بعد ما وصل طلبهم طلعت ملاذ تستلمه ورجعت لهم ، ساعدت نجلاء ترف بانها تجلس وعدلت لها السرير
ترف: اح بشويش
نجلاء: اتركي الدلع عنك ما لمستك حتى
ترف: اف منك وخري خل ملاذ تساعدني بعدين مو انتي يالدفشه
عقدت نجلاء حاجبها وتخصرت: يا سلام الحين صرت دفشه!
طلعت ملاذ اغراضهم ووزعتها: خلاص انتي وياها ترانا بمستشفى مو بالبيت اهجدو
بدو ياكلون ويسولفون عن الايام الي كانت فيها ترف بالعنايه
ترف: عاد تصدقون ما توقعت احد بيزعل علي كذا
ملاذ بضحكه: والله العظيم كل الي بالقصر كانو منهارين وحزينين حتى عمي مطلق جاب مرته وبناته عندنا يشاركوننا الحزن
ضحكت ترف ومسكت بطنها بالم: بموت والله عورني بطني
انبسطو البنات يوم شافوها ضحكت وقررت تكملها نجلاء: عاد تصدقين حتى حارس المزرعه يوم درى انك بالمستشفى زعل عليك
ترف: امانه على طاري المزرعه احس اشتقت لها
ملاذ: وش رايكم نقول لهم اذا طلعتي نروح لها؟
نجلاء: بنات منجدكم؟ والله ماروح
دقت ملاذ كتفها: عسى ماشر وليه ماتروحين!
نجلاء: مره خياس واجواء ممله معليش يعني
ملاذ عقدت حاجبها وهي ناقده عليها: عشتو يا سنيوريتا ، بتجينا معنا ورجلك فوق رقبتك بعد
ترف بضحكه: والله ماتخليك بحالك هذي بنت الديره
نجلاء: مالت عليك انتي وبنت الديره
ترف: اقول يا سنيوريتا وش صار عليك انتي والحب؟
ملاذ: على طاريهم ، تخيلي جدتي قفطتهم يتغازلون ودبغتهم الاثنين وبعد عاقبت نجلاء وعطت الخدم اجازه عشان هي تقوم بالقصر لوحدها
ماقدرت تتحمل ترف وضحكت وهي حاطه يدها على بطنها وضحكو معها البنات يوم شافوها مبسوطه
{بالليل ، قصر آل حازم }
دخل متعب ومعه بندر وشافو الاهل متجمعين بالجلسه الي في الحوش ويسولفون سلمو عليهم وجلس بندر بينهم وأستأذن متعب يبي يطلع لغرفته ويرتاح ، بطريقه لغرفته واجه امه
سلطانه: جيت ياولدي
متعب: ارحبي يا بعدي
تقدم يبوس راسها ويدها ويسالها عن اوضاعها
سلطانه: اللهم لك الحمد بخير ، كيفها ترف؟ ووينها اختك ومرتك
متعب: ترف بخير الحمد لله ومرتي ونجلاء تنوموا معها وبكره باذن الله بنطلعهم كلهم الدكتور قالي انها بخير ومعد فيه خطر عليها
سلطانه بابتسامه: الحمد لله ، بس بسالك ياولدي
متعب: امري؟
سلطانه: هو علاقتك بمرتك زينه؟
عقد متعب حاجبه باستغراب: ايوه زينه ، عسى ماشر وش مناسبة السوال؟
سلطانه: تكذب علي؟ مرتك للحين تنام بغرفتها القديمه حتى عفشها ما نقلته لغرفتك ولا كانك متزوج
ما اعجبه كلام امه وتدخله فيهم لكنه حاول يتمالك نفسه ويرد بهدوء عكس الغضب الي بقلبه: هذا الشيء يخصني انا ومرتي بعدين الاسبوع الي راح محد فينا فاضي ينقل عفشه دوبه اليوم صحصحنا
ربتت على كتفه سلطانه: نشوف مع الوقت مافيه مشكله
وبعدها نزلت تحت ، تنهد متعب ودخل غرفته ، طلع له ملابس ودخل يتروش وهو يفكر بكلام امه ،،،
{ الصباح ، في المستشفى }
صحت ملاذ وطلبت لها اكل هي ونجلاء اما ترف ف كان لها اكل مخصص من المستشفى ، نزلت الاكل الي طلبته على الطاوله ورجعت جلست على الكنب وحطت شرشفها على وجلها وفتحت تتصفح جوالها وتنتظرهم يصحون ؟ قاطعها دخول متعب الي كان مستغرب من ظلام الغرفه ، حتى الشباك ما فتحوه عشان يتهوون
عدلت جلستها ونزلت جوالها ، دخل بخطوات بطيئه
ونطق بصوت خافت: صباح الخير
ملاذ: صباح النور
ناظر للاكل الي على الطاوله ولخواته كيف نايمين ومرتاحين
ورجع التفت لملاذ: اشوفك صاحيه ليه مانمتي
ملاذ: ماقدرت انام شلت هم ترف لو بغت شيء وتو صحيت جبت لي ولنجلاء فطور وعجزت ارجع انام
ابتسم يوم شاف اهتمامها لخواته وتذكر كيف اهتمت فيه حتى هو وقت كانت ترف بالعنايه وجاها بكل انكساره ورممته وعطته الراحه والامان الي فقده للحظات
متعب: ناقصك شيء تبون شيء؟
ملاذ بابتسامه: لا شكراً
جلس متعب جنبها واول ما جلس صحت نجلاء ، عدلت جلستها وحاولت تفتح عينها عشان تصحصح نجلاء: صباح الخير
استوعبت وجود متعب قدامها وكملت: بسم الله وش جابك
عقد متعب حاجبه: اول شيء صباح النور ثاني شيء طبعاً بجي اشوف اختي
ابتسمت نجلاء بخبث وحبت تلعب معهم شوي: جاي عشان اختك ولا عشانك مشتاق لزوجتك ، عادي تقدر تعترف قدامنا
ناظرت فيها ملاذ بحقد وهي فاهمه نيتها ، خلاص العاب نجلاء
معد صارت تمشي عليها
رفع متعب حاجبه كان ناوي يعترض بس انتبه لنظرات ملاذ
ونطق بابتسامه: تقدرين تقولين الاثنين
وسعت ملاذ عيونها والتفتت عليه: والله من الكذب الي فيك
متعب: انا اكذب! ثمني كلامك
ملاذ بحقد: اي شفت كيف عصبت ماش طلعت على حقيقتك
ماقدر متعب يمسك نفسه على ردة فعلها وضحك ، لانت ملامحها يوم شافت ضحكته ، لاول مره تشوفه يضحك بهالشكل ، ماتدري ليه انبسطت يوم شافته يضحك وابتسمت معه
كل ذا تحت انظار نجلاء الي قامت تبي تغسل وجهها
وقالت: مالت عليكم
احترمو وجودي عالاقل
ملاذ: والله انتي الي بديتي ، من طق الباب لقى الجواب
نجلاء: ما اقول غير اين انت يا زوجي
تناست وجود متعب قدامها الي عقد حاجبه ونطق بحده: نعم؟
حست باحراج اكثر من الخوف وهربت للحمام بسرعه: ماقلتت شيييي
ضحكت ملاذ عليها وقامت تحط الفطور الي قدامهم
ملاذ: هيا قرب معنا
متعب بابتسامه: بالعافيه عليكم انا مفطر قبل اجي
طلعت نجلاء وهي تمسح وجهها بمنديل وجلست جنب ملاذ وبدو يفطرون لين صحت ترف ، بعد الفطور لبسو طرحهم ودخل الدكتور يشيك على وضع ترف ومتعب واقف معهم
الدكتور: الحمد لله بافضل حال وتقدر تتحرك بعد
تنهد متعب براحه: يعني نقدر نطلعها صح؟
الدكتور: ايوه تقدرون تطلعونها باي وقت تبونه لكن ابيك تنزل معي توقع اوراق الخروج
طلع الدكتور والتفت متعب للبنات: تجهزو وجهزو ترف بنطلع الحين
انبسطو البنات وساعدوا ترف تقوم وتلبس عبايتها والارض مو شايلتهم من السعاده ، بعد ربع ساعه رجع متعب واخذهم معه للسياره ، ساعدو ترف عشان تركب ورا وركبت جنبها نجلاء
كانت ملاذ بتركب ورا وعصبت نجلاء عليها: يا المنحوسه اركبي مع زوجك قدام
ملاذ بهمس: بنت! ما ابي بركب معكم
نجلاء بهسهسه: والله ماتركبين هنا اخلصي
ركب متعب وشاف ملاذ للحين عند الباب الي ورا وواقفه لها نجلاء ، ابتسم يوم سمع كلامهم ونطق: ملاذ تعالي هنا
تأففت ملاذ وتوعدت في نجلاء قبل تركب قدام ، بنص الطريق وقف قدام كوفي: وطلب من قهوه ، كان حافظ اذواقهم كلهم هالمره وطلب مع القهوه عصير لترف
ترف: تراني مو نونو تجيبون لي قهوه
متعب: حشاك يالترف لكن يبيلك اسبوع على الاقل بدون كافيين
نجلاء بشماته: يا مسكينه تخيلي ما اشرب قهوه
ترف: اف اسكتي
ملاذ حبت ترجع تقهر نجلاء وتنتقم منها على حركاتها اليوم ولفت على متعب وقالت: اقول متعب
التفت لها يوم سمعها تناديه باسمه وقال: سمي؟
ملاذ: اليوم ترف تقول انه بخاطرها لو نروح للمزرعه والصدق حتى انا بخاطري اروح وش رايك ؟
وسعت نجلاء عيونها بصدمه يوم شافتهم صاملين
متعب: ابشرو دامها بخاطركم ، شوي نشوف رأي الاهل ومين يبي يخاوينا
نجلاء: عن نفسي ما ابي اخاويكم
متعب: افا وش عندك!
التفتت لها ملاذ: حبيبتي قلت لك بتجين معنا ورجلك فوق رقبتك ولا يكثر
نجلاء: تبطيييين ما اجي معكم ، يلا بس
ملاذ: طيب اصبري وبذكرك يا سنيوريتا
شهقت نجلاء: عشتو يا بنت الديرة
عقد متعب حاجبه: ورا ما تهجدون انتم ، صكيتو راسي تقل بزران
ترف بملل: هذا حالهم من امس طفشوني
متعب: انا مخليهم عندك يونسونك واظاهر انهم جابو لك المرض
ترف: شايف كيف!
وسعت ملاذ عيونها من كلامهم: اشوفكم قلبتو علينا ؟؟
نجلاء: اخوان فاشلين والله ، ليت نيوفي هو الي طلعنا اقلها يوقف معي دايم
متعب وهو يحاول يمسك ضحكته: وحنا صادقين فضيتوا روسنا
ضربت ملاذ كتفه بخفيف وقالت: اقول استلم القهوه وراك المسكين له ساعه يناديك
التفت متعب بسرعه: اخو العيال
فتح الشباك واستلم القهوه وكمل: معليش يا مدير بس قاعد اسكت الوراعين الي معي
ملاذ: خير وش الي وراعين !
اعطا القهوه ملاذ توزعها بينهم وسكر الشباك: وانا صادق وراعين مغير تتناقرون ما كانكم بحريم
متعب وهو يحاول يصرفها: يلا يلا اشربو بالعافيه
وزعت ملاذ طلباتهم واخذت قهوتها وحركو متجهين للقصر
