IN THE DARKNESS

Episode [ 16 ]

သို့ဖြင့် ဂျွန်​ဂျောင်းဂုသည် သူ့ဆီမှ ကတိစကားရသည်နှင့် နှုတ်ဆက်ကာ ပြန်သွား​လေ​တော့သည် ။ သူတစ်​ယောက်တည်းသာ ဆက်လက်အိပ်မ​ပျော်​နိုင်​​တော့ဘဲ အ​တွေးများလျက် ကျန်ခဲ့ရပါ​တော့၏ ။ သူ့၌ ငြင်းဆန်နိုင်သည့်အင်အားလည်းမရှိ​ချေရာ လက်ခံလိုက်ဖို့ရာသာ ရှိပါ​တော့၏ ။ တစ်ခုတည်း​သော သူလုပ်နိုင်သည့်အရာမှာ အိပ်စက်ခြင်းသာဖြစ်ရာ အိပ်ရာထက်လှဲချကာ ​စိတ်​ပေါ့ပါးစွာ အိပ်ပစ်လိုက်ပါ​​တော့သည် ။ ​ခေါင်းအုံးနှင့်​ခေါင်းထိမိသည်နှင့်အိပ်​ပျော်တတ်သည့်သူ့အကျင့်​ကြောင့် သိပ်မကြာခင်ပင် ​​ဟောက်သံ​ပေးလျက် အိပ်​မောကျသွားပြီ ဖြစ်သည် ။

မင်ယွန်းဂီမှာ အ​ဆောင်​ရှေ့မှ ဂျွန်​ဂျောင်းဂု၏ ​အော်​ခေါ်သံကို ကြားရ​တော့မှသာလျှင် အလန့်တကြား နိုးလာရ​​လေသည် ။

" တတိယသခင်​လေး...နိုးပြီလားဗျ "

သူ့ခင်မျာမှာ အိပ်ယာထက်မှ အလူးအလဲထရင်း အိပ်မှုန်စုံမွှားဖြစ်​နေသည့်မျက်လုံး​တွေအား လက်ဖြင့် ပွတ်သပ်လိုက်သည် ။ ဦး​​နှောက်က​လေး ​ကောင်း​ကောင်း လည်ပတ်သွား​သောအခါမှသာ သူသည် သြရှရှအသံဖြင့် လှမ်းထူးလိုက်၏ ။

" နိုးပြီ ။ နိုးပြီ ။ ဝင်လာလို့ ရပါတယ် "

" ​မဝင်လာ​တော့ပါဘူး ။ အေး​အေး​ဆေး​ဆေး လုပ်ပါ ။ ကျွန်​တော်​စောင့်​နေပါ့မယ် "

ဂျွန်​ဂျောင်းဂုက အပြင်ဖက်က​နေ လှမ်း​ပြောလာသည် ။

" ဒါဆိုလည်း ခဏ​လေး​စောင့်ပါဦး "

သူ နိုးလာ​ကြောင်းသိသည်နှင့် အသင့်​စောင့်​နေသည့်အ​စေခံ​လေးသည် မျက်နှာသစ်​ရေနှင့်ပုဝါအပါအဝင်ယူဆောင်လျက် အခန်းတွင်းဝင်​ရောက်လာ​လေသည် ။

သူသည် သွက်သွက်လက်လက်ပင် မျက်နှာသစ်လိုက်ပြီး​နောက် အဝတ်အစားလဲကာ ထွက်လာလိုက်သည် ။

ဂျွန်​ဂျောင်းဂုသည် သူ့အား မြင်​သော် ပြုံးပြလာ၏ ။

" သွားကြရ​အောင် "

သို့ဖြင့် သူသည် နံနက်စာ စား​သောက်ရာ​နေရာသို့ ဂျွန်​ဂျောင်းဂုနှင့်အတူ တိတ်ဆိတ်စွာလမ်း​လျှောက်လာခဲ့လိုက်သည် ။