تاني يوم الصباح بدري التنبيه دق صوت الآذان معلن عن صلاة الفجر لمى تصحى بصوت كركبة ابوها دخل للحمام و مع صحيتها حاسه بصدااااع راسها حيتكسر لمن مكشره حواجبها
و قامت بقت تهبش في شنطتها علي دواء للصداع ابوها طلع بره الصاله صلى في كرسي الصفره ..
كانت لمى شايله حبوبها و ماشه للمطبخ تشرب مويه و تبلع الدواء ..
كانت لابسه عبايتها صلت الفجر حاضر .. ابوها بعد خلص و سبح سالها اذا كانت بتبلع حبوبها بانتظام و قال ليها شكلك ما ماخده بالك من نفسك انفعالك الامبارح ده ماف داعي ليه كان هسه في ظرف شهر جاتك مرتين بعد ما قلنا خلاص بقينا كويسين 😔
: بابا عادي ما تشيل هم كده ده مرض ملازمني ما ببقى كويسه انا راضيه بالابتلاء ده الحمد لله بتجيني وانا في البيت انا كل خوفي تجيني وانا في الشارع ول بره البيت
لكن ابشرك تاني حخلي بالي من اكلي و شرابي و علاجاتي ما تشيل هم انتا ..
حوالي الظهر اتصلت عليهم نهله تسالهم كيف بقو وهل لقو الشقه مريحه ول لا و قالت ليهم عمر اتصل بيها و طمنها انه كل شي تمام
واعتذرت انها ما قدرت جاتهم امبارح بعد طلعو جرح العمليه القيصريه وجعها شديد و شكله التهب
لمى بقت تنصحها انها تهتم بنفسها وما تشيل لينا تقيله و ترتاح و تهدي اعصابها انهم كويسين
: لمى انا عايزه ابقى كويسه وانزل الشغل باسرع فرصه عشان اقدر اساعدكم ☹️
: انتي مجنونه يا بت نحن تمااام وانا من بكره ح انزل اشوف لي شغل ايي شي ان شاء الله .. ما الا دكتوره ..
لمى مع ابوها قضو اليوم يحكو و يتونسو و مبسوطين و يضحكو
: انتي عارفه يا لمى يا بتي انا مبسوط بالشقه دي مع انها استديو صغييير شديد لكن حاسي براحه و اني حر ما مقيد مع ناس مع انه بيت نهله بتي كبيير فيلا لكن ما كنتا مرتاح 😔 الفارقين معاي لينا و لانا 🥰
: وانا برضو يا بابا مرتاحه لاني حاسه بيك مرتاح 🥰
مر يومين و جات نهله مع بناتها قيلت معاهم كانو مبسوطييين بيها شديد و بالبنات 🥰
لمى ساقت لينا معاها للسوبرماركت و اشترت ليها حاجات حلاوات و شيبسات و عصاير و جابت مكونات بيتزا و بدت تعمل فيها ونهله ما مصدقه لمى حتطبخ ليهم 😅
ظبطت بينزا رهيبه بالفرن حق الكهرباء
لمن ضاقتها نهله استغربت كيف طلعت كده رهيييبه 😃
: السر في كاسة الزبادي و الحليب ما فيها مويه
: بيتزتك دي رهيبه حنسميها بيتزا لمى
سالتها نهله اذا ام طارق و ريل جو من عجمان 😏
: طبعا جو تاني يوم طوالي ولمن عرفو بالمشكله قالت بكل برود ليه يا طارق ما كان في داعي و بس سكتت اما بتها الزي العقرب دي عايشه في عالم براها عازله نفسها كله كله عن الناس كأنه ماف زول مالي عينها . .
ما صدقت لقت ليها شغل بتطلع من الصباح ما بترجع الا انصاص الليالي 😏 احسن ريحتنا من وشها ما بتأجز الا الجمعه ومرات الجمعه زاتها بتشتغل اوفرتايم و يا بت ده غير الاتصالات ولو شوفتي الصوت و المياعه لمن تتصل بالمدير شكلها دايره تجكسه ما تقولي مدير و موظفه 😅😅😅
