သခင် (Completed)

အပိုင်း(၁၀)

Unicode

မိုးကလည်းရွာသဖြင့် ပျင်းတဲ့စိတ်နှင့်အတူ
သခင့်ထံမှ စကားတွေကြောင့် ကျောင်းသွားချင်စိတ်မရှိတော့ပါ။

ဖူးမြတ်ဆီဖုန်းဆက်ကြည့်တော့ သူလည်းကျောင်းမသွားဖြစ်ပါတဲ့။သူတောင်မသွားရင် ယောက်ျားလေးတွေဖြစ်ကြတဲ့မောင်တို့ဆိုရင်မေးကြည့်စရာပင်မလိုတော့ပါ။

နာရီကြည့်မိတော့၁၀နာရီထိုးရန်၁၀မိနစ်သာလိုတော့သည်။သခင်ကတော့အိမ်မှာရှိမနေတော့။မိမိအခန်းထဲကိုဝင်လာပြီးနောက် အဝတ်အစားလဲကာ ကျောင်းကိုသွားခဲ့ပြီ။

ဒီအိမ်အကြီးကြီးမှာ မိမိတစ်ယောက်တည်းသာရှိနေသည်။သခင်ပါရှိရင်ကောင်းမယ်လို့တွေးလိုက်မိသေးပေမဲ့ ထိုအတွေးကိုကိုယ်တိုင်ပင်လက်မခံဖြစ်မိသည်။
သခင်ရှိနေသော်လည်းသခင်သည်ကိုယ့်ကိုစိမ်းစိမ်းဖန်ဖန်သူစိမ်းသက်သက်သာ သတ်မှတ်ထားသည်မဟုတ်လား။

"သခင်"

နှုတ်ကထိုနာမည်ကိုကခပ်ဖွဖွရေရွတ်မိတော့ ရင်ထဲတွင်ဆစ်ခနဲကျင်သွားရသည်။
သခင်သည်လူတင်မဟုတ် နာမည်ကိုတမိရုံမျှဖြင့် နှလုံးသားကိုနာကျင်စေသည်။ဘုရား...ရေ။ကိုယ်ဘာတွေတွေးလိုက်မိသလဲ။သခင့်ကိုကိုယ်တိုင်ကပင်သခင်လို့ခေါ်ခဲ့တာမဟုတ်လား။ဘာကြောင့်များအခုမှ
သခင့်နာမည်ကနာကျင်စေတယ်လို့တွေးလိုက်မိရသလဲ။ဟင့်အင်...။မဖြစ်ချင်ဘူး။
သခင်ကနာကျင်‌စေတဲ့လူလို့ နည်းနည်းမှမမြင်ချင်ခဲ့တာပါ။ တစ်ချိန်ချိန်မှာ ထိုသို့အပြစ်မြင်မှုသေးသေးလေးတွေများလာရင် သခင့်အပေါ်ကို စိတ်ခုသွားမှာမျိုး၊ မပြောကောင်းမဆိုကောင်း သခင့်ကိုစိတ်နာသွားမှာမျိုး ဖြစ်မှာကြောက်မိသည်။
ဒါပေမဲ့ ဒါသည် အပြစ်မြင်မှုလေးမဟုတ်ဘူးမလား။စိတ်ထဲထင်မြင်တာကိုမှတ်ချက်ပေးရုံပဲမလား။သေချာပေါက်ထိုသို့သာဖြစ်ပါစေ ဆုတောင်းမိသည်။

***

အိမ်ခြံဝန်းထဲမှာသခင်ကြိုက်တဲ့ ညမွေးပန်းလေးတွေစိုက်ဖို့ ရည်ရွယ်ခဲ့သည်။ထိုရည်ရွယ်ချက်အတိုင်း အပင်လေးများကိုလည်းမှာထားပြီးဖြစ်သည်။ကိုယ်တိုင်ကဘာပန်းကိုမှ အထူးတလည်မနှစ်သက်မိပါ။ကြုံတဲ့ပန်းကိုကြုံသလို အလှကြည့်ရင်ကြည့်၊မဟုတ်ရင် ဘုရားပန်းတင်တာ၊မွေးကြူပစ်တာမျိုးလုပ်တတ်သည်။ဒါပေမဲ့ သခင်ကြိုက်နှစ်သက်တဲ့ထိုပန်းကလေးကတော့ချွင်းချက်ဖြစ်ခဲ့သည်။သခင့်ကို ရင်ခုန်မိနေမှန်းမသိခင်ကတည်းက သခင်နှစ်သက်တဲ့ထိုပန်းကလေးကို သခင့်လိုမျိုးလိုက်ကြိုက်မိခဲ့သည်။ သူများတွေကထိုပန်းကိုဘာလို့ကြိုက်သလဲလို့မေးလာလျှင်ဖြေစရာအဖြေဟာတစ်ခုတည်းသာဖြစ်လိမ့်မည်။သခင့်ကြိုက်တဲ့ပန်းကလေးဖြစ်လို့ဟု ဖြေမိမှာအသေအချာပင်ဖြစ်သည်။တကယ်တော့ သခင်သည်ညမွှေးပန်းကလေးတွေကိုဘာကြောင့်သဘောကျတယ်ဆိုနဲ့အဖြေကိုတော့မသိခဲ့ပါ။