His Blonde ( Completed )

~ 22 ~

ဘောမ်ဂယူပို့ပေးသည့်လိပ်စာတစ်ခုအရ ကနေဒါမြို့၏ Saint Joseph ဆေးရုံဆီသို့ ယောန်ဂျွန်းရောက်လာခဲ့သည်။

ဆေးရုံမှချမ်းစိမ့်မှုရယ်ကြောင့်လား မေလလယ်ဖြစ်သော်ငြား လက်ဖျားတို့အေးစက်နေခဲ့လျက်ရှိသည်။

ရောက်လာရင်သူ့ကိုအရင်ဖုန်းဆက်ပါဆိုတဲ့ ဘောမ်ဂယူရဲ့အမှာစကားကြောင့် Line ကတဆင့်ဖုန်းခေါ်ဖြစ်တာ ဒုတိယအကြိမ်မြောက်။

တစ်ဖက်မှဖြေကြားခြင်းမရှိသည့်အခါ နှလုံးအိမ်ကသမုဒ္ဒရာနက်ထဲကျောက်ဆူးဆွဲချခံနေရသည့်နှယ် တနင့်နင့်မွန်းရလျက်။

အေးခဲနေသည့်လက်နှစ်ဖက်အား အချင်းချင်းဆုပ်ချေထားစေလျက် ဆေးရုံလော်ဘီမှာ ခေတ္တစောင့်ဆိုင်းသည်။
မြင်နေရသောဥရောပမျက်နှာဖြူများနှင့် ကြားနေရသောအနောက်တိုင်းစကားများသည် ရင်းနှီးနေသည့်လေထုနှင့် ကွာခြားလွန်းသည်ကြောင့် အသက်ရှူရတာပိုမွန်းကျပ်လာသည့်အတိုင်း ခံစားရပါ၏။

မွန်းကျပ်မှုအား အနည်းအကျဉ်းဖြစ်ဖြစ် ပြေပျောက်စေဖို့ရာ လေပြေတိုက်သည့်ဆေးရုံဝန်းဆီသို့ လမ်းလျှောက်ထွက်ရန် အဆောက်အအုံထဲကထွက်လာလိုက်သည်။

အဆောက်အအုံများခြံရံလျက် တည်ဆောက်ထားသည့် ပန်းခြံငယ်။

အရိပ်အာဝါသရသော သစ်ပင်ကြီးများအောက် အဖြူရောင်ခုံတန်းလျားတို့က မြေနီလျှောက်လမ်းလေးတစ်လျှောက် အစီအရီ။

ယောန်ဂျွန်းက လူမရှိတဲ့ခုံတန်းလျားလေးတစ်ခုမှာဝင်ထိုင်လိုက်သည်။

နွေဦးလေပြေတိုက်ခတ်တိုင်း ပနံသင့်စွာရောယှက်သည့်ရောင်စုံပန်းပွင့်တို့၏ ရနံ့သည် ပူလောင်သောစိတ်တို့အား ငြိမ်းချမ်းစေရန် ဆောင်ကျင်းပေးလျက်ရှိ၏။

ပန်းခြံငယ်လေးတစ်ဝိုက် အကြည့်တို့ကိုအလည်ပို့သည့်အခါ ပူပန်စရာမရှိကြသည့်နှယ် ပြုံးနေကြသော အပြုံးပန်းများအား ရောင်စုံပန်းရုံများနှင့် တလိုက်တဖက် တွေ့နိုင်သည်။

အမြင်အာရုံကိုဖမ်းစားလိုက်သည့်ငွေချည်မျှင်များ။
တုန်လှုပ်သွားသည့်ရင်ခုန်သံလှိုင်းဟာ တမ်းတမှုကိုအတည်ပြုသည့်စည်းချက်သဖွယ်။