بسم الله الرحمان الرحيم
زهكت بيها وهمه ضلوا يركضون منا ومنا ، مددته بالكاع وخليت أيدي ورئ ضهره :- اني الك اريد اشوف منو تفلش راسها وابوها واكف ، راح اجي انعل والديكم وين الحبل ولد الكلب
جابولي الحبل وربطته اديه :- تفلش راسها مو جيبي السجينه جيبيها ، اليوم اخلي الله يتبره من بيت الحجِي كلهم
انطتني السجينه كصيت الحبل وربطت رجلي ، اخذت وصله وشديتها على حلكه :- يابه قسمًا عظمًا اليفك هل چلب ابن الچلب ، اسوي بي انكس منه سمعتوا
همه ما جاوبوا ، زهكت بيهم :- سمعتوا؟
همه يهزون برأسهم ، وفاطمة مكرفصه تبجي يم السنك ، وياقوت حاظنتها :- كافي بويه تعالي يابابه تعالي كومي
كومتها وخليتها بحظني :- كافي بويه هاهيه حبيبتي لا تبجين ماصار شي ، دوري وجهج لا تباعين عليّ معليج بي يستاهل
فاطمة شهكت وكالت :- راد يضربني بابه
ضميت وجها ماخليتها تشوفه :- هوس هوس كافي حبيبتي كافي بويه ، خليهم ياكلون زقنبوت ماكو ريوك اليوم ، زهراء اخذي اختج وياقوت والريوك واصعدي فوك امشي ، و تقفلين الباب انعل والدي والدي اليصيح وحده بيهن سمعتوا
كاظم : اني راح انام بغرفتك نعسان
بطريس : موسئ ، ياسين ، يامين كملوا مراجعة وروحوا للمدرسة اني هسه راجع
اخذت الصينية وطلعت رحت لهارون ، طالع بدون ريوك نوب يتخربط :- الله بالخير بويه الله يساعدكم
- هلا عمي هلا
هارون : بويه ها يابه اجيتك
نزل هارون ابني ويباوع عليه :- هلا بويه ها شلونك جبتلكم ريوك ، بويه لو رايح لجامعتك مو احسن عوف الشغل هسه
هارون : ماكو اله الخير بشوفتك ، بويه بس ضالين نصفن خليني اشتغل احسن ، امير امير ابوي جابلنه ريوك
امير : هلا عمي تعال اتفضل يولد تعالوا انزلوا نتريك
هارون : بويه فوت اتريك ويانه
بطريس : والله بويه اجيت علمودك ، ما اريد اريوك شبعان
هارون : تعال بس لكمه
لحوا عليه دخلت وياهم على الواهس بلعتلي لكمه وكمت :- ديروا بالكم على الصينيه تره عزيزة هاي من زمن صدام عدنه
امير : ياعمي احنئ من فيصل الاول عدنه خاشوكه امي مسويتلها اطار بالمطبخ
بطريس : زين لو اكلك اني عندي كتب من زمن الامام الكاظم ، ما موجودة عند كل واحد
امير : ااخ صدك عمي
هارون :ورقتين من كتاب واحد ، ضليت افر بأذاناتي ، عقل البشر ما يتحملهن
أنت تقرأ
بطريسـا
ChickLitالرواية عن شخص بغدادي الاصل ، يحب فتاة ويفتقدها عند موتها ، يهتم كثيرًا في وصيتها ، يكمل حياته بحثًا عن الراحه ، حيث لا يجدها . 2022/11/11 بداية الكتابة بدون نشر .
