مصعب قام من جمب تسنيم و شايل هم كيف يتصرف مع امه و مرضها و بالذات بعد مرام جات راجعه من المدرسه ولقت البيت فاضي و ناس عمها حكو ليها بالحصل جات للمستشفى .. قلبت الدنيا قلب بالذات بعد عرفت امها دخلت في غيبوبه 😭😭😭😭😭
مرام مشت علي مصعب و وشها مليان دموووع و بكت مسافه و مصعب يربت علي كتفها و يطمنها و يسكت فيها وقاليها ما تقلقي ان شاء الله حتكون بخير .. مع انه عارف في قرارة نفسه الوضع خطير زي ما شرحت ليه دكتوره نهله بشفافيه 😔
بقى هدفه يشوف ليه قروش عشان ينقلو امه لمستشفى فيها التصوير المقطعي عشان يقيمو الحاله .. شال تلفونه و زح بعيد من الناس و بقى يتصل علي اصحابه الهم نفس حالته لسه ما اتوفقو في شغل
كل الطرق كانت مقفوله قدام مصعب و يدينه مكتفه
ما كان بملك شي الا تلفونه كان جديد رسله ليه علي ولد عمه من السعوديه هديه التخرج ..
سوق التلفونات في الشهداء امدرمان كان قريب من مستشفى امدرمان الحكومي ..
اول شي فرمته ومسح كل البيانات الفيه و مشى للبيت جاب شاحنه و كرتونته و سماعته عشان ترفع من قيمته و باعه لقى فيه مبلغ كويس اشترى ربيكا ركب فيه شريحته
💫💫💫
مصعب كان واقف في نقل امه لمستشفى تاني عشان الصور و اجر الاسعاف و نقلوها عملو الصور المقطعيه .. لمن سأل عن تكاليف المستشفى الخاص للحالات الزي حقت امه كان سعر خرافي لانها محتاجه عنايه مركزه ..
اضطر رجعها تاني للمستشفى الحكومي ومعاهم الصور و التقارير شافهم الدكتور و شكله كان واضح انه ما مطمن للوضع .. وقال ليه نشوف تاني لحد بكره و ناخد صوره تاني و نقيم الوضع اذا في تحسن ول لا 😒
مصعب داخليا كان منهار و حاسي بفراق امه بقى مسأله وقت لا يتعدى ال ٣ يوم بس متماسك عشان ابوه و اخته
ابوهم حاج ابراهيم حرفيا بقى في عالم تاني ولا مويه دخلت جوفه لمن ريقه دقيق دقيق و ضهره تاعبه لحد المساء
دكتوره نهله اتصلت بمصعب و قالت ليه
: كيف بقت الوالده مشيتو عملتو الصور ؟
: ايوه نقلناها بالاسعاف و عملنا الصور و رجعنا
: ليه انا قلتا ليك حولها لانه وضعها بتحتاج تصوير علي كم مره و حتتعب كل مره تنقلوها و ترجعوها
: والله بنسأل لسه اذا في مستشفى فيها الجهاز ده و اسعارها مناسبه شويه
: خير ان شاء الله . . على كلأً الاسعار قريبه لبعض مافي فرق كبير .. لكن اذا ماف امكانيه ما مشكله عادي في ناس بتطلع تصور و ترجع ما تقلق بس اذا ممكن ترسل لي التقرير بالواتس
: دقايق خليني اشوف تلفون فيه واتساب و ارسلها ليك ..
:بتلفونك عادي ما مشكله ..
