قيد الدُجى

Part ²⁹

"qayd pov "

طلعت من البيت ركض أريد الحگ على الاجتماع لأن الواضح من صوت الرئيس أن لازم أجي وحالاً كوني أنا مسؤول عن هالتحقيق كله ، دخلت للسيارة وشغلتها وانطلقت بالطريق الطويل ، مرت ساعة ووصلت دخلت للقاعدة رحت بدلت ملابسي و دخلت على القاعة شفت الكل متجمهرين ، سلمت ورحت گعدت مكاني انتظر الرئيس

الي موجودين بالقاعة كلهم أعرفهم واحد واحد وبالتفصل الممل لكن ماگدر أذكر صفات أي واحد بيهم لأن اي شخص ممكن يلگطها وهي طايرة لهذا
رح اتحفظ عن ذكر أي معلومة عنهم ، سلامة لي ولعائلتي

دخل الرئيس وسلم علينا بألقابنا المعتادة ، بدأ يشرح ليش هم هنا وشنو صار ولما استدعاني علمود اكمل مدام هي مهمتي وانا المشرف عليها ، تعرضت للتساؤولات و عن منو كان جاسوسي ولكن رفضت رفض قاطع اكشف هوية دُجى خوفاً عليها وعلى اهلها

: صگر شنو يظمن أن هالجاسوس هو معنا مو ضدنا أو يستدرجنا؟

قيد : واثق منه

الرئيس : مدام صگر متأكد من الجاسوس إلي أرسله چا هاهية

قيد : شكراً رئيس

انهيت كلماتي وبدأت اشكل خطة محكمة للأقتحام وبفضل اجهزة التعقب والتسجيل الصوتي ألي نشرتهن دُجى بكل مكان گدرنا نعرف يمتى اجتماعهم الجاي ومنو رح يكون موجود والي رح يتواجدون هم الي سوينا كل هالخطط علمودهم

كملنا الخطة ووزعنا الفرق الي رح تنتشر حول المكان
و زيد كان موجود همين والي اقلقني اننا انمنعنا نرجع لبيوتنا إلى أن ينتهي الاقتحام ويتم القبض على الارهاب كلهم وكذلك انمنعما أن نستخدم أجهزتنا تحسبناً لكل شيء ممكن يصير

مر يومين وگعدنا على صوت الرئيس وهو يعلمنا أن لازم ننطلق بأسرع وقت كون اننا سمعنا أنهم قدموا الاجتماع مالهم لأسباب طارئة ، وبالفعل بغضون ساعتين كملنا التجهيز وبدأنا ننتظر أمر القائد إن ننطلق وبالفعل بتمام الساعة 2 الفجر بدأنا نتحرك

چنت أنا القائد وأنا إلي سيارتي متقدمة وچان برفقتي بالسيارة زيد والرئيس ، أخذنا طول الطريق نحذر الجنود الي برفقتنا ولازم يتخفون ويغلقون كل الأجهزة الي بحوزتهم إلي ممكن يكون بيها تعقب وبالفعل تم الأمر ، ولما گربنا نوصل للموقع بدأنا نسمع من أجهزة التنصت بعض الكلام إلي دار بين قائد المجموعة والارهابيين

: رح تبدأ مرجانة بخطف البنات وبعد يومين رح نروح نستلمهن ولما نكمل رح نفجر الموقع ******
وكذلك نفجر **** هاي اول مرة رح نفجر بهالمحافظة فلازم هالتفجير يكون قوي ولازم ما ننكشف واهم شيء نزرع قنابل بالمنطقة******
علمود يگولون تفجير عبثي وما يربطون الأحداث

بدأ دمي يفور هذول شنو يخربطون ، ماگدرت اتحمل هذول يخططون يفجرون المنطقة الي بيها اهل العرمة ، زودت سرعة السيارة علمود نوصل بسرعة مدامهم كلهم مجتمعين ماريد ولا فرد من أفراد هاي العصابة يطلع ، وصلنا للمكان المنشود ولكن وگفنا السيارات بعيد عن الموقع علمود لا يشكون او يسمعون شيء