لا زال لمى وابوها مصطفى في المعبر الوقت كان ظهر ..لمى تعبت شديد و هي بتحاول تلاقى مويه للشراب بايي مبلغ لكن ما موجود ..
وشايفه خط الباصات كيف ما متحرك و الناس بتشكي ..
بتتواصل معاها اختها نهله الكانت في الامارات مستقره هناك و متزوجه من طارق ..
نهله كانت قلقانه عليهم شديد بالذات لما لمى بتحكي ليها بتعب ابوهم قدر شنو و ماف حل الناس واقفه يومين ما اتحركو من مكانهم و كميه و تكدس بتاع باصات ومافي خدمات و حر و عطش و جوع في ناس بتموت 😞
نهله في الامارات متزوجه و عندها بت و كانت والده حديثا برضو بت لسه ليها كم يوم و تعبانه شديد و حالتها النفسيه من الحاصل في البلد و في ابوها واختها الصغيره المن الحصل بقت في حالة ما طبيعيه زياده من العليها 😓 احساسها بالذنب اتجاه مصعب غير منها شدييييد ١٨٠ درجه و بعد ده الحصل عليهم من اقتحام الدعامه بيتهم و بعد رفعوهم في التاتشر 💔 وحصل ما حصل من تجاوزات في حقها و حق ابوها 😭😭😭
تفاصيل الحصل دكتورة نهله ما عايزه تتذكره ول تتخيله كيف لمى اتحملته 😖و كيف ابوها قدر يعيش بعده
لمى في المعبر في اثناء ما بتحاول تلاقي قارورة مويه لابوها و بعد جهد جات عشان يشرب لقت ابوها زي الداخل كومه ما برد عليها و لا بتكلم و مغمض عيونه
لمى انفعلت شديد حست ابوها بضيع منها و هي واقفه تتفرج ما عارفه تتصرف ولا في يدها حل ..
انهارت و بقت تبكي و تصرخ و تتجرس و تتلفت لزول يقدر يساعدها ..
اتلمو فيها الناس و يحاولو يفوقو فيه واحد من الناس البجيبو المويه و العصاير من حلفا للمعبر سايق بوكس مع جماعه شالوه و ختاه و لمى ركبت معاه و ساقه رجع بيه حلفا نزله في المستشفى رقدوه انقذوه بدربات اول شي ..حتى بعد داك شافو موضوع الضهر و الكدمات
واحد من الناس الوصلو معاها ابوها رجع للمعبر بعد ما شال رقمها وقال ليها لو الباص اتحرك يديها خبر
اما الكان سايق البوكس بعد ما عمل اللازم استأذنها قال ليها انا هسه مشغول لمن اخلص بجي اشوفكم . .
وبالفعل في وقت متأخر جاء راجع ليهم شايل معاه كيس فيه ساندوتشات و عصاير طازجه ..
لمى كانت منهاره حرفيا حاتم اداها الساندوتشات و سالها من ابوها الكان ماخد علاجات و مسكنات قويه و نايم ..
اقترح علي لمى تمشي البيت معاه ترتاح شويه و تغير و ترجع تاني للمستشفى لكن رفضت بحجه ما بتخلي ابوها براه .. بالرغم من انه طمنها انهم بيت عائله كبيره
لمى جاتها فوبيا و عدم ثقه في ايي زول 😞
من الاحداث الحصلت معاهم
اتشكرته شديد و قالت ليه بابا شكله تعبان شديد و حركته بقت مشكله ما بقدر اسنده براي و ما ممكن كل مره اعذب الناس معاي او ممكن ما القى زول يساعدني انا عايزه اشتري كرسي متحرك عشان يسهل حركته و تنقلاته .. لانه التقارير و الصور بتقول انه عنده اصابه في الفقرات و الموضوع اتفاقم من الاهمال وعدم العنايه الطبيه اللازمه في الوقت المناسب
