{ بعد مرور اربع سنوات }
انتهى شهر رمضان الكريم وغداً اول ايام عيد الفطر المبارك ، هذا العيد غير عن باقي الاعياد في عائله آل حازم لانهم قررو يعيدون في الرياض وتحديداً قصر متعب وملاذ ، صقر ومنيره وحازم وبدريه ومصعب وترف وصلو للقصر مباشره والبقيه اخذو لهم فندق رغم ان متعب اصر عليهم يجون عندهم بس ما حبو يثقلون عليهم اكثر ، قضو هذي الليله بتجهيزات الحديقه الخلفيه للحريم والمجلس للرجال وجهزو العيديات كل شيء كان جاهز لقضاء العيد مع العائلة ، بعد مرور ساعات وتحديداً في غرفة ملاذ ، كانت واقفه تتجهز ولبست فستانها الاحمر القصير وحطت روج احمر وكان شكلها في غاية الجمال والحسن ، شعرها صار اطول من قبل ويوصل لين نص ظهرها ، حطت من عطرها المعتاد وطلعت متجهه لغرفة سطام واتسعت ابتسامتها وهي تشوف متعب جالس على ركبته ويعدل شماغه ونطق: وخلصنا منك يالشيخ
انتبه سطام على امه وصرخ: ماما
انطلق من يدين متعب يحظن امه وكان يوصل لين ركبتها ، ضحكت ملاذ وانحنت لمستواه تحضنه ورفعت انظارها لمتعب الي يتاملها بابتسامه ، ابتعدت ملاذ تعدل شعره ونطقت: يلا روح لجدانك عايدهم حبيبي
هز راسه سطام ونطق قبل يطلع: حاضر
وقفت ملاذ متجهه لمتعب ورفعت يدينها تحضنه ، رفع يدينه على ظهرها وخصرها يبادلها الحضن ويحشر راسه برقبتها يستنشق عبق عطرها الي يحبه ونطق بخدر: تبين تموتيني لابسه احمر؟
ضحكت ملاذ بغنج ورفعت يدها تحاوط رقبته وهو للحين محاوط خصرها ويتاملها بابتسامه ونطقت: من العايدين وكل عام وانت بخير يا ابو سطام
اتسعت ابتسامه متعب ونطق:
من العايدين ان قلتها لي قلت لك
العيد خدك حظ من عيد عليه
وان جبت فيك العيد يا حظي ترا
صبري قضى وامري من الله واليه
ضحكت ملاذ باحراج وعض شفته قبل ينحني لها بس حطت يدها بين ثغرها وثغره ونطقت: مافيه ناوي تخرب روجي
قبل خدها وابتعت عنها: الشكوى على الله نتصبر لين شوي
مسك يدها يسحبها وراه ودخلو لغرفتهم ، فك يدها متجه لدولابه وطلع منه علبة هدية وباقة ورد ، اتسعت ابتسامته: متعب!
متعب بابتسامه: عيونه وقلبه
قرب يعطيها باقة الورد وفتح لها العبه يطلع منها عقد الماس: ما يحلا الالماس الا على الالماس يا امس سطام
قرب يلبسها والتفتت للجهه الثانيه ورفعت شعرها بيدها اليسار ويدها اليمين فيها الورد ، لبسها متعب العقد وقريت للمرايه وانبهرت من شكلها بالعقد والفستان الاحمر وباقة الورد رجعت له تحضنه: احبك وربي وياكبر حظي فيك وانت مدلعني بهالشكل ، ابتعدت عنه ورفعت يدها لياقة ثوبه تقربه منها ورفعت نفسها تقبل ثغره ، اتسعت ابتسامته داخل القبله ومسك خصرها يعمقها اكثر ويروي عروق قلبه ، ابتعد بعد دقيقه يلتقطون انفاسهم ونطق: على اساس ما تبين تخربين الروج
ملاذ وهي متجهه للدرج حقها: عشان ما تصدقني مره ثانيه
طلعت علبة صغيره ووقفت تفتحها قدامه واتسعت ابتسامته ونطقت: وهذي عيديتك مني ادري انك منزمان خاطرك فيها
اخذها من يدها ولبسها وهو في قمة سعادته موب عشان الساعه عشانها هي الي جايبتها له: هذي احلا عيديه بدون شك
التفتو على دخول سطام واتسعت ابتسامتهم ، قرب منهم سطام يحاول يلتقط انفاسه ونطق: دودو جت
ابتسم متعب يشيله: وكل ذا الركض عشان دودو
كتمت ملاذ ضحكتها وقربت تمسك خده: وانا كم مره اقولك لا تخاف منها
هز راسه سطام بالنفي: انا ولد متعب ما اخاف
وسعت ملاذ عيونها من رده وانفجر متعب ضحك وقرب يقبل خده: حي عينك يا ولد متعب
نزلت ملاذ يدها تشابكها بيد متعب الي خلخل اصابعه مع اصابعها ومشو نازلين تحت ، كان متعب شايل سطام بيده اليمين ويده اليسار مشابك فيها يد ملاذ ، التفتو الكل لهم بابتسامه ووقفو يبون يسلمون عليهم ويعايدونهم ، سلمو على صقر ثم منيره وحازم ومطلق ومصعب واخر شيء نجلاء ، انتبهت ملاذ لـ ورد بنت نجلاء وكانت واقفه ورا امها وقربت تسلم عليها ونطقت: هذي الدودو كم مره اقولكم امسكوها عن ولدي!
ضحكو كلهم ووسعت نجلاء عيونها: والله اذا ولدك رخمه بنتي مالها ذنب
تقدم سطام ورفع صوته: انا ماني رخمه انا ما اضرب بنات
وسعو عيونهم بصدمه وانفجروا ضحك من ردوده الي اكبر منه وتقدم حازم يشيله: انشهد انك شيخ ولد شيخ وحفيد شيوخ
رفع سطام يده يدق تحيه لجده وابتسم يقبل خشمه والتفت عليهم: انا باخذ حفيدي للرجال
طلع متعب ووراه مطلق وصقر ومصعب يعطون الحريم راحتهم وقامت بدريه وليلى يفسخون عباياتهم ، نادت ملاذ العامله تصب لهم قهوة وتقدم الحلويات والتفتت ملاذ على البنات: الا ما قلتو وينهم الباقين؟
نجلاء وهي تشرب قهوتها: عمي بندر واميره بالطريق ووعد دقت علي قبل اوصل تقول انها بتطول شوي فهد راح يجيب ثوبه من المغسله اما نايف وطيف مدري عنهم
فجاه انفتح باب القصر والتفتوا على اميره الي دخلت وبيدها ماسكه بنتها ملاذ ، وقفو الحريم يسلمون عليها ويعايدونها وفتحت ملاذ يدينها تحضن ملاذ الصغيره: يا عمري وروحي سميتي
قبلت خدها قبل تقوم واخذتها بيدها تجلسها جنبها وجلست اميره تسولف معهم والتفتت ملاذ: وينه عمي بندر؟
تنهدت اميره تاخذ الفنجال من يد العامله: دخل عند الرجال يقول شوي بيجي يسلم على البنات وعمتي
منيره: شخبارها امك ياوليدي وراها ما جت معك؟
اميره: عاد يا عمه قالت لي اعتذر منكم جميعاً وانها ماتقدر تحضر اول عيد لانها بتروح لاهلها وان رجعنا للخبر تقول بتمر عليكم
هزت منيره راسها بابتسامه: يابعد قلبي هي
نجلاء: يا ليت عمتي جود جايه
نزلت بدريه فنجال قهوتها ونطقت: ياحلوها دقت الصبح تعايدنا انا ومصعب وتقول عندهم عيد بالديره ماتقدر تتركه
تنهدت نجلاء: الله يعينها
وقفت ورد متجهه لملاذ الصغيره ومدت يدها: تعالي نلعب
مسكت ملاذ يد ونزلت من فوق الكنب وقالت لهم ملاذ: العبو بالحديقه وانتبهو تجون المسبح عشان اذا جو العيال الباقين اوزع عليكم العيديات
ورد: حاضر
ملاذ: طيب
طلعو يلعبون بالحوش وكملو الحريم سوالفهم وتضاحيكهم ، قاطعهم دخول وعد وعيالها التوأم متعب ومصعب ووراهم طيف وبيدها ولدها الصغير خالد ، ركض متعب الصغير لملاذ يسلم عليها اول وحده لانها اكثر وحده يحبها وتحبه من بين كل الاطفال ودخلو الباقين يسلمون ويعايدون واول ما جلسو طلع متعب ومصعب لمجلس الرجال وتقدمت ترف تاخذ خالد من طيف وتلعب معه
رفعت ملاذ جوالها تتصل على متعب يجيبون العيال للحديقه الخلفيه عشان تعطيهم عيدياتهم وبعد دقايق جابهم وطلعت لهم
طلع متعب من جيبه خمس ضروف ومدها على ملاذ: هذي عيدية خواتي وبنات عمي وزوجة عمي بندر
اتسعت ابتسامه ملاذ ونطقت: ماتقصر ياروحي انت
متعب: تبين شيء؟
هزت راسها بالنفي لا سلامتك
رجع متعب للرجال ووقفت ملاذ قدام طاولة العيديات بالحديقه واخذت اول عيديه وقالت: ها مين تتوقعون هذي العيديه؟
اشرو كلهم على متعب وضحكت ملاذ تمدها عليه: صح عليكم
شالت وحده من العيديات لصاحبها ولد نادر وريوف
واخذت باقي العيديات عطت ملاذ ومصعب وورد واخر شيء هدية سطام الي قرب منها وهمس: ايش جبتي لي؟
انحنت لمقامه ونطقت: وش تتوقع؟
رفع اكتافه بعدم معرفه: ما اعرف
قربت تهمس باذنه وابتعد يصرخ بحماس ويحضنها: ماما افضل وحده
ضحكت ملاذ تبوس راسه: يا حبيبي ماما انت ، يلا خذ الورعان والعبوا وراكم
دخلت داخل توزع عيديات البنات: هذي عيديات متعب عليكم
ابتسموا البنات وهم متعودين على نظام متعب كل عيد يوزع عليهم عيديات ونطقت اميره بابتسامه: ما يقصر مثل عوايده ابو سطام
وعد: اي والله
التفتت ملاذ على ترف: الا ما قلتي لنا يا ترفوه متى ناوي يحط العرس فيصل!
ترف بابتسامه: يقولي خامس العيد ان شاء الله وانا قلت نبيه بالديره
نجلاء: زين اخترتي والله اني مشتاقه لزواجات الديره اخر عرس حضرته فيها عرس عمتي جود
وقفت ملاذ تاخذ من الحلويات ونطقت: الله يالدنيا بعد ماكنتي تكرهينها
نجلاء بضحكه: شايفه
انخرشوا من صوت صياح بندر عند الباب: ابي ادخل فيه احد؟
منيره: هذا كبر وزوجناه وجاله بنت وللحين ما عقل متى بيعقل!!
ضحكو البنات ووقفت ليلى وبدريه يلبسون عباياتهم ونادو بندر يدخل الي اتسعت ابتسامته يوم شاف البنات: يا حي هالشوفه والله وش ذا الزين وش ذا الحركات يا بنات اخواني
ضحكت ملاذ ووقفت تسلم عليه: بعد عمري عمو
مد عليها ضرف: هذي عيديتك يا احلا ملاذ
زمت ملاذ بشفايفها: وربي احبك! ماتقصر
رجعت تحضنه ووخرت تعطي الباقين مجال الي سلمو عليه وعايدوه وعطاهم عيديتهم واخر شيء امه
ابتسمت ملاذ بخبث : ووين عيدية اميره!
التفت بندر لاميره الي كانت مبتسمه له واتسعت ابتسامته وهو يقول: جتها عيديه احلا من عيدياتكم
اتسعت عيون ملاذ من كلامه: عشتو وش هالقعده الرومنسيه
ضحكو البنات وجلس بندر معهم يتبادلون اطراف الحديث وفجاه دخلت ملاذ الصغيره يوم شافت ابوها وارتمت في حضنه
بندر بابتسامه: يا هلا والله في بنت بندر علومك يا بابا؟
ملاذ: زينه
تقدم بندر يبوس راسها: الله يجعله
وقف وبنته في يده والتفت على اميره: بروح اخليها تسلم على اخواني وابوي وارجعها
هزت اميره راسها بتفهم وطلع بندر وبنته ملاذ لمجلس الرجال
جت ورد تركض يوم شافت بندر وملاذ ووقفت قدام امها: عادي اروح انا بعد اسلم عليهم؟
اشرت لها نجلاء: روحي روحي
ابتسمت ورد وطلعت بسعاده وضحكت ملاذ: ياحليلها تستاذن
اشرت وعد على العيال برا سطام ومصعب ومتعب: البنات بمجلس الرجال وذول متكين وراكم
ضحكو على كلامها وتدخلت ليلى: خليهم اهم شيء مبسوطين
وعد: اي والله
طق الباب والتفتت نجلاء لملاذ: عازمه احد؟
وقفت ملاذ وهزت براسها: اي ريوف
وقفت تستقبلها وترحب فيها ودخلت تسلم على البنات الي قد شافوها مره وحده يوم جو يزورون ملاذ ، بعد ما عايدتهم جلست ونطقت ملاذ: وينه ماجد؟
ريوف بابتسامه: مع نادر راحو لمجلس الرجال
ملاذ: ياقلبي سطام ينتظره من امس
ضحكت ريوف والتفتت تشوف سطام بالحديقه ونادته ملاذ وجاء ركض واول ما شاف ريوف شهق: وين ماجد
فتحت ريوف يدها: طيب سلم علي!
قرب يسلم عليها وابتعد يعيد سواله: وين ماجد
اشرت ريوف بيدها: في المجلس مع ابوه
اتسعت ابتسامه سطام: عمي نادر هنا بعد
هزت ريوف راسها وطلع سطام يركض وكملت ريوف كلامها: انا منسيه يا حسرتي ما يعرف الا ماجد
نجلاء بضحكه: وانا اذا شاف بنتي ينحاش الوصخ
التفتت عليها ريوف: يمكن عشان ماجد معه من يوم كانو صغار
نجلاء: صدقتي عاد
،
مر الوقت وتغدو وجاء العصر واتفقو البنات يتركون عيالهم عند بدريه وليلى ومنيره ويطلعون بسياره ملاذ يتقهوون برا
ركبت نجلاء قدام مع ملاذ وريوف وترف ووعد وطيف ركبو وراء وتحركت ملاذ متجهه للكوفي الي يروحون له دايم هي وريوف
التفتت نجلاء على ملاذ: ما قلتي لي يالمحاميه وش سويتي باخر قضيه؟
ابتسمت ملاذ ونطقت بفخر: حليتها
نجلاء: والله يوم حكيتي لي عنها كان واضح صعبه
ملاذ: هي صعبه ما اختلفنا
التفتت ملاذ على نجلاء بابتسامه ونطقت: بس ما يصعب شيء على بنت سطام
ضربت وعد كتفها: عاشت
نزلو عند الكوفي وطلبو قهوتهم وقعدو يتقهوون ويسولفون وفجاه دق جوال وعد: هلا فهد
فهد: وينك يا حلوه؟
ابتسمت وعد باحراج من مدحه وقامت من عند البنات الي وسعو عيونهم بصدمه
وعد: طلعت مع ملاذ والبنات نتقهوى وبنرجع
هز فهد راسه بتفهم: طيب اذا جيتي علميني عيديتك معي لا تحسبيني نسيت
اتسعت ابتسامه وعد: ابشر حبيبي
نزلت الجوال ورجعت للطاوله وكانو البنات يخزونها ونطقت نجلاء: عشتو وش الي خلاك تقومين عننا
ترف وهي تشرب من قهوتها: شكله يتغزل فيها
وعد بابتسامه وهي تصرفهم: خلاص عاد شتبون
كملو قهوتهم وبعد ما خلصو راحو يفرون ويتمشون وقبل المغرب رجعو للبيت ودخلو من باب الحديقه الخلفيه لان العيال بالحديقه الاماميه باسطين وجالسين ، دخلو يفسخون عباياتهم وشافو عيالهم كلهم يلعبون بالالعاب وجلسو شويات وقامو يصلون المغرب وبعد ما مر الوقت شغلو انوار القصر كلها وانارت الحديقه الخلفيه والامامية ، فجاه سمعو صوت الشيلات اشتغلت عند العيال وفزوا الاطفال يركضون باتجاه الصوت ، وقفت منيره: انا بروح عندهم واشوف لعبهم
ملاذ: اجل رجلنا على رجلك يا جده
لبسو عباياتهم الحريم وطلعو يشوفون لعبهم ، اتسعت ابتسامتهم يوم شافو العيال الصغار متعب ومصعب وماجد وسطام يلعبون ، وحولهم صقر وعياله واحفاده ومعهم نادر ماسكين يدين بعضهم ويعززون للصغار وفجاه طلع متعب من مجلس الرجال وفي يده سيفه وتوسط المكان مع ولده سطام الي وقف قدامه وبدو يلعبون على كلمات الشيله:
وان عاقبته الطواري قال والصوت حاد
انا حفيد الاكابر واطيب رجالها
