بطريسـا

Bart 34

بسم الله الرحمان الرحيم

- يردونك

بطريس : المواضيع كلها سديتها ما الكم يمي شي ، واذا تردوها حرب انه الها تعرفون منو اني - واعوذ بالله من كلمة اني- ما ابقي واحد يتنفس الهوئ

طلع ورقة وخلاها بجيبي :- اني عبد مأمور اذا عندك حجايه اتصل على هاذ الرقم

طلعتلة طلقة من جيبي وخليتها بجيبة :- اذا كلامي ما يوصل اكتل روحك بهل طلقة ، احسن ما اني اكتلك و اكتل شكو واحد من دمك

- يوصل

هديته وهوا رجع منين ما اجه ، زرنه بسرعة واشتريت تراجي للبنات ورجعنه ، ما صارت زيارة صارت جهنم علينه ، كعدت ويه اخوي بغرفتي وسولفتله والحجِي دخل علينه

حجِي كريم : شنو الحجي الدزيته الهم

بطريس : يابه اسمع مني اني طالع ويه اهل بيتي واجه يمشي وراي ، كضيته كلتله ليش لاحكني يكلي يردونك يعني شسويله اصفكله ، كلتله كل المواضيع اني سديتها ماعندكم يمي شي واذا تردون حرب انه الها ، ليش هلكد مهتمين الي ، اني اتبريت منهم ليش يلحون عليه 

حجِي كريم : اكيد شافوك شوف وين ، من انكطعت اخبارك محد منهم دبرها ، هسه بس رجعت كلها تريدك

بطريس : اني كملت لـاربعين سنة بعد ما الهم شي يمي ، وصللهم هل حجي اني اكتفيت والحمد لله ، عندي حياتي ماريد اخربها اكثر

حجِي كريم : بس هاذه حجيته شو همه مغثوثين مادري شبيهم

بطريس : هددت المرسال مالتهم ، يكلي ما اوصل الحجي هاذ الرقم وانتَ اتصل عليهم وكللهم ، خليت طلقه بجيبة وكلتله اذا كلامي ما وصل انتَ وعائلتك أكتلكم

الحجِي صفن وكام :- امشي اطلع لا شوف شعبالهم ، لا تخنسون وحدكم خنستكم تخوف

بطريس : هسه ديلا عساس فاطمة وزهراء مانشرن السالفة

حجِي كريم : كدامهن صار الحجي؟

بطريس : حتئ جهالي سمعوا الحجي وشافوا بعيونهم ، اكلك غير بعدنه ما زايرين جفت عليه ، ربك ستر ما جنت شايل سلاح والحمزة اكتله

حجِي كريم : السلاح شيله من راسك والحسين ماخليك عايش اطلع منها اني احلها لا تضل تمسلت

اني دلغمت وهوا طلع :- وحگ كفيل زيَنب اطب عليهم طبه اخليهم يتشاهدون

احمد : اكلك خلي نطلع غرفتك بارده

بطريس : چا غير مشغلك السبلت هسه عافيتك ردت مكعدينك بالحر الكوا"ويد

احمد : لو جايب سته سبعه نخلي البيت مجمده

بطريس : مو كاعد على بنك الرافدين

احمد : ااااء چا وينهن هذنيج

بطريس : ماطلعهن عايفن للجهال ، هسه ضال على الدفتر كل شويه اسحب من المصرف ، خلي اشوفلي شغله عمله احير بيها ، هاذ ياسين كلتله بس طلعلي معدل اجيبلك سيارة ، وصايره عليه خبيصه