دخلو القصر ثلاثتهم واتجهو للداخل ، لقو صقر ومنيره وحازم وسلطانه ومصعب و بدريه جالسين يتقهوون ويسولفون ، ردو السلام وجلسو ماقبل لهم وكانو متوترين وبندر ومتعب يتعازمون بنظراتهم مين يبدا ويعلمهم ، انتبه صقر لنظراتهم
صقر: وش عندك انت وياه تغامزون؟
بندر بتوتر: يبه متعب يبي يقولك شيء
شبكت ملاذ يدها ببعضها من التوتر وانتبه لها بندر ومسك يدها يشد عليها ، يبي يقويها ويعلمها انها موب لحالها وفعلاً ارتاحت ملاذ
متعب: الحقيقه يا جدي ، الموضوع وما فيه اني تزوجت
شهقت سلطانه وحطت يدها على صدرها: انت وش تقول؟؟
عقدو حواجبهم باستغراب من كلام متعب ، رغم ان كلامه ما يتصدق الا انهم يعرفونه زين مب جوه المزح والعب بالامور ذي
حازم: انت صادق ياولدي؟
متعب: اي والله صادق وبندر وفهد شاهدين على زواجي بعد
منيره: طيب يا ولدي منهي زوجتك وليه ماعلمتنا نخطبها لك وش انت مستعجل عليه ياولدي
بندر: يا اميمتي زوجته تعرفونها زين وهو خطبها مني اصلاً وانا وافقت وهي موافقه بعد وقلنا ان خير البر عاجله
اشر صقر بعصاه على بندر: انت اسكت الكلام موجه لمتعب ماهوب لك يالسربوت
بندر: افا يبه!
التفت صقر على متعب: وش قاعد يقول هذا فهمني
كلهم كانو على اعصابهم وينتظرون احد بفهمهم الي قاعد يصير ، استقام متعب ووقف قدام ملاذ الي رفعت راسها تناظر فيه ، التقت عيونهم ، مد يدها ليدها تحت نظراتهم المستغربه ، فهمت وش يبي ورفعت كفها حطتها بكفه ، قامت ووقفت جنبه وهي ماسكه يده
متعب: هذي زوجتي ملاذ والي اختارها قلبي ووافقت علي ودامنا اثنيننا موافقين ما اشوف فيه مانع لزواجنا
ناظر صقر لملاذ الي كانت متوتره ومنحرجه من كلامه ، هي تعرف زين سبب زواجهم لكن الواضح انه مايبي يعلمهم فيه لذلك قررت تمشي كذبته معه ورفعت انظارها لجدها وبابتسامه: اي جدي صدق
قامت منيره والارض مو شايلتها من السعاده: هذي الساعه المبارك يا عيالي والله اني فرحت لكم
تقدمت تسلم عليهم وتبارك لهم ووراها صقر الي بارك لهم وهو مبسوط ، قام مصعب وحازم يباركون لهم
حازم: والله وصدمتني يا متعب
متعب: افا يا ابوي ليه
حازم: خبر زواجك ومن بنت عمك سطام وكلها في وقت واحد
ضحك متعب: صار الي تبيه وتزوج ولدك البكر وش تبي اكثر
حازم بابتسامه: والله انها الساعه المباركه
تقدم حازم يبوس راس ملاذ: مبروك يا بنتي والله اني فرحت لكم من قلبي ومتعب وكلنا بنحط بعيوننا ونصونك وان شفتي منه شيء منا ولا مناك مالك الا الي يربيه لك
بندر: انا علمته لو بس يزعلها ولو شوي اني لا ادفنه
متعب: بنتكم بحطها بعيوني و اصونها لا تشيلون هم
انحرجت من كلامهم واكتفت بابتسامه ، قامت بدريه تسلم عليها وتبارك لها ، انتبه متعب ان امه للحين قاعده بمكانها والواضح انه ما عجبها زواجه
متعب: ما ودك تباركين يا ام متعب
قامت سلطانه وقرب متعب منها يبوس راسها: مبروك يا ولدي
التفتت لملاذ الي كانت تناظر فيها ونطقت بتكلف: مبروك
ابتسمت ملاذ: الله يبارك فيك خالتي
بعدها طلعت سلطانه من عندهم وراحت لغرفتها فوق تحت انظارهم المستغربه
حازم: ماعليه تتقبل مع الوقت
منيره: ماعلينا منها الحين ما تقولون لي يوم تزوجون بهالسرعه بدون عرس وبدون احتفال وش تحسون فيه
متعب: يا جده ما احب الاحتفالات والزحمه مالها داعي
منيره: وانت وش دخلني فيك ، بنتي اكيد تبي تفرح بعرسها وتنبسط مثل كل بنت
وسعت ملاذ عيونها بصدمه من كلام جدتها الي احرجها قدامهم ، مسك بندر ضحكته وملاذ هزت بيدها لجدتها بمعنى لا ونطقت: لا يا جده حتنى ما احب الحوسه ذي
منيره: ماهوب على كيفك شوي بنسوي عشاء بهذي المناسبه ونفرح فيك كلنا
استسلمت ملاذ وناظرت في متعب الي كان يتكلم مع جدها واعمامها
بدريه: وخالتي معها حق لازم نفرح فيك اليوم
نزلت ترف من فوق وسمعت كلام بدريه: وش تفرحون فيه شالسالفه
بدريه: تعالي يا امي ترف تعالي باركي لاخوك وزوجته
عقدت ترف حاجبها: زوجة وش بسم الله
بدريه: اخوك متعب تزوج هو ملاذ
ناظرت ترف بعدم تصديق فيهم ونزلت بسرعه ، التفتو كلهم لها ووقفت قدامهم: انتم صادقين تزوجتوا؟؟؟
هز متعب راسه وتقدمت تحضنه بسرعه: والله انه احلا خبر يوصلني بحياتي ، بصيح متعب احبك احبك
حاوطها متعب وضحك على ردة فعلها: وانا اموت فيك يا الترف
ترف: والله حتى نجلاء بتموت من السعاده لو درت
ابتعدت من حضن متعب واتجهت لملاذ تحضنها ، بادلتها ملاذ وابتسمت لها: بشويش خنقتيني
ترف: يا الله والله مو مصدقه انتي ومتعب مع بعض خلاص!!
ملاذ بتكلف: ايوه
رفعت نظرها لمتعب الي كان مبتسم وسعيد من سعادة اخته
منيره: يلا يالترف روحو وتجهزوا وعلمي اختك شوي مسوين عزيمه بهالمناسبه وعلمي جود بعد
سحبت ترف ملاذ معها وقالت قبل ترقى فوق: ابشروووو
انتشرو الباقين يجهزون للعزيمه وراحو ملاذ وترف لنجلاء ، دخلو الغرفه ولقو نجلاء نايمه
ملاذ باستغراب: غريبه لين هالحزه نايمه؟
ترف: صدق غريبه هذي اول مره تنام لين هالوقت
شغلت ترف الانوار ورفعت نجلاء راسها وواضح عليها النوم: ترفف طفييي النوررر
ترف: يا زفت شفيك ، قومي بنقولك خبر حلو
حست ملاذ انها متضايق لان موب اخلاق نجلاء الي دايم ، بالعاده تكون مروقه وتعاملها معهم حنون: افا نجول شفيك
نجلاء: مافيني شيء حبيبي واسفه عشاني عصبت
قامت نجلاء وعدلت جلستها على السرير وجلست جنبها ترف ووقفت ملاذ فوقهم ، ناظرت فيهم نجلاء بعدم فهم: شفيكم؟
اشرت ترف على ملاذ بابتسامه: اعرفك على زوجة اخوك متعب
نجلاء: ياليل ابو لمبه الحين مقومتني من النوم عشان تستعبطين فوق راسي؟
ترف: والله ما استعبط متعب وملاذ تزوجو واليوم مسوين لهم عشاء
كانت ملامح ترف جديه وهي تتكلم ، رفعت نظراتها لملاذ تبي تتاكد: صدق هالكلام؟
ملاذ: ايوه
عقدت نجلاء حاجبها: يمه شكلي احلم بنات لحد يصحيني لو صدق
ترف: والله حقيقههه ومو حلممم هيا قومي نتجهزز
قامت نجلاء تحضن ملاذ وتبارك لها ، كل الي بالقصر كانو مبسوطين الا ملاذ الي شايله هم الايام الجايه ولاي مدى بتستمر كذبتهم عليهم
