tbh [Complete]

17

"အစ်ကိုဂျယ်မင်း..."

ဂျယ်မင်းက မျက်စိမှိတ်ထားပြီး အသက်ကိုမှန်မှန်ရှူနေရင်း စိတ်ငြိမ်အောင်လုပ်နေမိရာက ဂျီဆောင်းရဲ့ခေါ်သံကြောင့် ခေါင်းထောင်ကြည့်လိုက်မိသည်။

နောက်တစ်ပတ်ဆိုရင် NBG debut‌ တော့မှာမို့ ဒီရက်ပိုင်းမှာ practice လုပ်တဲ့အချိန်က မဆိုစလောက် နည်းပါးလျက်ရှိ၏။ သို့တိုင် ဂျယ်မင်းကတော့ နေ့ရှိသ‌၍ practice room ထဲမှာ အသည်းအသန် လေ့ကျင်မိနေမိတော့တာ။ သူက လေးလဆက်တိုက် rank 1 နေရာကို ထိန်းထားနိုင်သူဖြစ်နေလည်း debut line ထဲမှာ မပါလာခဲ့ရင် နောက်ထပ် ၂/၃နှစ်လောက် ထပ်စောင့်ရမှာလေ။

တကယ်လို့သာ ဒီတစ်ခေါက် debut တဲ့အထဲမှာ မပါနိုင်ခဲ့ရင်တော့ ဂျယ်မင်းက လက်လျှော့မိတော့မှာ။ အခုတောင် သူ့အသက်က (၂၃)ဖြစ်လို့နေပြီလေ။ အထက်တန်းကနေလည်း ဘွဲ့မယူထားနိုင်လို့ idol တစ်ယောက်ဖြစ်လာဖို့ကလွဲရင် သူ့မှာ တခြားလမ်းလည်း ရွေးစရာမရှိနေပါဘူး။ ထို့ကြောင့် ဂျယ်မင်းက တတ်နိုင်သလောက် ကြိုးစားရုံကလွဲပြီး တခြားဘာမှလုပ်လို့မရသလို လုပ်နိုင်စွမ်းလည်း မရှိနေပါချေ။

ဂျယ်မင်းက ကြမ်းပြင်ပေါ်မှာ လှဲအိပ်နေမိရာက ငုတ်တုပ်ထထိုင်လိုက်ရသည်။ ဂျီဆောင်းက လက်ထဲမှာ အိုက်စ်အမေရိကာနိုတစ်ဘူးနဲ့ မုန့်ဘူးတချို့ကိုဆွဲပြီး ရောက်လာတာမို့ ညစာထမင်းစားချိန်တောင် ကျော်သွားလောက်ပြီလို့ တွေးလိုက်မိ၏။

"အစ်ကို ထမင်းလာမစားတာနဲ့..."

"အွန်း မေ့သွားတာ"

ဂျယ်မင်းရဲ့စကားကြောင့် ဂျီဆောင်းက သက်ပြင်းသဲ့သဲ့ချသည်။ တစ်နေ့ထက်တစ်နေ့ အရပ်ပိုမြင့်လာတဲ့ ဂျီဆောင်းက အခုထိလည်း ဖွံ့ဖြိုးတာက မရပ်သေး။ ဂျယ်မင်းလို ဖြူဖျော့ဖျော့မဟုတ်ဘဲ ဂျီဆောင်းက သူ့ဟာနဲ့သူ ကြည့်ကောင်းနေပြီး အခုဆို fanbaseတွေတောင်ရနေပြီလေ။

ဂျီဆောင်းတို့လို NBG မှာ ပါလာမယ်ဆိုတာ သေချာပြီးသားသူတွေက စီနီယာအဖွဲ့တွေနဲ့အတူတူ content တွေလုပ်ခွင့်ရတာမို့ ဂျီဆောင်းတို့က အခုဆိုရင် popular ဖြစ်နေပြီ။ hidden trainee ဆိုတာကလည်း all rounder ဖြစ်ရင်ဖြစ်၊ မဟုတ်ရင်လည်း visual, vocal, dance တွေထဲက တစ်ခုခုမှာ အရမ်းကောင်းနေမဲ့သူတွေမို့ debut လိုက်တာနဲ့ ဆီစွတ်ထားတဲ့ မီးစာတစ်ခုလို ဟုပ်ခနဲ တောက်လောင်လာမှာ...။