Day ဒေး (Completed)

Episode 6

''ခဗျားက ဘာလဲ''

ရှိုက်ထားသည့် Cigarette က အငွေ့တို့ကိုမှုတ်ထုတ်လိုက်ပြီးနောက် မျက်ခုံးများစုကျုံ့လျက် မေးလာသောအခါတွင် နှုတ်ခမ်းတဖက်ကွေးညွှတ်ရုံပြုံးမိသွားသည်။အနီးကပ်ကြည့်သည့်အခါမှပို၍ထူးဆန်းသည့်အညိုရောင် မျက်လုံးသဏ္ဍာန်တို့မှာ ညို့ဓာတ်ပြင်းရှလွန်းပြီးCigarette ကိုလက်ချောင်းတွေကြားညှပ်ထားသည့်ပုံကအစ  ကြည့်ကောင်းလွန်းနေ၏။

''ကိုယ်က...''

''ကျစ်! ကျုပ်မေးတာဘာလို့ဒီနေရာကိုလာတာလဲ ဒီနေရာက ကျုပ်တစ်ယောက်တည်းနေတဲ့နေရာ''

ထိုသို့ပြောလိုက်သည့်အခါ သဘောကျမိ၍ ခပ်ဟဟရယ်လိုက်သည်။

''ကပ်စေးနည်းလိုက်တာ''

တစ်မြို့လုံးကိုခြုံငုံမြင်နေရသောမြင်ကွင်းဘက်သို့မျက်နှာမူ၍လက်ပိုက်ကာကြည့်ရင်းပြောလိုက်တော့ ဒေးက ထိုင်ရာမှထလာပြီး ကိုယ့်အနားလျှောက်လာ၏။

''ဘာ!''

''ဒီလောက်ကောင်းတဲ့နေရာလေးကိုတစ်ယောက်တည်း အပိုင်စားလိုချင်တာတော့ မတရားရာကျတာပေါ့ ညီ''

''ဟေး ခဗျားအခုဘယ်သူ့ကိုစကားပြောနေတယ်ထင်သလဲ''

လေသံခပ်မာမာနှင့်တည်တင်းနေသော မျက်နှာပိုင်ရှင်ဘက်သို့လှည့်ကာ အနားသို့တလှမ်းချင်းစီတိုးသွားလိုက်သည်။ ထို့နောက် ဒေးရဲ့အရှေ့တွင် လက်ကိုပိုက်ထားလျက် မျက်နှာချင်းဆိုင်ရပ်နေလိုက်၏။

''ဒေး...ဝဏ္ဏဒေး''

Cigarette ကို နောက်တကြိမ်ဖွာရှိုက်ရင်း ကိုယ့်ရဲ့ မျက်နှာရှေ့သို့အခိုးအငွေ့များကိုမှုတ်ထုတ်လိုက်ကာ မျက်ခုံးတဖက်ပင့်လာပြီးနောက်။

''ကျုပ်ဘယ်လိုကောင်လဲခဗျားမသိသေးခင် စကားပြောဆင်ခြင်လိုက်တာကောင်းမယ်''

ထင်ထားသည်ထပ်ပို၍ ဂျစ်ကန်သည့်အခါ ထပ်သဘောကျမိပြန်သည်။အယောက်၁၀၀၀တွင် ၁ယောက်လောက်မရှိသည့် Typeမျိုးဖြစ်သည့်အတွက် ဝဏ္ဏဒေး အား စိတ်ဝင်စားပြီးရင်းစိတ်ဝင်စားမိလာ၏။အနည်းငယ်ဖရိုဖရဲဖြစ်ကာရွဲ့စောင်းနေသော Duty Coat အဖြူရောင်ဆီလက်တွေလှမ်းလိုက်ပြီး တည့်မတ်အောင်ပြင်ပေးလိုက်၍။