ابتسم مالك وهو ياخذ الحليب ويحطه بـ بيت الشعر،ناظر عروب وهو يفكر وين يمكن يوديها ،ولو وداها بيت الجد همام بتصير سالفه ،بدا يكسر الحطب اما عروب يلي لقت دقيق وقررت تعجن لهم فطيره على الفحم،التفت مالك عليها :عـ..
ترك الحطب وتقدم عندها:وش تسوين؟
عروب وهي تعجن :بأسوي فطيره
ناظرها مالك بأستغراب:تقصدين خبزه البر؟
عروب بأبتسامه:بالضبط
مالك ناظر حولها :طيب مافي صحون كيف بتسوينها؟
عروب:على طريقه الاولين على الفحم
تراجع مالك بأستغراب من افكاره يلي نفس افكاره وحركاته يلي ماقد شافها في ولا بنت من عايلتهم،قاطع افكاره صوتها:النار اشتغلت
مالك بأنتباه:لا للحين عشان الهوا
غسلت عروب يدها وبدت تشوف جهه الهوا ،سحبت المراكي وبدت تحطها جهه الهوا ،بينما مالك كان مذهول بكل شي فيها ،جلست في الجهه المقابله ،اما مالك يلي كان للحين مذهول منها ،ولعت النار بدت عروب تدفي نفسها،اما مالك كان يفكر بكل مكان لكن مالقى ،ناظرته عروب وحست بأنه منكب فيها:مالك!
فز مالك:سمي؟
عروب:سم الله عدوك،عارفه انك منكب فيني وماتعرف وين توديني
مالك ناظرها:لا ماعليك أن شاءالله الامور بتزين
عروب تنهدت بضيق:ما أشغلك فيني روح لأهلك
مالك ناظرها:ماني بتراكك ورايح لأهلي مدام ربي ارسلك عندي ماني بخاذلك وان شاء الله الاقي لك مكان ،انتي بس خليها علي
عروب:بس..
قاطعها مالك:قلت لك خليها علي
تنهدت عروب وهي تناظر الهوا اما مالك دخل بيت الشعر يفكر وين يمكن يوديها وماعنده وقت ...
----------------
• بـيـت ســعــود :
كل الرجال بالمجلس كعاده من عادات يوم الجمعة عند الجد ،يتجهزون ويتجمعون في المجلس عشان يمشون للصلاه سوا..قام الجد وسط الهدوء شغل الراديوا لكن مافي أي اشاره ،تقدم عز :ياجد الراديوا حقك يشحن؟
الجد:لاولله مادريت شوف له صار له اسبوع لايطلع الصوت ومرات مايشتغل
عز :خله اجل وبعد الصلاه اخذه ونصلحه
فز الوليد من مكانه بعد ماحس بشي غريب يلامس رجله ،التفت وكانت صدمته اول ماطحت عيونه على عقرب أسود ،وقف وبصوت عالي:ابعدوا عقرب عقرب
قام الجد بسرعه وهو يناظر حوله :ابعدوا عز ابعدوه
مسكو عز يلي كان عاحز يوقف بسبب حرق رجله وطلع الحوش ،عز بضحك:حشى مب عقرب حيه ،وش هالدراما كلها
سيف بخوف:ياخبل الاسود أخطر ولو انه اكلك ماكنت سلمت
جلس عز بهدوء وهو يناظر جده يلي يضرب الارض بدل العقرب ،ناظر بسيف:اقدر ادخل؟
التفت سيف :وشهوله تدخل ماشفتهم ماذبحوه خلك هنا
ضحك عز يلي وقف ،سند نفسه على طرف الباب،الين اخذ الجد عكازه وبدا يضرب العقرب فيه وعلى كل ضربه يسمي تنهد وهو يبتعد:جب كرتون ياالوليد
ركض الوليد وهو يدور كرتون قطع قطعه واقترب وهو يسحب العقرب بعكاز جده ويطلع يرميه ،ابتسم عز:ياهلا بجدنا الشجاع
الجد جلس وهو يرتشف من مويته واكتفى بأبتسامه ،نزل مويته والتفت لـ عز والوليد يلي بدوا يرتبون المكان ويرجعونه لوضعه الاول
جلس الوليد واخذ منديل وبدا يرشه بعطر ويمسح عكاز الجد ناظره عز بفضول:وش تسوي؟
الوليد: أنظف عكاز جدي لايكون به سم
عز بـ مزح:الله يحمينا بس ترا في صابون داخل
الوليد التفت وهو يبتسم بخبث:ودك ارش على رجلك؟
ميّل عز ابتسامته :وارش على كفتك ،هاه وش رايك كذا نكون تصافينا
قام الوليد بضحك:لاكتفي ولا رجلك كذا نتصافى
ضحك عز وهو بشارك بسوالف الجد وحكياته يلي يحكي لهم عن العقارب وكيف كانو يتعاملون معها أول ،اما الوليد نظف عكاز الجد وجلس معاهم...
----------------
• بـيـت هِـمـام :
«بـعـد سـاعـتـيـن »
في المجلس عند العيال والجد هِمام ،وقف الجد بصوت جمهوري:يلا ياعيال نمشي للمسجد
طلعوا معاه العيال واحد ورا الثاني متجهين للمسجد ..
عند البنات:
جلست ميراف قدام المرايا وبدت ترتب شعرها ،دخلت بنان بأبتسامه:ياحظ يلي بياخذ هالجمال
ضحكت ميراف بخجل:خلاص ترا لو زدتي حرف واحد معد بأقدر اتكلم
بنان جلست وراها بأبتسامه :الحق يقال ،يلي هو ماقد حبيتي؟
تنهدت ميراف :ولا مره،يعني احب اخواني وامي وابوي
بنان بهدوء:يعني ماقد حبيتي أي رجال؟
ميراف ابتسمت بهدوء:كان نفسي اجرب الحب ،لكن يلي يحبني يعرف أبوي
بنان:وانتي الصادقه
ميراف بتغير للموضوع:وين وتر؟
بنان:بالصاله ،ليه؟
ميراف:ولا شي بس أسال
بنان بأستغراب:تصدقين ان وتر ماشاءالله قويه
ميراف:ايه ماشاءالله عليها
بنان:سبحان الله ،تمشي وتروح وتجي وتجلس معنا ولا كأنها تتوجع
ميراف بضيق:مرات اذا لمس احد ظهرها ولا جلست معنا بالارض اشوفها تقفل عيونها بقوه واضح تتألم
بنان تنهد بضيق:منجد ان يلي خطفها ضربها؟
تنهدت ميراف تنهيده طويله:ضربها ضرب ماكن يمكن تنجى من بس ربي ستر،تخيلي انه ضربها لدرجه ان ظهرها كله جروح
بنان:الله يعينها طاحت فيه ،وش سالفه انه كان صعب مشيها؟
ميراف بضيق:انا مادري بس سمعت انه جتها اصابات على رجولها ماقدرت تمشي منها يومين ،اصلا ماتلاحضين انها ماتركض وحتى او مشت تمشي بهدوء وتتألم
بنان هزت راسها بـ أيه :شفتها ،وامس صحيت اخر الليل وشفتها تعقم جروح رجولها بغرفه الملابس بس شفتها مشيت عشان ماتحس علي
ميراف تنهدت بضيق:الله يعينها ،نفسي اعرف مين طلعها ؟
بنان:مو اخوانها يلي طلعوها؟
ميراف:مدري بس الرعد راح هو وواحد من اخوياه من الدوام،ودوروا لها وعلى حسب كلام عمي ماجد ان الرعد كان بالدور الثاني وسمع خوي الرعد صوت وتر وهي تتألم ونادهم
بنان: مستحيل يسمعون صوتها ومايطلعون لها على طول
ميراف:الرعد وصاهم مايطلعون لها الين ينادون عمي ماجد ،وطلع هو يدورها فوق وسمعوا صوتها وطلعها هذا يلي سمعت من خالتي
بنان بهدوء:الله يشفيها يارب ،يلي هو اذا خلصتي تعالي
ميراف بأبتسامه:طيب ،ماعليك شويه وجايـ..
قاطعهم دخول شوق المفاجئ:يلااا يابنات تعالوا نجهز المجلس ،العيال راحوا عشان نرتبه ونصلي
ميراف بهدوء:متأكده كلهم راحوا؟
بنان:ايه قبل اجيك سمعت صوت الباب لما طلعوا
اخذت ميراف طرحتها وتركتها على كتفها وطلعت أستوقفتهم عهد بأبتسامه:وين رايحين؟
بنان:رايحين ننظف المجلس قبل يرجعون من الصلاه
شوق:ايه عشان ياكلون بمكان مرتب
وقفت وتر وهي تعطيهم المكنسه بأبتسامه هاديه:بنات اجي اساعدكم ولا مايحتاج؟
ميراف بأبتسامه:ماعليه انتي تعبتي كثير الايام هذي ،خليك ونحنا رايحين
وتر بأبتسامه:انا هنا اذا احتجتوا شي،طيب؟
البنات بصوت موحد:طيب
طلعوا البنات اما وتر جلست بالمطبخ تنتظر توقيت الغداء عشان يجهز،دخلت عهد بأبتسامه:كيفك ياوتر؟
رفعت وتر عيونها بأبتسامه :بخير الحمدلله،كيفك؟
عهد:بخير ،جلست عهد بجانب وتر واكملت:اسفه اذا الطاري يضايقك بس الجروح يلي بجسمك توجعك؟
تنهدت وتر بضيق ،لكن رجعت تبتسم:توجعني صح بس ماعليه كلها فتره وتروح،رجعت تناظر بجوالها ورجع الهدوء لكن قاطعته عهد للمره الثانيه: تذكرين شي عن المكان يلي كنتي فيه ،او شفتي الشخص؟
وتر بضيق:أذكر
عهد:طيب ليه ماقلتي؟
وتر بهدوء:لانهم مسكوه وانسجن،والموضوع أنتهى
عهد:مالمسك؟
ناظرتها وتر بأستغراب:وش تقصدين بالضبط؟
تنهدت عهد:اسفه بس ما..
قاطعتها وتر قبل تكمل:لا ماسمحت له يقرب ،بس وش تبين توصلين له بالضبط؟
عهد تنهدت وهي تقوم تاخذ كوب مويه:ولاشي ،واسفه
وتر تنهدت بضيق :ماعليه عادي،طلعت وتر للسطح وهي تحاول تاخذ نفس ،جلست وهي تتحسس جروح جسمها والكدمات ،جلست على الكرسي وهي يلي كانت تتألم بس ماكنت تبي تبين لهم عشان ماتضايقهم وتخرب فرحتهم بوسط جمعتهم ،مسحت دموعها وبدت تسمع خطبة الجمعة ،على هدوء الحي ،والهوا البارد يلي يلعب بشعرها ،سحبت شعرها وهي تحطه ورا أذانها ،بدت تحس وتر بألم بقلبها وكانه يقول له انه في شي بيصير قريب ،زفرت انفاسها وهي تمسح دموعها وتنزل لهم...
----------------
• الـبـر :
مالك جالس ببيت الشعر يفكر وين يمكن يودي عروب ،قاطع تفكيره بعد ماناظر مكان ماكنت جالسه قدام النار وماشافها ،فز وهو يناظرها بخوف:عروب !،التفت وانصدم من شاف شعرها البني الطويل يلي غطى منتصف ظهرها ،ناظرها بذهول وهي تلعب عند النياق وصوت ضحكاتها يلي اخترق قلبه ،ابتسم مالك وهو يناظرها في نفسه :سبحان خالقك يلي ارسلك لي ولاكنت داري ان قلبي بيفز لك "
اكمل يتأملها بهدوء،وشافها ترفع الشماغه وتاخذه بتأفف:اوفف ياعروب الحين كيف اسوي اللثام ،ليه فكيته،واكملت بضيق:اختنقتي من اللثام لكن خنقه جرح اخوانك وسندك اكثر
تقدم مالك يلي نزل راسه:احمم
فزت عروب بأرتباك:لاتناظر
مالك:يابنت الاجاويد الصلاه
لبست عروب لثامها بشكل غريب مرت بجانب مالك وهي تضحك ،اما مالك طلع وقرب لها المويه وطلع يصلي خارج بيت الشعر ،وعروب بداخلها ،انتهوا من الصلاه تقدم مالك بضيق:عروب!
رفعت عروب عيونها له وماردت عليه،اكمل مالك:انا ولله ماابي لك الاذى،لكن لازم تقولين لي السالفه عشان اروح ابلغ
فزت عروب بخوف:لاتكفى ،اذا بلغت عمي واخواني بيلاقوني
مالك:ماعليك انتي بوجهي
عروب يلي انهارت :تكفى يامالك مالقيت غيرك،تكفى لاتوديني لهم ،لو رحت لهم ولله يزوجوني واموت حيه تكفى
تنهد مالك بهدوء:عندي شي لو سويناه محد بيقدر يقرب منك
عروب بأستغراب:وش؟
تهند مالك تنهيده طويله: اتزوجك على سنه الله ورسوله ،وقتها تصيرين حرم مالك ومحد له كلمه عليك
انصدمت عروب منه تراجعت بخوف منه : كـ.. كيف ؟
مالك:مثل ماسمعتيني
عروب بصوت باكي: يامالك مالي احد ولله ،تكفى فكني منهم لو خذيتك بيقتلونك ومالك ذنب
مالك اقترب بهدوء:امسحي دموعك والحين طالع اكلم الوالده ،وماعليك مابيقدرون يقربون مني،امسحي دموعك ولاتبكين ماتستاهل هالعيون تبكي على ناس ماتبي الخير وتستغلك
مسحت عروب دموعها ،اما مالك ابتسم :رايح اكلم الوالده
ترك مالك وراه عروب يلي بدأت تحس بخوف منه وبدأت فكره ان مالك يعرف اخوانها ويبي يردها لأخوانها تثبت ببالها ،رمت شماغه وفروته واخذت علبه مويه كبيره وركضت بالبر ،تدور لطريق الشارع ،كانت صدمتها وهي تشوف سياره بس ماكنت غريبه ويلي أكدت لها لما شافته يطلع ويرفع جواله ،التفت وهو يشوفها توسعت عيونه وأبتسم بخبث:عروبببب،تركت عروب كل يلي في يدها وتراجعت وبدات تركض بطرق ماتعرفها بدأت تصارخ بصوت عالي ومبحوح:ماللللللك ،ماللللك
اما عند مالك يلي كان ينتظر رد لكن محد رد بما انه وقت صلاه ،لكن قاطعه صوت صراخ بأسمه ،رجع لـ بيت الشعر ،اعتلته الصدمه بعد ماشاف ان عروب مو في مكانها ،بدا يركض حوله بخوف:عروببب ،عرووووببب
التفت وهو يشوف عروب يلي تركض بتعب ووراها شخص ركض لها ومسكها وسحبها معاه :امشيي ولاتناظرين وراك امشي
ركض معاها وهو ياخذها ويركبها بسيارته:نزليي راسككك
ركب ومشى بسرعه وهو تارك كل شي وراه ،بينما اخو عروب ركض لـ سيارته وهو متوعد فيهم..
----------------
«بـعـد الـصـلاة »
• الـحـي :
اتجه الكل لبيته بعد الصلاه ،اما هتان والرعد طلعوا يتمشون بالحي ،قاطعهَ صوت من وراهم:ياولد ماجد!
التفت هتان بأستغراب:ايه ،يا هلا سم؟
الرجال،بأبتسامه خبيثه:رجعت لأرضٍ بتندفن ببطنها
تقدم هتان بغضب:تهدد؟
الرجال: والحقيقه صارت تهديد؟
مسك هتان ياقته بغضب:شف سكت لك كثير ،بس اقسم بالله لأدفنك هنا ولله لأخليهم يصلون عليك هنا
دفعه الرجال:شكلك ماتعرف ان يلي يقرب من هيا الموت اقرب له منها
تراجع هتان بأستغراب:البنت توفت وش تبي منها؟
ضحك الرجال بسخريه:البنت تركتك ما توفت ،الوفاه عذر عشان تبتعد عنك ولا انت ثور ماتفهم
اقترب الرعد بغضب مسك هتان وابعده ،اقترب من الرجال:اذا جاي تهدد توكل، هالكلام مايمشي على احفاد همام وسعود فاهم؟،يمشي على امثالك
الرجل بخفوت: ثور تمشيك بنت وتجيبك مثل الاهبل
تقدم هتان بغضب: عيدها!
الرجل بأستفزاز:تمشيك بنت وتجيبك مثللل الاهبل
هتان بغضب: قسم بالله لو ماتتوكل لأذبحك
الرجل:ماعندي وقت لأمثالك لكن لو انت رجال نلتقي ورا بيت جدك على الاقل لو تموت تكون قريب
هتان ناظره بطرف عين: نشوف مين بيموت؟
اخذ الرعد هتان وهو يسحبه:امش امش ،تعرفه كلام بس
هتان بضيق:تهقى ان هيا للحين حيه
تنهد الرعد: الله يستر عليها حتى لو كانت حيه ،تعرفه هذا؟
هتان: جاسم ماغيره يلي تهاوشت معه بالثانوي
الرعد بضحك:هذيك المجزره تقصد؟
هتان بضيق:خلنا نخلص منه الليل
الرعد التفت له:منجدك بتذبحه؟
- الـبيـت :
هتان:اذا تطلب الموضوع ،ترك هتان الرعد وراه ودخل البيت ،دق الباب :طريقق
تقدمت ميعاد :هتان وش تبي؟
هتان:قابليني انتي واخواتي وبتال فوق
ميعاد فتحت الباب بأستغراب:في احد فيه شي ،ابوك وصل الديره؟
هتان بأبتسامه لاجل يطمنها:ابوي وصل قبل الصلاه وصلى مع جدي وخوالي ،تعالي انتي واخواتي فوق وانا بأخذ بتال قابلونا فوق
ميعاد بخفوت:أن شاء الله
مشى هتان وترك وراه امه يلي بداخلها تسأولات وأحساس ان وراه شي وبداخله حمل ثقيل،قابل هتان بتال مسك كتفه:تعال السطح ابيك انت وامي واخواتي فوق
بتال بأستغراب:عسى ماشر؟
هتان:امش وبتعرف
طلعوا السطح وجلسوا وهم ينتظرون طلوع امه واخواته الين جوا له
تنهد هتان بأبتسامه:ياهلا ولله
ابتسمت ميعاد رغم الضيقه يلي بداخلها ،اقتربت وتين وهي تضم هتان:ياهلا بأخوي يلي ماشفته من اول ماجينا ها بشر ؟
هتان بضيق:ضميني وشكلها اخر مره
التفتوا له الكل بخوف،اقتربت ميعاد بخوف يخالطه الغضب:هتان وش تقصد؟
ابتعدت وتين بخوف:هتاني فيك شي؟
بتال اقترب بحده:هتان ان كان بك شي انطق ،لاتتركنا كذا وما تتكلم،أنطقق
وتر قربت من هتان بهدوء يخالطه الخوف:هتان طلبتك لاتخبي علينا وتكلم لاتجمعنا وتخوفنا عليك وتسكت
تنهد هتان تنهيده طويله :أجلسوا
جلسوا كلهم قدامه،سحب هتان كرسي ،تنهد بضيق ،انحنى وهو يناظر الارض ،رفع عيونه:ماودي اخوفكم بس الليل بيصير حاجه ومادري بأطلع حي ولا ميت
وقف بتال بخوف:هتان انطقق ولا تتكلم معنا بألغاز انطققق
وقفت ميعاد وهي تمسك كتف هتان:هتان تكلم وانا امك تكلم وراك ساكت؟
رفع هتان عيونه يلي حمرت ،نزلت دموعه :يمه ليه ماقلتي لي ان هيا للحين حيه ،ليه كذبتوا علي وقلتوا لي انها توفت ،ليه؟
تراجعت ميعاد :ياهتان البنت توفت من سنين وكلنا نعرف
هتان:بس رحتي العزاء؟
ميعاد:هتان العزاء كان بمنطقه بعيده وكيف اروح؟
هتان بغضب:يمههه ،البنتتت ماتت ولا لا؟
نقدم بتال بغضب:هتاااان ،هتااان امسك نفسككك،امسك نفسك ،ان كنت بتسوي شي عشان بنت كذبت عليك بوفاتها اتركه مثل ماتركتك
رفع هتان انظاره لـ بتال:يعني كنت تعرف!
بتال بهدوء:عرفت اول ماجينا
مشى هتان لكن توقف بعد مااحمر وجهه وتوضحت عروق وجهه بغضب: لا احددد يمسكنييي ،خلونييي خلونييي
مسكت ميعاد هتان بقوه:هتااااانن، اهدى ،لاتضيع عشان بنت مااهتمت لمشاعرك بيوم
زفر هتان انفاسه بضيق:مو عشانها،يلي يستنقصني ويفكرني خبل مااقدر اسوي له شي يخسي يرجع يتكلم معاي
ميعاد بخوف:هتان ولله خايفه يكون معهم اسلحه
هتان بهدوء:ماعليه ان كان معهم اسلحه فاأنا عندي الاقوى ،اهلي واخواني وماعليك الرعد موجود وان جابوا اسلحه يدلون دربهم ورا الشمس
تركهم هتان في خوف وحيره ،نزل لجدته بصوت مستعجل:ياجده في عامل بيجي يصلح مكيف المجلس اعطيني مفتاح الباب الخارجي
الجده بأستغراب:وش تبي به؟
هتان اقترب: بأقفل البيت في شله ودهم يدخلون واخواتي وخالاتي وانتي وامي واخواتي هنا وماارضى يدخلون عليك
الجده بهدوء: ووش يبون بالبيت؟،توك تقول عامل وراهم صاروا شله؟
تنهد هتان تنهيده طويله: متهاوشين ويبون يوصلون لأهلنا عشان يمسكونا من يدنا يلي توجعنا
طلعت الجده وهي تسحب المفتاح ،اخذه هتان ،استوقفته ميعاد بصوتها الباكي:طلبتك ياهتان ماودي اخسرك
ناظرها هتان واقترب: مدام ولدك هتان وانتوا اهلي ماني بخسران
مسك بتال هتان بحده: ياهتان امي طلبتك ،انت متى ودك تعقل؟
هتان بغضب: تبي تجي؟ حياك الله ماتبي خلك واحم البيت
بتال:لا جاي اكيد
جلست ميعاد بقله حيله بصوت هادي:استودعتكم الله
مسكت وتين هتان :هتان لاتضايق امي
هتان:ماعليك ماني بمضايقها اذا اخذت حقنا كلنا
تركهم هتان وخرج وقفل الباب الخارجي "في بابين " ترك الباب الثاني لانه مايفتح الا من الداخل ولو يحاول مستحيل يفتح من برا...
