"بعدك يجرحني وقربك يشفي لي جروحي"

[الجزء الخامس والعشرون]

رعد بهدوء :ولله مادري عنه يطلع طول اليوم ويرجع ينام
تنهدت ميراف وهي تناظر القمر يلي تغطيه الغيوم : شكيت بوضعه
التفت لها رعد : من اي ناحيه؟
ميراف : ماادري كل يومه احسه شايل هم اجي اكلمه مايرد علي ويطلع حتى جدي يقولها مالك ما يجلس معهم نهائي طول يومه برا ولما يرجع ينام
رعد وهو يعدل جلسته : هو هذي اطباعه ان ماجا يقعد عند الحلال وان جا معنا رقد تعرفينه مايحب ابها
ميراف : في هذي صدقت ،اييه ليش ناديتني ؟
رعد وهو يطوي شماغه : جيت اخذ سالفه معك قبل اسري"اروح" ارقد
ابتسمت ميراف وهي تشوف عيونه يلي احمرت من شده التعب :روح روح ارقد عيونك أحمرت
ضحك رعد وهو يقوم :ادخلي
دخلت ميراف بأبتسامه ،اما رعد دخل المجلس القديم وهو يشغل المكيف ويرتب له الكنب ويتأكد من نظافته ،رمى شماغه وجواله على الطاوله ورمى نفسه ينام ..

- في الداخل :

انسحبت وتر من الجلسه ،تحت انظار وتين يلي حست بضيقتها ،قامت وتين مع وتر تساعدها ابتسمت لها وتر : عادي ترا اقدر امشي
وتين بأبتسامه : عادي حتى ولو مايمنع اجي معك
ضحكت وتر بخفوت : ماعليك بس بأدخل انام احسني تعبانه شوي
وتين بخوف : فيك شي !!
وتر بأبتسامه هاديه : لا مافيني شي بس احس ابي انام عشان اقوم الصباح
ابتسمت وتين وهي تترك وتر بالغرفه وتطلع .. بدات انوار البيت تطفى غرفه ورا غرفه الين عم الهدوء واعلنوا انتهى يومهم بحلوه ومره ...
« بـعـد صـلاة الـفـجـر »

اجتمعوا البعض بالمجلس والبعض يلي رجع لـ نومته ،دخل محمدالمجلس وبيده جودي يلي تكرر: رد رد
فز رعد بأبتسامه :ياهلااااا ولله ارحبييي
تقدمت جودي له وهي تضحك ،اخذها رعد بحضنه : طولتي الغيبه كأنه !
ضحكت جودي وهي تسحب سبحته من جيبه ،ضحك وهو يشوفها : يازينها زيناهه
ابتسم الجد سعود وهو يشوف رعد يلعب مع جودي ،اقترب من الجد همام : هذي هي البنت يلي يقصدها سعد؟
ابتسم الجد همام :اي ولله هي اصغر البنات وما بعدها البنات وربي الرازق
ابتسم الجد سعود بهدوء وهو يرد نظره لـ رعد يلي للحين يلعب مع جودي تحت انظارهم ..

- في الداخل :

قامت بيادر للغرفة وهي تشوف وتر جالسه بهدوء تناظر بيدها :وتر!
التفت لها وأكملت بيادر : تعالي اطلعي معي الجو وش حلاته !!
ابتسمت وتر بخفوت :طيب في احد برا؟
بيادر وهي تاخذ جلالها وتطلع جلال وتر: لا كلهم بالمجلس ،امشي في هوا بارد ،تتعبين من الهوا البارد؟
وتر تقدمت وهي تاخذ الجلال بأبتسامه : لا ان شاء الله
لبست بيادر جلالها : خايفه عليك ولله وش رايك نسأل هتان؟
وتر وهي ترفع شعرها بربطتها : وينه اشتقت له ،ولا بتال منجد اشتقت له وينه؟!
بيادر وهي تطلع تشوف :امشي معي بأتصل عليهم نطلع نتمشى حوالين البيت قبل نرد الديره
ضحكت وتر وهي تفصل جوالها من الشاحن :اتصل عليهم انا؟
بيادر وهي تقفل الباب : اتصلي وخلي الاقناع علي
وتر وهي تتصل على بتال: بأكلم بتال
التفت بيادر بـ مزح : تبدين بالاقشر !
ضحكت وتر :وش اسوي اشتقت له
جلست وتر تنتظر رد بتال ،فزت وهي تشوفه رد :ياهلا بـ وتر عساك طيبه ؟!
وتر بأبتسامه : الحمدلله بخير ،بتال وين هتان؟
بتال : هتان بجنبي ،ليه في شي؟
وتر :لا بس ابي اطلع اتمشى تعالوا معي وتين نايمه ومعي بيادر
بتال بـ مزح : مالقيتي الا هالملقوفه !
سمعته بيادر يلي سحبت الجوال : على الاقل هالملقوفه تكون خالتك ،احترمني ،بعدين لا تسوي لي فيها طالع من اللقافه وانت مب تارك احد الا وكفخته "ضربته"
ضحك بتال : بسم الله كل هذا شايلته بقلبك علي !
بيادر :في اكثر
بتال وهو يضحك : طلعيه طلعيه اذا تقابلنا ،بنطلع جهه المراجيح الرجال بالمجلس اطلعو محد ويلاكم "محد جهتكم"
بيادر بتمثيل الغضب :طيب
ضحك بتال وهو يقفل وماينتظر حتى ردها ،اخذت وتر الجوال وهي تضحك :خليه لا تهاوشينه وخلينا نروق تراه بينشب لك "بيستقعد لك"بيقعد لك نشبه ،خلوكم هادين
بيادر وهي تمثل انها تتنفس بروقان :روقت يلا مشينا
وتر وهي تقوم :مشينا
طلعوا البنات جهه بتال وهتان يلي طلعوا ،توقفت وتر وهي تشوفهم جايين ابتسمت وهي تناظرهم ،اقترب هتان وهو يحاوط كتفها بيده : ايه كيف الاجواء طابت لك؟
وتر بأبتسامه :طابت لي
هتان بـ مزح : تدرين اننا بكرا رادين الديره ،الكل حتى جدي همام
وتر وهي تمثل عدم المعرفه :تصدق ما كنت اعرف !
التفت هتان وهي يشوف بيادر وبتال يلي يتبادلون نظرات التهديد،ضحك هتان وهو يهمس لـ وتر : شكل بيكون في مصارعه من الفجر
ناظرتهم وتر وهي تصفق : هييي انت وياها
ناظرتها بيادر برفعه حاجب : ثيران انتوا ؟ اهجد انت وهي
هتان بـ مزح : هذول لو تبنين بينهم جدار اطول منهم ينطونه ويتجاكرون ،اعقلوا
وتر وهي تهز راسها بالاسف وتمشي للكرسي وبداخله الضحكه :يالله صباحك خير
ضحك هتان وهو يسحب بتال : امش امش،وانتي تعالي
توسعت عيون بيادر :ترا لي اسم !!
هتان وهو يضحك :بيادر ولا مبادره؟!
بتال وهو يضحك :لا أبادر
اقتربت بيادر وهي تضربهم على راسهم وتمشي لوتر وهي تضحك،التفت هتان وهو يبعثر شعره :احيه وش هالضرب ما ودك تعرسين!
بيادر وهي تناظر الورد : وشدخل طاري الزواج الحين!
بتال وهو يجلس قبالهم : يعني الحين تزوجي وفكي جدتي وجدي من لقافتك ومنها حتى نحنا نرتاح
هتان بـ مزح : الله يغفر لنا ويصبر يلي بياخذك لا عقل لا فكر لا ذكاء الغباء يقطر منك
بيادر وهي تحط يدها على خصرها : لا بلاهيييي،انا اساسا يلي بياخذني محظوظ من وين له وحده مثلي
بتال بصوت خافت : قصدك طايح حظه
سمعته بيادر وهي تشهق : انا حظي طايححح؟
التفت لها بتال وهو يشوفها تاخذ غصن من النخله وتقدم له ،قام بسرعه : عز الله افلحت فيها "رحت فيها "
بيادر وهي تقترب منه تحت انظار وتر وهتان يلي يضحكون بهستريه : عز الله افلحت "بمعنى اخر (نجحت)"  وانا اعرف وش يناسب من ادوات الضرب عليك
هتان وهو يوقف بجنبها :خيزران مصنوع من القوه البيادريه ضربه ناريه تخليك توصل لكوكب الشمس وترد الديره على السريع توصيله نقل سريعههه
التفت له بيادر وهي تضربه بخفه : خفيفه لانها عجبتني ،احمد ربك
التفت لـ وتر واكملت وهي تأشر بالخيزران على بتال : الخيار لك اجلده ولا؟
وتر وهي تناظر وتمثل التفكير ،ناظرها بتال وهو يضحك :طالبك لاتغدرين فيني ياختي
وتر وهي تبتسم : لا اخويه ما ارضى عليه
توسعت عيون بيادر وهي تناظر بتال : يمه منكم يمه منكم ، اقول خلونا من الهواش الحين سمعت انه ودك تعرس على مين؟
انزاحت ابتسامه بتال وهو يتذكر البنت يلي طلعت له ،قاطع تفكيره هتان : يالخوي وين وصلت ؟
بيادر وهي تبتسم بخبث : قلبه مب معه وعقله بيد وحده واضحه
وقف بتال : انا بأتزوج قريّب ان شاء الله
ناظرته وتر :اما مين؟
بتال وهو يلعب بطرف شنبه :مدري ولله لكني قلت للوالده تختار لي وحده سنعه واخلاق وجميله
اقتربت بيادر من وتر بـ همس : لا تصدقينه يبي الجمال بس
وتر بنفس النبره : وش رايك نختار له نحنا؟
بيادر وهي تبتسم :يلا
عدلت بيادر جلستها تحت انظار هتان المستغرب : نحنا بنختار زوجتك
بتال وهو يتربع : عز الله رحت فيها مدامها من اختياركم
بيادر وهي تمثل الصدمه : افا،ولله ما تلاقي مثل اختيارنا ونحنا يلي نشوف الزين
بتال وهو يسند يديه على الكرسي ويناظر السما ويرد نظره لهم : فكره اني اقتنع بكلامك ابعد من النجوم صدقيني
بيادر تكتفت :قريبه النجوم اقدر اشوفها
هتان بـ مزح :زرقاء اليمامة انتي ؟؟،السما مغيمه
وتر وهي تبتسم : نظرها ماشاءالله يخترق الغيوم
ضحك بتال وهو يناظرهم بـ جدية: اسمعوني ترا الموضوع مابه المزح انا قررت وأن شاء الله ان لقينا البنت السنعه الخطبة قريب
هتان وهو يضرب كتف بتال بخفة :مبروك من الحين ياخوي
بيادر ابتسمت :حسيت كبرت يالبزر قدامي
ناظرها بتال :اي ولله كبرت ،عقبال ما نفتك منك
هتان وهو يوقف بجاني بيادر :ولا قولي لي الفرق بينك وبينه سنه وهو أكبر منك ليه محسستني انك أكبر؟
ضحكت وتر وهي تعدل جلالها :اقول لكم نظرها يخترق تلاقون نظرها اخترق بطن جدتي وشافتك
ابتسم بتال وهو يقوم ويعدل ثوبه : من وده ياتي"يجي" يمشي معي حول هالبيت
وتر: وهي تقوم بأروح معك
هتان بخوف :وتر ما بتتعبين من المسافه؟؟ ،اخاف تتعبين بقلبك ونكون بعادٍ عن البيت
بتال وهو ياخذ مفاتيحة : أيه ولله ،بتقدرين؟
ابتسمت وتر :ايه ماعليه اروح معكم حتى لو تعبت اعرف ما بتتركوني
ابتسمت بتال وهو يوقف بجانبها ويمد يده : هاتي يدك يابنت ماجد
حطت وتر يدها : وهذي يدي وانا اخت بتال وهتان
ابتسم هتان وهو يناظر بيادر يلي ابتسمت لهم وسبقتهم :اسمع انت وياه ان صار لي شي اسحبوا عالي معكم انا خالتكم
هتان وهو ينزل :اذا انتِ خالتي هذي أختي
رفعت بيادر حاجبها : وش رايكم لو رجعتها البيت؟
هتان بـ مزح : أتحداك
اقتربت بيادر من وتر ،استوقفتها وتر وهي تضحك : لا ولله انا مليت من القعده ماطلعت كثير ..
قاطعتهم كحة وتر ،اقترب هتان بخوف :وتر فيك شي؟
هزت وتر راسها بالنفي ،مسكها بتال وهو يساعدها تجلس :بيادر جيبي علبه الماء
ركضت بيادر وهي تاخذ علبه موية وتفتحها وعطيها وتر ،شربت وتر وهي تاخذ نفس وتناظر بالسما بهدوء
تتهدت هتان بخوف وهو يشوفها : معد بنمشي تعالي البيت ،بعدين الجو بارد ولابسه هالجلال ،امشي معي وان شاء الله اذا تحسنتي نطلع قسم بالله لأخذك نفر هالديره كامله انتِ بس ادخلي
ابتسمت لهم وبداخلها ضيقه كبيره بسبب عجزها عن شيء هي تحب تسويه ،تقدمت بهدوء وهي تدخل تحت انظارهم وهم عرفوا تماما انها تضايقت ،استوقف بتال بيادر :انتبهي لها بالله لاتبعد عن عينك وان احتاجت شي اتصلي
هزت راسها بيادر بالايجاب وهي تدخل ،جلس هتان بضيق :يالله انك تشفيها بأقرب وقت
بتال وهو يعدل شعره :يالله امين ،وتر ماهي نفسها !
هتان بهدوء : وأخيرا احد لاحظ معي ،قول لي وش لاحظت؟
بتال وهو يجلس بجانب هتان : ساكته وطول الوقت تفكر في شاغل بالها ولا انها تعبانه
هتان بضيق : يارجال البنت للحين تتألم يلي صار فيها مو خفيف ،اسمع انا بأرد ارقد طلعت عشان وتر وبأطلع العصر أخذ كم من غرض وراد ،وراك شي؟
بتال وهو يقوم :لا ولله بأرقد للظهر واقوم نشوف لهم
هتان وهو يحط شماغه على كتفه ويمشي :من بتاخذ معك؟
بتال : متى تقصد؟،تقصد ونحنا رادين الديره؟
هتان هز راسها بالايجاب :ايه من بتاخذ؟
بتال :ولله مادري بس ابويه مع سيارته وقال انه بياخذ امي وجدي وجدتي ،يعني شكلي بأخذ وتين ووتر ترافق؟
هتان :خل البنات علي وخذ جداني عن ابويه تعرفه يتعب من العقبه ولا يدانيها "مايطيقيها"
بتال وهو يدخل :ان شاء الله بأكلمه واشوف ،تامر على شي؟
هتان :سلامتك
دخل هتان الغرفه وهو يرمي نفسه بتعب وينام ،اما بتال يلي راح المجلس القديم بحيث كان سلطان وامجد وسعد وباسم نايمين فيه..