شكراًِ ليك..... العفو استاذ عن إذنك.....
طبعاً الأمور اختلطط عليكم تعالو احكي ليكم حكايتي من البداية وح تفهمو الحاصل..
انا أواب حسن محمد علي موسي امي إسمها أمل عندي خمسة اخوات وأخ واحد انسام وانفال اكبر مني وبعدهم انا وأريج واحمد واسيل وآية
ابوي كان كادح رزق اليوم باليوم وم عندنا بيت كنا مأجرين إجار كان الإجار وصرف البيت والمدرسة كتير على ابوي خصوصي انو يوم بلقى قروش ويوم م بلقى ف اتطريت اشتغل وانا عمري ١٢سنة كنت في تأمن اشتغلت في البداية في السوق ببيع ليمون ونعناع بس وبعدها بقيت اشيل من ناس المحلات الشيالات واحوم بيهم في السوق عشان تنباع لي وتاني بقيت اشيل الشوايات والسلات واي شي بلف بيو في السوق كنت برهق نفسي شديد عشان اساعد ابوي في الإجار والمصاريف بعد دخلت الثانوي بديت اشتغل طلبة وبنيان كنت بشيل الطوب والمونة مع البنايين كانو بقولو لي انت صغير الجابرك شنو كنت دايماً بقول ليهم الظروف جبارة اخواتي الاتنين خلو القراية بسبب القروش انسام خلتها من أولى ثانوي لكن انفال امتحنت الشهادة وقعدت تاني في البيت كنت بلوم نفسي وبزعل في الحاجات دي عشان انا ن قادر اوفر ليهم القروش الكافية كنت بزعل شديد لمن القاهم في يوم جعانين وم لاقين البياكلوه كنت بزعل لمن اشوف البنات شايلات تلفونات ولابسات احسن لبس بزعل عشان انا م قادر اوفر لي اخواتي اللبس بالجد حياتنا كانت مأساة كبيرة💔... بعد امتحنت الثانوي جبت نسبة دخلتني تقانة معلومات IT جامعة النيلين امي وابوي كانو زعلانين شديد لانو كانو دايرني اجي دكتور وقالو دا م مجال شغل ولا ح نستفيد منو بي شي💔. ابوي من الزعل قال لي ولا قرش ما بدفعو ليك في الجامعة دي تقري نفسك بي نفسك💔. زعلت شديد لانو كنت بحب الكمبيوتر والشغل عليو وحتى لما القى لي وقت فراغ كنت بمشي المكاتب الفيها كمبيوترات عشان اشتغل فيها وكدا 💔 تعبت شديد في قرايتي دي مع الشغل وكدا كان عندي ٤ايام في الأسبوع جامعة ف كنت أيام الجامعة بشتغل بليل في مكتبة بحبسها وبنضفها من الساعة ٦ونص لحد الساعة ١٢🌿كنت بجي قبل نص ساعة من الدوام بفتش لي كتب من مجالي وبقعد اقراهم في مسافة الدوام والايام الما فيها جامعة كنت بشتغل من الصباح كمساري في حافلة واحد جارنا للظهر ومن الظهر بمشي اشتغل في السوق اي شي في الدنيا دي انا بشتغلو بشيل حاجات خرصانة رملة طوب حاجات دكان رحول اي شي بشتغلو وبليل من الساعة ٧ للصباح بشتغل في مطعم وجبات سريعة م كان عندي راحة نهائي وحتى لو مرضت كنت بمشي الصيدلية بس م كنت بمشي دكتور ولا في زول كان بعرفني القروش البطلعها كنت بشيل منها بس البكفيني للجامعة والباقي كلو بديو لي ابوي💔. كنت قاعد معاهم في البيت لكن الراجل طلعهم من البيت عشان زاد الإجار وابوي م قدر يدفعو ف رحلو لي بيت صغير شديد بقيت م بنوم معاهم بجيهم بس في الأسبوع مرة بديهم القروش وبقعد زي ساعتين وبمشي💔. اتخيل بس الأيام الما بكون عندي فيها جامعة اصلاً بشتغل فيها في المطعم للصباح يعني م بحتاج لي مكان انوم فيو وأيام الجامعة كنت بنوم يا جنب المكتبة يا جنب الجامعة او في العمارات المهجورة زي المشردين💔. ابوي وامي من الهموم العليهم م كانو بسألوني انت بتنوم وين اصلاً💔. تخيلو بس حصل بتمر على ايام م باكل فيها بكون عايش على الشراب بس ودا كلو اهلي م جابين ليو خبر. قضيت الشتاء في الشارع كنت بتغطي من البرد بي سيوتر بس حتى بنوم بيو💔كان عندي تلاتة اقمصة وبنطلونين بس كنت بغير بيهم كل مرة للجامعة والشغل قضيت ايام م يعلم بيها إلا الله بس الحمد لله على كل حال💔. كان عندي صحبي رامي كان عارف اي شي عني هو وضعهم كان كويس لكن كان بشتغل عشان يقرى براو لكن م بتعب نفسو زيي كدا كان بقول لي والله ي أواب انا خايف يوم يلقوك ميت في زاوية💔. قضيت خمسة سنوات في الجامعة وأخيراً اتخرجت م عملت اي تخريج شلت شهادتي ومشيت البيت بس وانا فرحان شديد اول مرة في حياتي افرح كدا لكن اخواتي وامي م فرحو معاي كانو بس ببكو على شكلي ومنظري كنت ضعيف شديد وحتى ملامحي دي اتغيرت شديد💔. لكن نعمل شنو حال الدنيا والظروف جبارة💔.....
.. نتـلاقى 🐼🐾
